1 Korintus 16 - Perjanjian Baru Bahasa Melayu Maluku Utara

Doi sumbangan untuk jemaat di kota Yerusalem

¹ Skarang kita mo tulis tentang doi yang ngoni ada kumpul untuk kase pa orang-orang yang so jadi Tuhan Allah pe umat di kota Yerusalem. Kita minta ngoni biking sama deng yang kita so bilang pa jemaat-jemaat di daera Galatia.

² Bagus kalu tiap hari Minggu, ngoni masing-masing buka ngoni pe doi laeng dari ngoni pe hasil karja, kong simpang itu di ruma, supaya waktu kita datang, ngoni tara cari-cari lagi untuk kumpul doi itu.

³ Kalu kita so sampe pa ngoni, kita mo suru orang-orang yang ngoni percaya la antar ngoni pe doi sumbangan itu di kota Yerusalem. Nanti kita kase pa dorang surat la kase jelas dong pe tujuan deng doi sumbangan itu.

⁴ Kong kalu ngoni rasa penting, kita iko ka sana lagi, nanti kita pigi sama-sama deng dorang ka sana.

Paulus pe rencana mo pigi di kota Korintus

⁵ Kita rencana mo pigi pa ngoni, tapi kita mo lewat di daera Makedonia dulu, abis itu baru kita pigi pa ngoni.

⁶ Kong di Korintus, kita mo tinggal sadiki lama deng ngoni atau mungkin kita mo tinggal di situ selama musim dingin, supaya abis musim dingin ngoni bole bantu pa kita untuk kase turus kita pe perjalanan di mana kita mo pigi.

⁷ Barang skarang, kita tara mau basingga cuma rabu-rabu saja pa ngoni. Kalu itu Tuhan pe mau, kita harap kita tinggal deng ngoni sadiki lama.

⁸ Tapi, kita mo tinggal dulu di sini di kota Efesus, sampe hari raya Pentakosta.

⁹ Barang di sini, Tuhan buka jalang pa kita untuk kase tau Kabar Bae. Itu kita pe karja yang basar deng penting, biar lagi di sini ada banya orang yang tantang pa kita.

¹⁰ Kalu Timotius datang pa ngoni, ngoni tarima bae-bae pa dia supaya dia rasa tenang deng tara tako waktu sama-sama deng ngoni. Karna dia me ada biking karja yang Tuhan suru, sama deng yang kita biking.

¹¹ Jadi, jang ada dari ngoni yang pandang enteng pa Timotius! Tapi ngoni tolong pa dia, supaya dia bole kase turus dia pe perjalanan deng slamat, sampe dia bole bale ulang pa kita. Karna kita di sini ada tunggu pa dia sama-sama deng torang pe sudara-sudara laeng yang percaya.

¹² Skarang tentang Apolos, torang pe sudara yang percaya. So ulang-ulang kita minta pa dia, la dia deng sudara-sudara yang percaya yang laeng pigi lia pa ngoni. Tapi dia sama skali tara mau pigi pa ngoni skarang. Nanti kalu ada kesempatan, baru dia akan pigi pa ngoni di situ.

Hormati pa orang-orang yang karja untuk Tuhan

¹³ Ngoni musti jaga diri bae-bae! Ngoni pe percaya musti kuat pa Tuhan! Jang ngoni tako, tapi ngoni musti barani!

¹⁴ Samua yang ngoni biking, ngoni biking suda itu deng rasa sayang.

¹⁵ Sudara-sudara, ngoni pasti so tau, Stefanus deng dia pe keluarga yang kakamuka percaya pa Yesus Kristus di daera Akhaya. Kong ngoni me tau lagi, dorang yang kase dong pe diri deng sunggu-sunggu untuk layani pa orang-orang yang so jadi Tuhan pe umat. Karna itu, kita minta pa ngoni,

¹⁶ supaya ngoni dengar-dengaran pa dorang deng pa orang-orang yang ada karja sama-sama deng dorang, dorang itu yang karja karas untuk tolong pa orang percaya.

¹⁷ Kita sanang skali, barang Stefanus, Fortunatus deng Akhaikus so datang kamari. Deng dorang datang kamari itu, so sama deng dorang ada ganti pa ngoni di sini untuk bantu pa kita.

¹⁸ Barang, dorang itu kase kuat kita pe hati, sama deng dorang me kase kuat ngoni pe hati, jadi ngoni musti hormati orang-orang yang sama deng dorang itu.

Paulus deng orang-orang percaya pe salam

¹⁹ Jemaat-jemaat di daera Asia Kecil ada kirim salam pa ngoni samua. Akwila deng dia pe bini Priskila, deng jemaat yang jaga bakumpul pa dorang pe ruma, ada kirim salam banya-banya pa ngoni.

²⁰ Samua sudara yang percaya di sini me, ada kirim salam pa ngoni samua di situ. Kong kalu ngoni baku dapa, ngoni baku kase salam suda satu deng yang laeng, untuk kase tunju ngoni itu baku sayang.

²¹ Kita tulis ini deng kita pe tangan sandiri: salam dari kita Paulus.

²² Orang yang tara sayang pa Tuhan, biar suda dia dapa kutuk. Maranata, Tuhan datang suda!

²³ Kita minta pa Tuhan Yesus supaya Dia kase Dia pe bae pa ngoni.

²⁴ Kita sayang pa ngoni samua yang percaya pa Kristus Yesus.