طِطُس 3 - پنجابی نواں عہد نامہ نظرثانی شدہ چھپائی

مسِیحی چال چَلّن

¹ اوہناں نُوں یاد دوا پئی حاکماں تے اختیار والیاں دے تابعیاں رہن اوہناں دا حُکم مَنّن تے سارے نیک کمّاں لئی تیار رہن۔

² کِسے نُوں بُرا بھلا نا آکھن۔ جھگڑالو نا ہون پر نرم طبیعت ہون تے سارے بندیاں نال حلِیمی دا سلُوک کرن۔

³ کیوں جو اسی وی پہلاں نادان۔ نافرمان۔ دھوکھا کھان والے تے بُریاں خواہشاں تے خُوشیاں دے غلام ساں۔ تے دُکھ۔ تے ساڑا کر دے ساں۔ نفرت دے لائق ساں تے آپو وِچ وَیر رکھدے ساں۔

⁴ پر جد ساڈے نجات دین والے خُدا دی مِہربانی تے بندیاں نال اوہدی مُحبّت دِس پئی۔

⁵ تے اوس سانُوں چھڈایا۔ پر راستبازی دے کمّاں دے سببّوں نئیں جیہڑے اساں کِیتے پر اپنی رحمت نال نَوِیں پَیدایش تے نہاؤن تے پاک رُوح دے سانُوں نَوِیاں بناؤن دے وسیلے نال۔

⁶ جِہنُوں اوس ساڈے نجات دین والے یِسُوع مسِیح دی راہِیں ساڈے اُتّے چوکھا ڈوہلیا۔

⁷ تاں جو اسی اوہدے فضل نال راستباز ٹھہر کے سدا دی زِندگی دی آس وِچ وارث بنیئے۔

⁸ ایہہ گلّ سَچ اے۔ تے مَیں چاہناں آں پئی تُوں ایہہ گلّاں بڑا پَکّ کر کے دسیں۔ تاں جو جِنہاں خُدا نُوں مَنّیا اے۔ اوہ چنگے کمّاں وِچ لگّے رہن دا خیال رکھن۔ ایہہ گلّاں بندیاں لئی چَنگیاں تے فائدے والِیاں نیں۔

⁹ پر بیواقوفی دِیاں حُجتّاں تے شجریاں تے جھگڑیاں تے شریعت دِیاں لڑائِیاں توں پرہیز کر۔ ایس لئی پئی ایہہ بے فائدہ تے تھوتھیاں نیں۔

¹⁰ اِک دو واری نصِیحت کر کے بِدعتی بندے توں وکھرا ہو جا۔

¹¹ ایہہ جان کے پئی اجیہا بندہ بد راہ ہوگیا اے تے اپنے آپ نُوں مُجرم ٹھہرا کے گُناہ کر دا رہندا اے۔

اخِیری نصِیحتاں

¹² جد مَیں تیرے کول اَرتِماس یا تُخِکس نُوں گھلاں۔ تُوں میرے کول نِیکُپُلس آؤن دی کوشش کریں۔ کیوں جو اوتھے ای میری سِیال کٹّن دی دلیل اے۔

¹³ زیناس شریعت دے عالِم تے اُپلّوس نُوں کوشش کر کے ٹور دے۔ ایس طرح پئی اوہناں نُوں کِسے شے دی لوڑ نا رہے۔

¹⁴ تے ساڈے لوک ضرُورتاں پُوریاں کرن لئی چَنگیاں کمّاں وِچ لگِیاں رہنا سِکھّن۔ تاں جو اوہ اپّھل نا ہون۔

¹⁵ میرے سارے جوٹی دار تینُوں سلام آکھدے نیں تے جیہڑے اِیمان دی راہِیں ساڈے نال مُحبّت کر دے نیں اوہناں نُوں سلام آکھ۔ تُہاڈے ساریاں اُتّے فضل ہوندا رہے۔