طِطُس 2 - پنجابی نواں عہد نامہ نظرثانی شدہ چھپائی

کھری تعلِیم

¹ پر تُوں اوہ گلّاں دس جیہڑیاں ٹھیک تعلِیم نُوں پَھبدِیاں نیں۔

² ایہہ پئی بُڈّھے پرہیزگار سنجیدہ تے سُرت والے ہون۔ اوہناں دا اِیمان۔ تے مُحبّت۔ تے صبر ٹھیک ہوئے۔

³ ایسے طرح بُڈِّھیاں زنانِیاں دی چال ڈھال ادب والی ہوئے۔ چُغلی کرن والِیاں تے شرابی نا ہون پر ٹھیک گلّاں دسن والِیاں ہون۔

⁴ مُٹیاراں نُوں سکھان پئی اپنے اپنے گھر والیاں نُوں پیار کرن بچّیاں نُوں پیار کرن۔

⁵ تے پرہیزگار۔ تے پاک۔ تے گھر دے کمّ کرن والیاں۔ تے مہربان ہون۔ تے اپنے اپنے گھر والیاں دے حُکم وِچ رہن تاں جو خُدا دا کلام بدنام نا ہوئے۔

⁶ جواناں نُوں وی ایسے طرح مَت دے۔ پئی پرہیزگار بنن۔

⁷ سارِیاں گلّاں وِچ اپنے آپ نُوں نیک گلّاں دا نمونہ بنا۔ تیری تعلِیم وِچ صفائی تے سنجِیدگی ہوئے۔

⁸ تے اجیہا نیک کلام ہوئے جیہڑا الزام ہیٹھ نا آوے۔ تاں جو مخالف ساڈے اُتّے کوئی عیب نا لاسکن سگوں شرمندے ہون۔

⁹ نَوکراں نُوں نصِیحت کر۔ پئی اپنے مالکاں دے تابِع رہن سارِیاں گلّاں وِچ اوہناں نُوں خُوش رکھن۔ مالک دا آکھا نا موڑن۔

¹⁰ چوری تے چالاکی نا کرن۔ سگوں پُوری دیانتداری نُوں چنگی طرح ظاہر کرن۔ پئی اوہ سارِیاں گلّاں وِچ ساڈے نجات دین والے خُدا دی تعلِیم نُوں سنگارن۔

¹¹ کیوں جو خُدا دا اوہ فضل دِس پیا اے۔ جیہڑا سارے بندیاں دی نجات دا سبّب اے۔

¹² تے سانُوں سِکھاؤندا اے۔ پئی بیدینی تے دُنیاوی خواہشاں نُوں چھڈ کے ایس جہان وِچ پرہیز تے نیکی تے دِینداری نال زِندگی کٹیئے۔

¹³ تے اوس مُبارک آس یعنی اپنے بزُرگ خُدا تے نجات دین والے یِسُوع مسِیح دے جلال دے ظاہر ہون دی اُڈِیک وِچ رہئے۔

¹⁴ جِس اپنے آپ نُوں ساڈے لئی دے دِتّا۔ پئی سانُوں ساری بیدینی توں ڈنڈ بھرکے چھڈائے تے پاک کر کے اپنے خاص وِرثہ لئی اِک اُمّت بنائے۔ جیہڑی نیک کمّاں وِچ سرگرم ہوئے۔

¹⁵ پُورے اختیار نال ایہہ گلّاں آکھ تے نصِیحت دے تے جِھڑک کوئی تینُوں ماڑا نا سمجھے۔