رُومِیوں 9 - پنجابی نواں عہد نامہ نظرثانی شدہ چھپائی

خُدا تے اوہدے لوک

¹ مسِیح وِچ ہو کے مَیں سَچ آکھنا آں۔ جُھوٹھ نئیں آکھدا میرا دِل پاک رُوح وِچ میرے نال ایہو گواہی دیندا اے۔

² پئی مَینُوں بُہت رنج اے۔ تے میرا دِل ہر ویلے دُکھی رہندا اے۔

³ کیوں جو مَینُوں ایتھوں تِیکر وی منظُور ہوندا۔ پئی اپنے بھراواں واسطے جیہڑے جِسم ولّوں میرے انگ ساک نیں مَیں آپ ای مسِیح توں لعنتی ہوندا۔

⁴ اوہ تے اِسرائیلی نیں۔ پُتریلے ہونا تے جلال تے عہد تے شریعت دا سونپیا جانا تے عبادت تے وعدے اوہناں دے نیں۔

⁵ بزُرگ اوہناں دے نیں۔ نالے مسِیح جِسم ولّوں اوہناں وِچوں ہویا جیہڑا سبھناں توں اُچّا خُدا سدا توڑی مُبارک اے آمِین۔

⁶ پر ایہہ نئیں پئی خُدا دا کلام ایویں گیا۔ کیوں جو اوہ سارے اِسرائیلی نئیں جیہڑے اِسرائیل وِچوں نیں۔

⁷ تے نا ابرہام دی نسل ہون کر کے سارے پُتر نیں۔ پر لِکھیا اے پئی اِضحاق توں تیری نسل اکھوائے گی۔

⁸ گلّ تے اِنج اے پئی نا اوہ جیہڑے جِسم ولّوں پُتر ہوئے اوہی خُدا دے پُتر نیں۔ پر وعدے دے پُتر نسل گِنی دی اے۔

⁹ کیوں جو وعدے دا کلام ایہہ اے۔ ”پئی ایسے ویلے دے سببّوں مَیں آواں گا تے سارہ نُوں پُتر ہوئے گا۔“

¹⁰ تے نِرا ایہہ ای نئیں۔ سگوں رِبقہ وی اِک بندے توں یعنی ساڈے پئیو اِضحاق توں حاملہ سی۔

¹¹ کیوں جو اوہ تے اجے نئیں سن جمّے تے نا کُجھ بھلا بُرا کِیتا سی۔ ایس مطلب واسطے پئی خُدا دا اِرادہ جیہڑا چُنن دی بابت اے۔ اوہ کمّاں اُتّے نا رہے۔ سگوں سَدّن والے دی مرضی اُتّے رہے۔

¹² تَد اوہنوں آکھیا گیا سی پئی وَڈا چھوٹے دی سیوا کرے گا۔

¹³ جیویں لِکھیا ہویا اے۔ پئی مَیں یعقُوب نال پیار کِیتا۔ پر عیسَو توں نفرت۔

¹⁴ فیر اسی کِیہ آکھئے پئی خُدا دی درگاہ وِچ بے انصافی اے؟ خُدا نا کرے۔

¹⁵ کیوں جو اوہ مُوسیٰ نُوں آکھدا اے۔ پئی جِہدے اُتّے مَیں رَحم کرنا آں رَحم کراں گا تے جِہدے اُتّے ترس کرنا آں ترس کراں گا۔

¹⁶ سو ایہہ تے نا چاہن والے توں تے نا دَوڑ بھج کرن والے توں پر خُدا توں حُکم اے جیہڑا رَحم کر دا اے۔

¹⁷ کیوں جو پاک کلام فِرعون نُوں آکھدا اے۔ پئی ”مَیں ایس لئی تینُوں کھڑا کِیتا اے۔ پئی تیرے وِچ اپنی قُدرت وکھالاں تے ساری دھرتی اُتّے میرا ناں مشہُور کِیتا جائے۔“

¹⁸ سو جِہدے اُتّے اوہ چاہندا اے رَحم کر دا اے تے جِہنُوں اوہ چاہندا اے۔ سخت کر دا اے۔

خُدا دا غضب تے رحمت

¹⁹ فیر تُوں مَینُوں ایہہ آکھیں گا۔ ”پئی اوہ کاہِنُوں عیب لاندا اے اوہدی مرضی دا کِس سامنا کِیتا؟“

²⁰ اوہ بندیا۔ تُوں کون ایں۔ جیہڑا خُدا نال مُڑ مُڑ جواب کرنا ایں؟ کاریگری کاریگر نُوں آکھے گی پئی تُوں مَینُوں اجیہا کیوں بنایا؟

²¹ گھمیار دا مِٹّی اُتّے وَس نئیں پئی اِکّو تھوبے وِچوں اِک بھانڈا عِزّت دا تے دُوجا بے عِزّتی دا بنائے؟

²² تے کِیہ ہویا جے خُدا ایس غرض نال پئی اپنا غُصّہ وکھا لے تے اپنی قُدرت معلُوم کراوے۔ غُصّے دے بھانڈیاں دی جیہڑے ناس ہون لئی تیار کِیتے گئے سن بڑے صبر نال سہندا رہیا۔

²³ تاں جو رَحم دے بھانڈیاں نُوں اپنے جلال دی دَولت معلُوم کراوے۔ جِنہاں نُوں اوس اگّے توں جلال لئی تیار کِیتا۔

²⁴ یعنی سانُوں جِنہاں نُوں اوس نِرا یہُودِیاں وِچوں ای نئیں سگوں غیر قوماں وِچوں وی سدّیا۔

²⁵ جیویں ہوسیع وِچ وی آکھدا اے۔ پئی جیہڑی میری قوم نئیں سی۔ اوہنوں مَیں اپنی قوم آکھاں گا۔ تے جیہڑی پیاری نئیں سی اوہنوں پیاری آکھاں گا۔

²⁶ تے اِنج ہوئے گا پئی جِس تھاں اوہناں نُوں آکھیا گیا سی۔ پئی تُسی میری قوم نئیں اوہ۔ اوتھے اوہ جِیوندے خُدا دے پُتر اکھوان گے۔

²⁷ پر یسعیاہ اِسرائیل دی بابت ہوکا دیندا اے۔ پئی ”اِسرائیل دے پُتر بھانویں گنتری وِچ سمُندر دی رِیت دے برابر ہون۔ پر باقِیاں وِچوں تھوڑے ای بچائے جان گے۔“

²⁸ کیوں جو خُدا اپنا لیکھا زمین اُتّے تمام کر کے تے چھیتی مُکا کے پُورا کرے گا۔

²⁹ تے جیویں یسعیاہ نے اگّے وی آکھیا اے پئی جے فَوجاں دا خُداوند ساڈے لئی نسل نا چھڈ دا تے اسی سدُوم وانگُوں بن جاندے تے عمُورہ جیہے ہو جاندے۔

اِسرائیل تے خُوشخبری

³⁰ پھر اسی کِیہ آکھئے؟ پئی غیر قوماں جیہڑیاں راستبازی دا پِچھّا نئیں سن کر دیاں اوہناں نُوں راستبازی ہتّھ آئی؟ یعنی اوہ راستبازی جیہڑی اِیمان توں ہوندی اے؟

³¹ پر اِسرائیل جِس راستبازی دا پِچھّا کِیتا اوس شریعت تِیکر نئیں اَپڑیا۔

³² کاہِنُوں؟ کیوں جو اوہناں اِیمان دے راہ نئیں سگوں عملاں دے راہ نال اوہدا پِچھّا کِیتا۔ اوہناں ٹھیڈے والے پتّھر نال ٹھیڈا کھادا۔

³³ جیویں لِکھیا اے پئی ویکھ مَیں صِیُّون وِچ ٹھیڈے دی چٹان تے ٹھوکر دا پتّھر رکھنا آں۔ تے جیہڑا اوہدے اُتّے اِیمان لیاؤندا اے اوہ شرمندہ نئیں کِیتا جاوے گا۔