رُومِیوں 6 - پنجابی نواں عہد نامہ نظرثانی شدہ چھپائی

گُناہ ولّوں مویا تے مسِیح وِچ زِندہ

¹ اسی فیر کِیہ آکھئے۔ گُناہ وِچ رہئے تاں جو فضل بُہتا ہوئے؟

² خُدا نا کرے۔ اسی جیہڑے گُناہ ولّوں مر گئے کِیویں اگّے نُوں اوہدے وِچ زِندگی کِٹئے؟

³ یا تُسی بے خبر ہو پئی اساں جِنّیاں مسِیح یِسُوع دا بپتِسمہ لیا اوہدی مَوت دا بپتِسمہ لیا؟

⁴ سو بپتِسمے دی راہِیں اوہدی مَوت وِچ اسی اوہدے نال دفنائے گئے۔ تاں جو جیویں مسِیح باپ دے جلال دی راہِیں مُردیاں وِچوں جوالیا گیا۔ ایسے طرح اسی وی نَوِیں زِندگی وِچ چلّئے۔

⁵ کیوں جو جیویں اسی اوہدی مَوت دی صُورت وِچ اوہدے نال جوڑے گئے آں۔ اوسے طرح اسی اوہدے جی اُٹھن دی صُورت وِچ ہوواں گے۔

⁶ ایہہ جان کے پئی ساڈی پرانی اِنسانِیّت اوہدے نال صلِیب دِتّی گئی۔ تاں جو گُنہگار بدن رَدّ کِیتا جائے تے اگّے نُوں اسی گُناہ دی غلامی نا کریئے۔

⁷ ایس کر کے پئی جیہڑا مر چُکیا سو گُناہ توں بَری ہویا اے۔

⁸ پر جد اسی مسِیح نال موئے۔ سانُوں یقِین اے پئی اسی اوہدے نال زِندہ وی ہوواں گے۔

⁹ ایہہ جان کے پئی مسِیح مُردیاں وِچوں جد جوالیا گیا اوہ مُڑ نئیں مر دا۔ مَوت دا مُڑ اوہدے اُتّے وَس نئیں چلدا۔

¹⁰ کیوں جو مسِیح جو مر گیا تے گُناہ ولّوں اِک وار مویا۔ پر ہُن جو جِیوندا اے خُدا واسطے جِیوندا اے۔

¹¹ ایسے طرح تُسی وی اپنے آپ نُوں گُناہ ولّوں مُردے پر مسِیح یِسُوع وِچ خُدا واسطے جِیوندے سمجھو۔

¹² سو گُناہ تُہاڈے فانی بدن وِچ بادشاہی نا کرے۔ پئی تُسی اوہدیاں شہوتاں نُوں مَنّوں۔

¹³ تے نا تُسی اپنے انگاں نُوں گُناہ دے حوالے کرو پئی ناراستی دے ہتّھیار ہون۔ پر اپنے آپ نُوں مُردیاں وِچوں جِیوندے جان کے خُدا دے حوالے کرو۔ تے اپنا انگاں نُوں راستبازی دے ہتّھیار ہون لئی خُدا دے حوالے کرو۔

¹⁴ کیوں جو گُناہ دا تُہاڈے اُتّے وَس نا چلّے گا۔ ایس کر کے پئی تُسی شریعت دے ہیٹھ نئیں پر فضل دے ہیٹھ ہو۔

راستبازی دے غُلام

¹⁵ فیر کِیہ ہویا ایس کر کے پئی اسی شریعت ہیٹھ نئیں سگوں فضل ہیٹھ آں۔ اسی گُناہ کریئے؟ خُدا نا کرے۔

¹⁶ تُسی نئیں جان دے پئی جِہدے تُسی اپنے آپ نُوں تابعداری لئی غلام کر کے حوالے کر دے ہو اوسے دے تُسی غلام ہو جِہدے تابعیاں اوہ۔ بھانویں مَوت لئی گُناہ دے بھانویں راستبازی لئی تابعداری دے؟

¹⁷ پر شُکر خُدا دا پئی بھانویں تُسی گُناہ دے غلام سو۔ تُسی اوس تعلِیم دے جِہدے سَچّے وِچ ڈھالے گئے سو۔ دِلوں تابعدار بنے۔

¹⁸ تے گُناہ توں چُھٹ کے تُسی راستبازی دے غلام بنے۔

¹⁹ تُہاڈے جِسم دی کمزوری دے سببّوں مَیں اِنسانی سبھا وانگُوں گلّ کرنا آں کیوں جو جیویں تُساں اپنے انگاں نُوں شرارت کرن لئی پلِیتی تے شرارت دی غلامی دے حوالے کِیتا اوسے طرح ہُن تُسی اپنے انگاں نُوں پاک ہون لئی راستبازی دی غلامی دے حوالے کر دیو۔

²⁰ کیوں جو جد تُسی گُناہ دے غلام سو تُسی راستبازی ولّوں اَزاد سو۔

²¹ سو اودُوں تُہانوں اوہناں گلّاں دا جِنہاں توں ہُن شرماؤندے ہو کِیہ پَھل لَبّھیا؟ کیوں جو اوہناں دا اوڑک تے مَوت اے۔

²² پر ہُن گُناہ توں چُھٹ کے تے خُدا دے غلام بن کے تُہاڈا پَھل پاکیزگی لئی اے۔ تے اوڑک ہمیشہ دی زِندگی۔

²³ کیوں جو گُناہ دی مزدُوری مَوت اے۔ پر خُدا دی بخشِش ساڈے خُداوند یِسُوع مسِیح وِچ ہمیشہ دی زِندگی اے۔