رُومِیوں 5 - پنجابی نواں عہد نامہ نظرثانی شدہ چھپائی

خُدا دے نال صُلح

¹ سو جد اسی اِیمان توں راستباز ٹھہرائے گئے تے اسی اپنے خُداوند یِسُوع مسِیح دی راہِیں خُدا نال صُلح رکھیے۔

² جِہدی راہِیں اِیمان نال ساڈی فضل تِیکر پہنچ اے۔ جِہدے وِچ اسی قیم آں۔ تے خُدا دے جلال دی آس اُتّے اسی فخر کریئے۔

³ تے نِرا ایہو نئیں سگوں اسی اپنیاں تنگِیاں وِچ وی فخر کریئے۔ ایہہ جان کے پئی تنگی صبر پَیدا کر دی اے۔

⁴ تے صبر تجربے نُوں تے تجربہ آس نُوں۔

⁵ تے آس شرمندہ ایس لئی نئیں کر دی۔ پئی خُدا دی مُحبّت پاک رُوح دی راہِیں جیہڑا سانُوں دِتّا گیا ساڈے دِلاں وِچ پائی ہوئی اے۔

⁶ ایس کر کے مسِیح جد اسی کمزور ساں ویلے سر بے دِیناں دے بدلے مویا۔

⁷ ہُن مَساں کوئی کِسے راستباز بندے لئی مرے گا۔ پر شاید کِسے نیک بندے دے بدلے کوئی مرن دی دلیری کرے۔

⁸ پر خُدا اپنی مُحبّت دی خُوبی ساڈے اُتّے ایس طرح ظاہر کر دا اے۔ پئی جد اسی اجے گُناہی ساں مسِیح ساڈے بدلے مویا۔

⁹ ہُن جد اسی اوہدے خُون نال راستباز ٹھہرائے گئے تے اوہدی راہِیں قَہر توں ضرُور ای بچائے جاواں گے۔

¹⁰ کیوں جو جے اسی وَیری ہو کے خُدا نال اوہدے پُتر دی مَوت دی راہِیں مِلائے گئے تے ہُن جد میل ہوگیا اسی اوہدی زِندگی وِچ ضرُور ای بچائے جاواں گے۔

¹¹ تے نِرا ایہو نئیں سگوں اسی خُدا وِچ فخر وی کرنے آں۔ اپنے خُداوند یِسُوع مسِیح دی خاطر جِہدی راہِیں ہُن اسی مِلائے گئے آں۔

آدم تے مسِیح دا موازنہ

¹² ایس کر کے جیویں اِک بندے توں گُناہ دُنیا وِچ آ وڑیا تے گُناہ توں مَوت۔ تے ایویں مَوت ساریاں بندیاں اُتّے آئی ایس لئی پئی سبھناں گُناہ کِیتا۔

¹³ کیوں جو شریعت دے آؤن تِیکر گُناہ تے دُنیا وِچ ای سی۔ پر جِتّھے شریعت نئیں اوتھے گُناہ گِنیا نئیں جاندا۔

¹⁴ تَد وی آدم توں لے کے مُوسیٰ تِیکر مَوت نے اوہناں اُتّے وی بادشاہی کِیتی۔ جِنہاں آدم دی نافرمانی وانگر گُناہ نا کِیتا۔ جیہڑا آؤن والے دا نمونہ سی۔

¹⁵ پر ایہہ نئیں پئی جِہیا قصور تیِہی بخشِش کیوں جو جد اِک دے قصور نال بتھیرے موئے تے خُدا دا فضل تے اوہ بخشِش جیہڑی اِک بندے یعنی یِسُوع مسِیح دے فضل توں اے ضرُور ای بتھیریاں لئی وَاہوَا ساری ہوئی۔

¹⁶ جیویں اِک بندے دے قصور کرن دا نتیجہ ہویا تیہا بخشِش دا حال نئیں کیوں جو اِکّی دے سببّوں اوہ فیصلہ ہویا۔ جِہدا نتیجہ سزا دا حُکم اے پر بتھیرے قصوراں توں ایہہ نِعمت پَیدا ہوئی پئی لوک راستباز ٹھہرن۔

¹⁷ کیوں جو اِک دے قصور دے سببّوں جے مَوت نے اِک دی راہِیں بادشاہی کِیتی۔ تے اوہ لوک جیہڑے فضل تے راستبازی دی بخشِش وَدّھ پاندے نیں۔ اِک دی راہِیں جیہڑا یِسُوع مسِیح اے۔ ضرُور ای زِندگی وِچ بادشاہی کرن گے۔

¹⁸ جیویں اِک قصور دی راہِیں سزا دا حُکم ساریاں بندیاں اُتّے آیا ایسے طرح راستبازی دے اِک کمّ توں سارے بندیاں نُوں راستباز ٹھہرا کے زِندگی مِلی۔

¹⁹ کیوں جو جیویں اِک بندے دے حُکم موڑن نال بتھیرے گُناہیں ٹھہرائے گئے۔ ایسے طرح اِک بندے دے حُکم مَنّن نال بتھیرے راستباز ٹھہرائے جان گے۔

²⁰ تے شریعت نال ای آوڑِی تاں جو قصور بُہتا ہوئے۔ پر جِتّھے گُناہ بُہتا ہویا۔ اوتھے فضل حدّوں باہر وَدّھ ہویا۔

²¹ تاں جو جیویں گُناہ مَوت وِچ بادشاہی کِیتی۔ ایسے طرح فضل دی زِندگی توڑی راستبازی دی راہِیں یِسُوع مسِیح ساڈے خُداوند دی راہِیں بادشاہی کرے۔