رُومِیوں 4 - پنجابی نواں عہد نامہ نظرثانی شدہ چھپائی

ابرہام دی مِثال

¹ فیر اسی کِیہ آکھیئے۔ پئی ابرہام نُوں جیہڑا ساڈا جِسمانی پئیو اے کِیہ مِلیا اے؟

² کیوں جو جے ابرہام کمّاں نال راستباز گِنیا گیا۔ تے اوہدا فخر دا تھاں اے۔ تَد وی خُدا دے اگّے نئیں۔

³ نوِشتہ کِیہ آکھدا اے؟ ایہہ پئی ابرہام خُدا اُتّے اِیمان لیا یا تے ایہہ اوہدے لئی راستبازی گِنیا گیا۔

⁴ ہُن کمّ کرن والے نُوں مزدُوری دینی بخشِش نئیں اے۔ سگوں اوہدا حق گِنیا جاندا اے۔

⁵ پر جیہڑا کمّ نئیں کر دا سگوں گُنہگار نُوں راستباز ٹھہران والے اُتّے اِیمان لیاؤندا اے۔ اوہدے لئی اوہدا اِیمان راستبازی گِنیا جاندا اے۔

⁶ جیویں داؤد دی اوس بندے دے مُبارک حال دا ذِکر کر دا اے۔ جِہدے لئی خُدا بِناں کمّاں دے راستبازی گِن لَیندا اے۔

⁷ پئی دھنّ نیں اوہ جِنہاں دے گُناہ بخشے گئے۔ تے جِنہاں دِیاں تقصِیراں کجِّیاں گِئیاں۔

⁸ دھنّ اے۔ اوہ بندہ جِہدے لیکھے وِچ خُداوند گُناہ نا گِنے گا۔

⁹ فیر اوہ مُبارکبادی سُنتی بہن والیاں اُتّے آؤندی اے یا نا بہن والیاں اُتّے وی؟ کیوں جو اسی آکھنے آں پئی ابرہام لئی اوہدا اِیمان ای راستبازی گِنیا گیا سی۔

¹⁰ فیر اوہ کِس حال وِچ گِنیا گیا۔ جدوں اوہ سُنتی بَیٹھا ہویا سی۔ یا اجے نئیں سی بَیٹھا؟ سُنت وِچ نئیں سگوں نا سُنت وِچ۔

¹¹ تے اوہنوں سُنتی بہن دا نِشان مِلیا۔ پئی اوس اِیمان دی راستبازی دی مُہر ہوئے۔ جیہڑا اوہ ناسُنتی دے حال وِچ لیایا۔ تاں جو اوہ سبھناں دا پئیو ہوئے۔ جیہڑے نا سُنت ہوندیاں اِیمان لیاؤندے نیں پئی اوہناں لئی راستبازی گِنی جاوے۔

¹² تے نا سُنت والیاں دا پئیو ہوئے جیہڑے نِرے سُنتی بَیٹھے ہوئے ای نئیں۔ سگوں اوس اِیمان دے کُھرے اُتّے چلدے نیں جیہڑا ساڈے پئیو ابرہام دا ناسُنتا ہوندیاں ہوئیا سی۔

خُدا دا وعدہ اِیمان دے راہِیں کمّ کر دا اے

¹³ کیوں جو ایہہ وعدہ پئی دُنیا تیری وِرثہ اے شریعت دی راہِیں ابرہام یا اوہدی نسل نال نئیں سی کِیتا گیا پر اِیمان دی راستبازی دی راہِیں کِیتا گیا۔

¹⁴ پر جے شریعت والے ای وارث نیں۔ تے اِیمان بے فائدہ تے وعدہ ردّیا گیا۔

¹⁵ کیوں جو شریعت قَہر پَیدا کر دی اے۔ پر جِتّھے شریعت نئیں اوتھے اوہدا ٹالنا وی نئیں۔

¹⁶ ایس کر کے اوہ وِرثہ اِیمان توں اے۔ تاں جو فضل وانگُوں ہوئے تے ایہہ وعدہ کُل نسل لئی قیم رہے نا نِرا اوس نسل لئی جیہڑی شریعت والی اے۔ سگوں اوس لئی وی جیہڑی ابرہام وانگر اِیمان والی اے۔ جیہڑا ساڈے سبھناں دا پئیو اے۔

¹⁷ (جیویں لِکھیا اے۔ پئی مَیں تینُوں بتھیریاں قوماں دا پئیو بنایا اے) اوس خُدا دی حضُوری وِچ جِہدے اُتّے اوس اِیمان لیاندا جیہڑا مُردیاں نُوں جوالدا تے اوہناں شیواں نُوں جیہڑیاں ہَین نئیں ایس طرح سَدّ دا اے پئی اوہ ہَین۔

¹⁸ اوس نااُمیدی وِچ آس نال اِیمان لیاندا۔ تاں جو اوس وعدے دے سببّوں پئی تیری نسل ایس طرح ہوئے گی۔ اوہ بتھیریاں قوماں دا پئیو بنے۔

¹⁹ تے جد سَو کُو ورھیاں دا سی اوس بھانویں اپنے بدن دا جیہڑا موئے برابر سی تے سارہ دے کُکھ دی مُردگی دا وچار کِیتا پر اِیمان وِچ ڈِھلّا نا ہویا۔

²⁰ خُدا دے وعدے اُتّے بے اِیمانی نال شک نا کِیتا۔ سگوں اِیمان دی راہِیں تگڑیاں ہو کے خُدا دی وڈیائی کِیتی۔

²¹ تے اوہنوں پَکّا یقِین ہویا۔ پئی جیہڑا اوس وعدہ کِیتا اے سو پُورا وی کر سکدا اے۔

²² تے ایس کر کے اوہدے لئی ایہہ راستبازی وی گِنی گئی۔

²³ تے ایہہ گلّ پئی اِیمان اوہدے لئی راستبازی گِنیا گیا۔ نِری اوہدے لئی نئیں لِکھی گئی۔

²⁴ پر ساڈی خاطر وی لِکھی گئی۔ جِنہاں لئی گِنی جائے گی۔ جے اسی اوہدے اُتّے اِیمان رکھنے آں جِس ساڈے خُداوند یِسُوع نُوں مُردیاں توں جوالیا۔

²⁵ جیہڑا ساڈیاں قصوراں دے لئی حوالے کِیتا گیا۔ تے سانُوں راستباز ٹھہران لئی جوایا گیا۔