رُومِیوں 3 - پنجابی نواں عہد نامہ نظرثانی شدہ چھپائی

¹ فیر یہُودی کیہڑی گلّوں وَدّھ اے تے سُنتی بہن دا کِیہ فائدہ اے؟

² ہر طرح نال بُہت اے خاص ایس گلّے پئی خُدا دا کلام اوہناں دے سپُرد کِیتا گیا۔

³ فیر جے کئی اِیمان نا وی لیائے تے کِیہ؟ اوہناں دی بے اِیمان خُدا دی وفاداری نُوں نکمّیاں کر سکدی اے؟

⁴ کدی نئیں سگوں خُدا سَچّا ٹھہرے۔ بھانویں سارے بندے جُھوٹھے ہون جیویں لِکھیا اے۔ پئی تُوں اپنیاں گلّاں وِچ سَچّا ٹھہریں۔ تے عدالت وِچ جِت جاویں۔

⁵ پر جے ساڈی ناراستی خُدا دی راستبازی نُوں قیم کر دی اے۔ تے اسی کِیہ آکھیئے؟ خُدا ناراست اے۔ جیہڑا قَہر گھلدا اے؟ (مَیں اِنسان ہوندیاں گلّ کرنا آں۔)

⁶ کدی وی نئیں۔ جے ہوئے تے خُدا دُنیا دی عدالت کِیویں کرے گا؟

⁷ پر جے میرے جُھوٹھ دے سببّوں خُدا دی سچیائی اوہدی وڈیائی لئی وَدھی۔ تے مَیں کاہِنُوں گُناہی ہویا۔

⁸ تے اسی بُریائی کیوں نا کریئے پئی بھلیائی نِکلے؟ جیویں ساڈے اُتّے تُہمت لاندے نیں کئیاں وِچ افواہ اے۔ پئی اسی ایسے طرح آکھنے آں۔ ایہو جِہیاں اُتّے سزا دا حُکم ٹھیک اے۔

کوئی نیکوکار نئیں

⁹ فیر کِیہ ہویا اسی اوہناں نالوں چنگے آں؟ کَدے وی نئیں کیوں جو اسی آکھ بَیٹھے آں۔ پئی یہُودی تے یُونانی ساریاں دے سارے گُناہ دے ہیٹھ نیں۔

¹⁰ جیویں لِکھیا ہویا اے۔ پئی کوئی راستباز نئیں اِک وی نئیں۔

¹¹ کوئی سمجھن والا نئیں کوئی خُدا دا لَبّھن والا نئیں۔

¹² سارے بدراہ نیں۔ تے رَل کے نکمّے نیں۔ کوئی نیکی کرن والا نئیں اِک وی نئیں۔

¹³ اوہناں دا سَنگھ کُھلی قبر اے۔ اوہناں اپنی زبانوں فریب دِتّا اے۔ اوہناں دے مُنھاں وِچ سپّاں دا زہر اے۔

¹⁴ اوہناں دا مُنھ لعنت تے کَڑتّن دا بھریا ہویا اے۔

¹⁵ اوہناں دے پَیر خُون کرن وِچ کاہلے نیں۔

¹⁶ اوہناں دِیاں راہاں وِچ بربادی تے مُصِیبت اے۔

¹⁷ تے اوہناں سلامتی دا راہ سہاتا نئیں۔

¹⁸ اوہناں دِیاں اَکھّیاں وِچ خُدا دا خوف نئیں اے۔

¹⁹ ہُن اسی جاننے آں پئی شریعت جو کُجھ آکھدی اے شریعت والیاں ای نُوں آکھدی اے تاں جو ہر اِک دا مُنھ بند ہو جائے۔ تے ساری دُنیا خُدا دی عدالت دے ہیٹھ آ جائے۔

²⁰ کیوں جو کوئی بندے شریعت دے کمّاں نال اوہدی نظر وِچ راستباز نا ٹھہرے گا۔ ایس لئی پئی شریعت نال ای گُناہ دی پہچان اے۔

خُدا دے نال ساڈا رشتہ کِیویں بحال ہوندا اے

²¹ پر ہُن شریعت دے بغیر خُدا دی راستبازی ظاہر ہوئی اے۔ تے اوہدے اُتّے شریعت تے نبی گواہی دیندے نیں۔

²² یعنی خُدا دی اوہ راستبازی جیہڑی یِسُوع مسِیح اُتّے اِیمان لیاؤن نال ساریاں اِیمانداراں نُوں مِلدی اے کیوں جو کُجھ فرق نئیں۔

²³ ایس لئی پئی سبھناں گُناہ کِیتا تے خُدا دے جلال توں رَیہہ جاندے نیں۔

²⁴ پر اوہدے فضل توں اوس چُھٹکارے دے سبّب جیہڑا مسِیح یِسُوع وِچ ہوندا اے۔ مُفت راستباز گِنے جاندے نیں۔

²⁵ اوہنوں خُدا نے مُقرّر کِیتا۔ پئی اوہدے لہو اُتّے اِیمان لیاؤن نال کفّارہ ہوئے۔ تاں جو اوہدی راستبازی دِکھائی جاوے۔ کیوں جو خُدا صبر کر کے پِچّھلے گُناہاں نُوں چھڈ دِتّا۔

²⁶ تے ایس زمانے وِچ وی اپنی راستبازی ظاہر کرے۔ تاں جو اوہ آپ راستباز رہے۔ تے اوہنوں جیہڑا یِسُوع اُتّے اِیمان لیاوے راستباز ٹھہرائے۔

²⁷ فیر ہُن فخر کِتّھے رہیا۔ اوہدا تھاں ای نا رہیا کیہڑی شریعت نال؟ عملاں دی شریعت نال؟ نئیں سگوں اِیمان دی شریعت نال۔

²⁸ ایس لئی اسی ایہہ سمجھنے آں پئی بندہ اِیمان ای نال شریعت دے کمّاں بِناں راستباز ٹھہر دا اے۔

²⁹ خُدا نِرا یہُودِیاں دا ای اے تے غیر قوماں دا نئیں؟ ہاں اوہ غیر قوماں دا وی اے۔

³⁰ کیوں جو اِکّو خُدا اے جیہڑا سُنتی بہن والیاں نُوں اِیمان نال تے نا بہن والیاں نُوں وی اِیمان دی راہِیں راستباز ٹھہراوے گا۔

³¹ فیر اسی شریعت نُوں اِیمان دی راہِیں ردّ کرنے آں؟ خُدا نا کرے۔ سگوں اسی تے شریعت نُوں قیم رکھنے آں۔