رُومِیوں 11 - پنجابی نواں عہد نامہ نظرثانی شدہ چھپائی

اِسرائیل تے خُدا دا رَحم

¹ فیر مَیں آکھنا آں کِیہ خُدا نے اپنی قوم نُوں رَدّ کر دِتّا؟ خُدا نا کرے۔ کیوں جو مَیں وی تے ابرہام دی نسلوں بِنیمِین دے فِرقے دا اِسرائیلی آں۔

² خُدا اپنی قوم نُوں جِہنُوں اوس پہلے توں جانیا رَدّ نئیں کِیتا۔ تُسی نئیں جان دے پئی ایلیّاہ دے بیان وِچ پاک کتاب کِیہ آکھدی اے؟ پئی اوہ خُدا دے اگّے اِسرائیل دے لئی کِس طرح فریاد کر دا اے۔

³ پئی اَے خُداوندا۔ اوہناں تیرے پیغمبراں نُوں جانوں مار دِتّا تے تیریاں قُربان گاہاں نُوں ڈھا دِتّا تے مَیں اکلّا ای رہ گیا آں۔ تے اوہ میری جان دے وی پِچّھے پئے ہوئے نیں۔

⁴ پر اوہنوں خُدا غَیب توں کِیہ جواب دیندا اے؟ ایہہ پئی مَیں اپنے لئی سَتّ ہزار بندے رکھ لَئے۔ جِنہاں بَعَل دے اگّے گوڈے نئیں نوائے۔

⁵ سو ایسے طرح ایس ویلے وِچ وی فضل دے چُنن دے سببّوں کُجھ باقی رکھّے ہوئے نیں۔

⁶ پر ایہہ جے فضل توں ہویا تے فیر عملاں توں نا ہویا۔ نئیں تے فضل فیر فضل ای نا رہیا۔

⁷ فیر کِیہ ہویا۔ جِس گلّ نُوں اِسرائیل لَبّھدا اے سو ہتّھ نا لگّی۔ پر چُنیاں ہویاں نُوں ہتّھ لگّی۔ تے باقی سخت دِل کِیتے گئے۔

⁸ جیویں لِکھیا ہویا اے پئی خُدا اوہناں نُوں اجے تِیکر سُست طبیعت دِتّی۔ ایہو جِہیاں اَکھّیاں جو نا ویکھن تے۔ اجیہے کنّ جیہڑے نا سُنن۔

⁹ تے داؤد آکھدا اے۔ اوہناں دا دسترخوان پھاہی تے جال تے ٹھوکر تے اوہناں لئی بدلہ بن جائے۔

¹⁰ اوہناں دِیاں اَکھّیاں اگّے ہنیرا آ جائے پئی اوہ نا ویکھن۔ تے تُوں اوہناں دی پِٹھ سدا کُبّی رکھ۔

¹¹ فیر مَیں آکھنا آں اوہناں ایس لئی ٹھیڈا کھادا پئی ڈِگّ پَین؟ خُدا نا کرے سگوں اوہناں دی بُھل دے سبّب غیر قوماں نُوں نجات مِلی۔ تاں جو اوہناں نُوں غیرت آوے۔

¹² تے جے اوہناں دی بُھل دُنیا وی دَولت ہوئی تے اوہناں دا گھٹنا غیر قوماں دی دَولت ہوئی۔ تے اوہناں دا وَدھنا ضرُور ای اوہناں دی دَولت دا سبّب ہوئے گا۔

غیر قوماں دے لئی نجات

¹³ پر مَیں تُساں غیر قوماں نال گلّ کرنا آں۔ سو جِس حال وِچ مَیں غیر قوماں دا رسُول آں مَیں اپنی خِدمت نُوں وڈیاناں آں۔

¹⁴ پئی مَیں کِسے طرح اپنی قوم والیاں نُوں غیرت دواکے اوہناں وِچوں کئیاں نُوں بچاواں۔

¹⁵ کیوں جو جے اوہناں دے ردّے جان توں دُنیا دا میل ہویا تے اوہناں دے قبول ہون توں مُردیاں دا جی اُٹھنا ای نا ہوئے گا؟

تمام انساناں تے خُدا دی رحمت

¹⁶ تے جے نذرانے دا پہلا پیڑا پاک اے تے ساری تَون پاک اے۔ تے جے جڑ پاک اے۔ تے ٹہنِیاں وی پاک نیں۔

¹⁷ پر جے ٹہنِیاں وِچوں کئی اِک بَھن کے سُٹِّیاں گِئیاں تے تُوں جنگلی زَیتُون ہو کے اوہناں دے وِچ پَیوند کِیتا گیا۔ تے اوہناں دے نال زَیتُون دی تھندی جڑ دا سانجھی بن گیا۔

¹⁸ تے ٹہنِیاں اُتّے نا آکڑ۔ پر جے تُوں آکڑیں گا وی تے تُوں جڑ نُوں نئیں سنبھالدا پر جڑ تینُوں سنبھالدی اے۔

¹⁹ فیر تُوں آکھیں گا۔ ٹہنِیاں ایس لئی بَھن کے سُٹِّیاں گِئیاں پئی مَیں پَیوند کِیتا جاواں۔

²⁰ ہَچھّا اوہ تے بے اِیمانی دے سبّب بَھن کے سُٹِّیاں گِئیاں۔ تے تُوں اپنے اِیمان دے سبّب کھلوتا ایں۔ مغرُور نا بن سگوں ڈر۔

²¹ کیوں جو جد خُدا اصلی ٹہنِیاں نُوں نئیں چھڈیا۔ تے اوہ تینُوں وی نئیں چھڈے گا۔

²² سو خُدا دی مِہربانی تے سختی دیکھ ڈِگّن والیاں اُتّے سختی پر تیرے اُتّے مِہربانی خُدا دی۔ پئی جے تُوں اوہدی مِہربانی اُتّے ٹِکیا رہَیں۔ نئیں تے تُوں وی وَڈّھ سُٹّیا جائیں گا۔

²³ تے اوہ وی جے بے اِیمانی وِچ ٹِکے نا رہن۔ تے پَیوند کِیتے جان گے۔ کیوں جو خُدا قُدرت والا اے۔ پئی اوہناں نُوں وی مُڑ پَیوند کرے۔

²⁴ کیوں جو جے تُوں اوس رُکھّ نالوں جیہڑا اصلی جنگلی زَیتُون اے۔ وَڈّھیا گِیؤں۔ تے اصل دے برخلاف چنگے زَیتُون اُتّے پَیوند کِیتا گِیؤں۔ تے اوہ جیہڑیاں اصلی ٹہنِیاں نیں اپنے زَیتُون دے رُکھّ وِچ ضرُور ای پَیوند کِیتیاں جان گِیئاں۔

²⁵ بھراؤ کِتے اجیہا نا ہوئے پئی تُسی اپنے آپ نُوں سِیانے سمجھو۔ مَیں نئیں چاہندا۔ پئی تُسی ایس بھید توں ناواقِف رہو۔ پئی اِسرائیل دے اِک حِصّے اُتّے۔ جد تِیکر غیر قوماں دی بھرتی پُوری نا ہوئے۔ سخت دِلی آگئی اے۔

²⁶ تے ایسے طرح سارا اِسرائیل بچایا جاوے گا۔ جیویں لِکھیا ہویا اے۔ پئی صِیُّون توں اِک چھڈواؤن والا آوے گا۔ جیہڑا یعقُوب توں بے دِینیاں ہٹائے گا۔

²⁷ تے اوہناں دے نال میرا ایہو عہد اے۔ جِس ویلے مَیں اوہناں دے گُناہاں نُوں اُٹھا لواں۔

²⁸ اِنجِیل ولّوں اوہ تے تُہاڈے سبّب دُشمن نیں پر چُنن ولّوں وڈّیاں دے سبّب پیارے۔

²⁹ کیوں جو خُدا دِیاں نِعمتاں تے اوہدا بُلاوا مُڑن والیاں گلّاں نئیں۔

³⁰ کیوں جو جیویں تُسی کِسے ویلے خُدا نُوں نئیں سو مَن دے پر ایس ویلے ایہناں دے نا مَنّن دے سببّوں تُہاڈے اُتّے رَحم کِیتا گیا۔

³¹ ایسے طرح ہُن ایہہ وی مَنّن والے نا ہوئے تاں جو تُہاڈے اُتّے رَحم ہون دے سبّب ہُن اوہناں اُتّے وی رَحم کِیتا جائے۔

³² کیوں جو خُدا سبھناں نُوں نافرمانی وِچ شامل کِیتا۔ تاں جو ساریاں اُتّے رَحم کرے۔

خُدا دی حمد

³³ واہ خُدا دی بھرمار تے عقل تے سمجھ کیڈے ڈُونگھے نیں! اوہدیاں عدالتاں دی تھاہ کدوں مِلدی اے۔ تے اوہدیاں راہاں دا کھوج کدوں مِلدا اے۔

³⁴ کِس خُدا دے خیالاں نُوں جاچیا اے؟ یا کیہڑا اوہدا صلاح کار بنیا؟

³⁵ یا کِس اوہنوں پہلاں کُجھ دِتّا جِہدا مُڑ اوہنوں بدلا دِتّا جائے؟

³⁶ کیوں جو اوسے توں تے اوسے دی راہِیں تے اوسے لئی سارِیاں شیواں ہویاں نیں۔ اوہدی وڈیائی سدا تِیکر ہوئے۔ آمِین۔