رُومِیوں 10 - پنجابی نواں عہد نامہ نظرثانی شدہ چھپائی

¹ بھراؤ۔ میرے دِل دی چاہ تے خُدا اگّے میری دُعا اوہناں دے لئی ایہہ اے پئی اوہ نجات پان۔

² کیوں جو مَیں اوہناں دا گواہ آں پئی اوہناں نُوں خُدا دی بابت غیرت تے ہے۔ پر عِلم دے سببّوں نئیں۔

³ کیوں جو خُدا دی راستبازی توں نا واقف ہو کے تے اپنی ای راستبازی نُوں قیم کرن دے شَوق نال۔ اوہ خُدا دی راستبازی دے تابعیاں نا ہوئے۔

⁴ کیوں جو راستبازی لئی مسِیح ہر اِک اِیمان لیاؤن والے واسطے شریعت دا خاتمہ اے۔

نجات ساریاں لئی

⁵ کیوں جو مُوسیٰ لِکھدا اے۔ پئی جیہڑا جَنا اوس راستبازی نُوں جیہڑی شریعت توں ہوندی اے پُورا کرے اوہ اوہدے سبّب جِیوندا رہے گا۔

⁶ پر اوہ راستبازی جیہڑی اِیمان توں اے ایویں آکھدی اے۔ پئی تُوں اپنے دِل وِچ نا آکھ پئی اسمان اُتّے کون چڑھے گا؟ (ایس لئی پئی مسِیح نُوں ہیٹھاں اُتارے۔)

⁷ یا اتھاہ کھڈے وِچ کون اُترے گا۔ (ایس لئی پئی مسِیح نُوں مُردیاں وِچوں جوال کے اُتانہہ چڑھائے)

⁸ فیر اوہ کِیہ آکھدی اے؟ ایہہ پئی ”کلام تیرے نیڑے اے۔ تیرے مُنھ تے تیرے دِل وِچ اے۔“ ایہہ اوہ اِیمان دا کلام اے۔ جِہدی اسی منادی کرنے آں۔

⁹ کیوں جو جے تُوں اپنے مُنھوں یِسُوع دے خُداوند ہون دا اِقرار کریں تے اپنے دِل وِچ اِیمان لِیاویں پئی خُدا نے اوہنوں مُردیاں وِچوں جوالیا۔ تے تُوں بچایا جائیں گا۔

¹⁰ کیوں جو راستبازی لئی دِلوں اِیمان لیاوی دا اے۔ تے نجات لئی مُنھ توں اِقرار کری دا اے۔

¹¹ کیوں جو پاک کلام آکھدا اے پئی ”ہر کوئی جیہڑا اوہدے اُتّے اِیمان لیاؤندا اے۔ شرمندہ نئیں کِیتا جائے گا۔“

¹² کیوں جو یہُودی تے یُونانی وِچ کُجھ فرق نئیں اے۔ ایس لئی پئی سبھناں دا اوہی خُدا اے۔ جیہڑا اپنے سوالِیاں دے لئی دَھنّی اے

¹³ کیوں جو ہر کوئی جیہڑا خُداوند دا ناں لَئے گا۔ بچایا جاوے گا۔

¹⁴ فیر جِہدے اُتّے اِیمان نئیں لیائے۔ اوہ اوہدا ناں کِیویں لین گے؟ تے جِہدی بابت اوہناں سُنیا ای نئیں۔ اوہدے اُتّے کِیویں اِیمان لیاؤن؟ تے منادی کرن والے باہجوں کِیویں سُنن۔

¹⁵ تے جے گھلّے نا جان اوہ منادی کِیویں کرن؟ جیویں لِکھیا ہویا اے کہے سوہنے اوہناں دے قدم جیہڑے چَنگیاں گلّاں دی خُوشخبری سُنان والے نیں۔

¹⁶ پر سبھناں خُوشخبری نُوں نئیں مَنّیا۔ یسعیاہ جو آکھدا اے خُداوند ساڈے سنیہے دا کِس یقِین کِیتا؟

¹⁷ سو اِیمان سُنن توں۔ تے سُننا مسِیح دے کلام دی راہِیں آؤندا اے۔

¹⁸ پر مَیں آکھنا آں کِیہ اوہناں نئیں سُنیا؟ بے شک اوہناں دی اواز ساری دھرتی اُتّے نِکل ٹُری تے اوہناں دا کلام دُنیا دِیاں حداں تِیکر۔

¹⁹ فیر مَیں آکھنا آں۔ اِسرائیل نُوں معلُوم نا ہویا؟ اوّل تے مُوسیٰ آکھدا اے پئی مَیں تُہانوں اوہناں توں جیہڑے قوم نئیں غیرت دواں گا۔ تے نادان قوم توں تُہانوں غُصّہ چڑھاواں گا۔

²⁰ فیر یسعیاہ بڑا دلیر ہو کے بولدا اے۔ پئی جِنہاں مَینُوں نا لَبّھیا اوہناں مَینُوں لَبّھ لیا تے جِنہاں مَینُوں نا پُچھیا اوہناں اُتّے مَیں ظاہر ہویا۔

²¹ پر اِسرائیل نُوں آکھدا اے۔ پئی نافرمان تے حُجتّی قوم دے ولّ مَیں سارا دِن اپنے ہتّھ وَدھائے رہیا۔