رُومِیوں 1 - پنجابی نواں عہد نامہ نظرثانی شدہ چھپائی

¹ پَولُس ولّوں جیہڑا یِسُوع مسِیح دا غلام سدّیا ہویا رسُول تے خُدا دی خُوشخبری لئی وَکھ کِیتا گیا۔

² جِہدا اوس اگّے توں اپنے نبیاں دی راہِیں پاک کتاب وِچ۔

³ اپنے پُتر ساڈے خُداوند یِسُوع مسِیح دی بابت وعدہ کِیتا سی جیہڑا جِسم ولّوں تے داؤد دی نسلوں پَیدا ہویا۔

⁴ پر پاکیزگی دی رُوح ولّوں مُردیاں وِچوں جی اُٹھن دے سبّب قُدرت نال خُدا دا پُتر ثابت ہویا۔

⁵ جِہدی راہِیں سانُوں فضل تے رسالت مِلی۔ تاں جو اوہدے ناں واسطے سارِیاں قوماں وِچوں لوک اِیمان دے تابعیاں ہون۔

⁶ اوہناں قوماں وِچوں تُسی وی یِسُوع مسِیح دے ہون لئی سَدّے گئے ہو۔

⁷ اوہناں ساریاں دے ناں جیہڑے رُومہ وِچ خُدا دے پیارے پاک ہون لئی سَدّے گئے نیں۔ ساڈے باپ خُدا تے خُداوند یِسُوع مسِیح ولّوں تُہانوں فضل تے سلامتی مِلدی رئے۔

شُکر گُزاری دی دُعا

⁸ پہلاں تے مَیں یِسُوع مسِیح دی راہِیں تُہاڈے سبھناں لئی اپنے خُدا دا شُکر کرنا آں۔ پئی تُہاڈے اِیمان دی مشہُوری سارے جہان وِچ ہوندی اے۔

⁹ تے خُدا جِہدی بندگی مَیں اپنی رُوح نال اوہدے پُتر دی خُوشخبری سُنان وِچ کرنا آں۔ میرا گواہ اے پئی کِس طرح ہرویلے تُہانوں یاد رکھنا آں۔

¹⁰ تے سدا اپنی دُعاواں وِچ درخواست کر دا رہناں آں پئی کِسے طرح جے خُدا چاہے مَیں کِیویں نا کِیویں خَیر نال ہُن وی تُہاڈے کول اَپڑ جاواں۔

¹¹ کیوں جو مَینُوں تُہاڈے ویکھن دا بُہت ای شَوق اے۔ پئی کوئی رُوحانی بخشِش تُہانوں پُچاواں۔ جِہدے نال تُسی تگڑے ہو جاؤ۔

¹² سو مَینُوں وی تُہاڈے وِچ ہو کے تُہاڈے نال اوس اِیمان دے سببّوں تسلّی مِلے۔ جیہڑا میرے تے تُہاڈے دوہاں وِچ اے۔

¹³ بھراؤ مَیں نئیں چاہندا۔ پئی تُسی ایس گلّوں بے خبر رہو۔ پئی مَیں کئی وار تُہاڈے کول آؤن دا اِرادہ کِیتا۔ پئی جیویں مَینُوں ہورناں غیر قوماں وِچ پَھل مِلیا اے۔ اوسے طرح تُہاڈے وِچ وی مِلے۔ پر اَج تِیکر رُکیا رہیا۔

¹⁴ مَیں یُونانِیاں تے غیر یُونانِیاں۔ داناواں تے ناداناں دا قرضئی آں۔

¹⁵ سو مَیں اپنی طاقت دے سببّوں تُہانوں وی جیہڑے رُومہ وِچ اوہ۔ خُوشخبری سُنان نُوں تیار آں۔

اِنجِیل دی قُدرت

¹⁶ کیوں جو مَیں اِنجِیل توں شرماں دا نئیں۔ ایس کر کے پئی اوہ ہر اِک دی نجات دے لئی۔ جیہڑا اِیمان لیاؤندا اے۔ پہلاں یہُودی تے فیر یُونانی دے لئی خُدا دی قُدرت اے۔

¹⁷ ایس لئی پئی خُدا دی راستبازی اِیمان توں تے اِیمان لئی اوہدے وِچ ظاہر ہوندی اے۔ جیویں لِکھیا ہویا اے۔ پئی راستباز اِیمان توں جیوے گا۔

اِنسان دی خطاکاری

¹⁸ کیوں جو خُدا دا غضب اوہناں بندیاں دی ساری بے دِینی تے ناراستی اُتّے اسمان توں ظاہر ہوندا اے۔ جیہڑے سچیائی نُوں ناراستی نال دباندے نیں۔

¹⁹ کیوں جو خُدا دی بابت جو کُجھ معلُوم ہوسکدا اے۔ اوہناں دے دِل وِچ ظاہر اے۔ کیوں جو خُدا اوہناں اُتّے اوہنوں ظاہر کر دِتّا۔

²⁰ کیوں جو دُنیا دی پَیدایش دے ویلیوں اوہدیاں صِفتاں جیہڑیاں دیکھیاں نئیں جاندِیاں یعنی اوہدی مُڈھ قدِیم دی قُدرت تے خُدائی۔ اوہدی بنائِیاں ہویاں شیواں دی راہِیں صاف ظاہر ہوندیاں نیں۔ ایتھوں توڑی پئی ایہہ بے عُذر نیں۔

²¹ کیوں جو اوہناں بھانویں خُدا نُوں پچھانیاں تے وی اوہدی خُدائی دے لائق اوہدی وڈیائی نا کِیتی۔ تے نا اوہدا شُکر کِیتا۔ سگوں اپنے بَھرماں وِچ نکمّے ہوگئے۔ نالے اوہناں دے بے سمجھ دِل ہنیرے ہوگئے۔

²² اوہ اپنے آپ نُوں عقل والے آکھ کے مُورکھ بن گئے۔

²³ تے نا فنا ہون والے خُدا دے جلال نُوں فانی بندیاں تے پکھیرُواں تے چَوپایاں تے کِیڑے مکوڑیاں دی صُورت بنا دِتّی۔

²⁴ ایس لئی خُدا اوہناں دے دِلاں دِیاں خواہشاں دے سببّوں اوہناں نُوں پلِیتی وِچ چھڈ دِتّا پئی اپنے بدناں نُوں آپو وِچ بے عِزّت کرن۔

²⁵ سو اوہناں خُدا دی سچیائی نُوں وَٹا کے جُھوٹھ بنا دِتّا۔ تے خلقت دی بندگی تے سیوا خالق نالوں وَدّھ کے کِیتی۔ جیہڑا سدا تِیکر مُبارک اے آمِین۔

²⁶ ایسے سببّوں خُدا نے اوہناں نُوں گندِیاں بَھیڑیاں خواہشاں وِچ چھڈ دِتّا پئی اوہناں دِیاں زنانِیاں اپنے اصلی کمّ نُوں چھڈ کے اوہ کمّ شُروع کِیتے جیہڑے قُدرت دے خلاف نیں۔

²⁷ تے ایسے طرح بندے وی زنانِیاں نال اصلی کمّ چھڈ کے لُچ پُنے نال آپو وِچ مست ہوگئے۔ مرد نے مرد نال بے شرمی دے کمّ کِیتے۔ تے اپنی بدراہی دے لائق اپنے وِچ بدلہ پایا۔

²⁸ تے جدوں خُدا نُوں اپنی پِچھّاں وِچ رکھناں اوہناں نُوں چَنگا نا لگّا تَد خُدا وی اوہناں نُوں بیواقوفی وِچ چھڈ دِتّا۔ پئی نالائق کمّ کرن۔

²⁹ اوہ ساری بے انصافی۔ بُریائی۔ حرص۔ وَیر نال بھر گئے۔ تے ساڑے۔ خُون۔ جھگڑے۔ دغے تے دُشمنی نال بھرے ہوئے چُغلی کرن والے۔

³⁰ بُرا آکھن والے۔ خُدا اگّے نفرتی۔ طعنے مارن والے گُھمنّڈی۔ گپّی۔ بدیاں دے بانی۔ ماپیاں دا آکھا نا مَنّن والے۔

³¹ ناسمجھ۔ اِقراراں دے جُھوٹھے۔ بے دَرد۔ بے رَحم ہوئے۔

³² اوہ بھانویں خُدا دا حُکم جان دے نیں۔ پئی اجیہے کمّ کرن والے مَوت دے لائق نیں فیر وی نِرے اوہ آپ ای ایہہ کمّ نئیں کر دے پر کرن والیاں نال راضی وی ہوندے نیں۔