مُکاشفہ 4 - پنجابی نواں عہد نامہ نظرثانی شدہ چھپائی

اسمان تے حمد و ثنا

¹ ایہناں گلّاں دے پِچّھوں مَیں دھیان کِیتا۔ تے کِیہ ویکھنا آں پئی اسمان وِچ اِک بُوہا کُھلیا ہویا اے۔ تے جِہنُوں مَیں پہلاں تُرہی دی اواز وانگر اپنے نال گلّاں کر دیاں سُنیا سی اوہ ای آکھدا اے پئی ایتھے اُتّے آجا مَیں تینُوں اوہ گلّاں وکھاواں گا جیہڑیاں ایہناں گلّاں دے پِچّھوں ضرُور ہون گِیاں۔

² جھٹ پَٹ مَیں رُوح وِچ آگیا تے کِیہ ویکھنا آں پئی اسمان دے وِچ اِک تخت ڈَٹّھا ہویا اے۔ تے اوس تخت اُتّے کوئی بَیٹھا ہویا اے۔

³ تے جیہڑا اوہدے اُتّے بَیٹھا ہویا اے اوہ یشب تے عقِیق پتّھر وانگر معلُوم ہوندا اے۔ تے اوس تخت دے آلے دوالے زمُرّد وانگر اِک اسمانی پینگھ معلُوم ہوندی اے۔

⁴ تے اوس تخت دے آلے دوالے چوّی تخت تے اوہناں تختاں اُتّے چوّی بزُرگ چِٹّے کپڑے پا کے بَیٹھے ہوئے نیں۔ تے اوہناں دے سِراں اُتّے سونے دے تاج نیں۔

⁵ تے اوس تخت وِچوں چمکن تے کڑکن والے بدّل تے اَوازاں پئیاں نِکلدیاں نیں۔ تے اوس تخت دے سامھنے اَگ دِیاں سَتّ بتیاں پئیاں بلدیاں نیں ایہہ خُدا دِیاں سَتّ رُوحاں نیں۔

⁶ تے اوس تخت دے سامھنے شیشے دا سمُندر بلّور وانگر اے۔ تے تخت وِچ تے آلے دوالے چار جاندار نیں جِنہاں دِیاں اگّے پِچّھے اَکھّیاں نیں۔

⁷ پہلا جاندار شیر وانگر اے تے دُوجا جاندار وَچّھے وانگر تے ترِیجے جاندار دا مُنھ بندے وانگر اے تے چوتھا جاندار اُڈ دے ہوئے عُقاب وانگر اے۔

⁸ ایہناں چَوہاں جانداراں دے چھ چھ پَر تے چَونہہ پاسے تے اندر اَکھّیاں ای اَکھّیاں نیں۔ تے دِنے راتِیں آرام نئیں کر دے۔ تے ایہو آکھدے رہندے نیں۔ پئی قُدُّوس قُدُّوس قُدُّوس خُداوند خُدا قادرِ مُطلق جیہڑا ہے سی تے جیہڑا ہے تے جیہڑا آؤن والا اے۔

⁹ تے جد اوہ جاندار اوہدی وڈیائی تے عِزّت تے شُکر گُزاری کرن گے جیہڑا تخت اُتّے بَیٹھا اے تے ہمیشہ تِیکر زِندہ رہے گا۔

¹⁰ تے اوہ چوّی بزُرگ اوہدے سامھنے جیہڑا تخت اُتّے بَیٹھا ہویا اے ڈِگّ پَین گے تے اوہنوں سجدہ کرن گے جیہڑا ہمیشہ تِیکر زِندہ رہے گا۔ تے اپنے تاج ایہہ آکھ کے اوس تخت دے سامھنے دھر دین گے۔ پئی۔

¹¹ اَے ساڈے خُداوند تے خُدا تُوہی وڈیائی تے عِزّت تے قُدرت دے لائق ایں۔ کیوں جو تُوہی سارِیاں شیواں پَیدا کِیتیاں تے اوہ تیری ای مرضی نال سن تے پَیدا ہویاں۔