مُکاشفہ 22 - پنجابی نواں عہد نامہ نظرثانی شدہ چھپائی

¹ فیر اوس مَینُوں بلّور وانگر چمکدا ہویا حیاتی دے پانی دا اِک دریا وکھایا جیہڑا خُدا تے لیلے دے تخت وِچوں نِکل کے اوس شہر دی سڑک دے وِچ پیا وگدا سی۔

² تے دریا دے پرلے وار حیاتی دا بُوٹا سی۔ اوہنوں باراں قِسماں دے پَھل لگدے سن تے ہر مہینے پَھلدا سی۔ تے اوس بُوٹے دے پَتّراں توں قوماں نُوں شفا مِلدی سی۔

³ تے فیر لعنت نا ہوئے گی تے خُدا تے لیلے دا تخت اوس شہر وِچ ہوئے گا۔ تے اوہدے بندے اوہدی بندگی کرن گے۔

⁴ تے اوہ اوہدا مُنھ ویکھن گے تے اوہدا ناں اوہناں دیاں متّھیاں اُتّے لِکھیا ہویا ہوئے گا۔

⁵ تے فیر رات نا ہوئے گی۔ تے اوہناں نُوں دِیوے تے سُورج دی روشنی دی لوڑ نئیں ہوئے گی۔ کیوں جو خُداوند خُدا اوہناں نُوں روشن کرے گا۔ تے اوہ ہمیشہ تِیکر بادشاہی کرن گے۔

یِسُوع مسِیح دی دُوجی آمد

⁶ فیر اوس مَینُوں آکھیا پئی ایہہ گلّاں سَچ تے برحق نیں تے خُداوند نے جیہڑا نبیاں دِیاں رُوحاں دا خُدا اے اپنے فرِشتے نُوں ایس لئی گھلّیا پئی اپنیاں بندیاں نُوں اوہ گلّاں وکھائے جیہڑیاں ضرُور چھیتی ہونیاں نیں۔

⁷ تے ویکھ مَیں چھیتی آؤن والا آں۔ مُبارک اوہ اے جیہڑا ایس کتاب دی نبُوّت دِیاں گلّاں اُتّے عمل کر دا اے۔

⁸ مَیں اوہ ای یُوحنّا آں جیہڑا ایہناں گلّاں نُوں سُندا تے ویکھدا ساں۔ تے جد مَیں سُنیاں تے ویکھیاں تَد جیہڑے فرِشتے مَینُوں ایہہ گلّاں وکھائیاں مَیں اوہدیاں پیراں اُتّے سجدہ کرن لئی ڈِگّ پیا۔

⁹ اوس مَینُوں آکھیا خبردار ایہہ نا کر مَیں تیرے نال دا تے تیرے بھراواں نبیاں دے نال دا تے ایس کتاب دِیاں گلّاں اُتّے عمل کرن والیاں دے نال دا بندہ آں۔ خُدا نُوں ای سجدہ کر۔

¹⁰ فیر اوس مَینُوں آکھیا ایس کتاب دی نبُوّت دِیاں گلّاں اُتّے مُہر نا لا۔ کیوں جو ویلا نیڑے آگیا اے۔

¹¹ جیہڑا بُرائی کر دا اے۔ بُرائی ای کر دا رہے۔ تے جیہڑا پلِیت اے پلِیت ای روے۔ تے جیہڑا راستباز اے اوہ راستبازی ای کر دا رہے تے جیہڑا پاک اے۔ پاک ای ہوندا رہے۔

¹² ویکھ مَیں چھیتی آؤن والا آں تے ہر اِک دے کمّاں دے سببّوں بدلہ دینا میرے کول اے۔

¹³ مَیں الفا تے اومیگا اوّل تے اخِیر۔ شُروع تے چھیکڑ آں۔

¹⁴ مُبارک نیں اوہ جیہڑے اپنے کپڑے دھوندے نیں۔ کیوں جو زِندگی دے بُوٹے کول آؤن دا اختیار پان گے تے اوہناں پھاٹکاں توں شہر وِچ داخل ہون گے۔

¹⁵ پر کُتّے تے جادُوگر تے حرامکار تے خُونی تے بُت پرست تے جُھوٹھی گلّ دا ہر اِک پسند کرن تے گھڑن والا باہر رہوے گا۔

¹⁶ مَیں یِسُوع اپنا فرِشتہ ایس لئی گھلّیا۔ پئی کلِیسیاواں دی بابت تُہاڈے اگّے ایہناں گلّاں دی گواہی دے۔ مَیں داؤد دی اصل تے نسل تے صُبح دا چمکدا ہویا تارا ہاں۔

¹⁷ رُوح تے وَوہٹی آکھدے نیں پئی آ تے سُنن والا وی آکھے آ تے جیہڑا تریہایا اے آوے تے جیہڑا چاہے حیاتی دا پانی مُفت لے لَئے۔

اخِیر

¹⁸ مَیں ہر اِک بندے اگّے جیہڑا ایس کتاب دی نبُوّت دِیاں گلّاں سُندا اے گواہی دینا آں۔ پئی جے کوئی بندہ ایہناں وِچ کُجھ وَدھائے تے خُدا ایس کتاب وِچ لِکھیاں ہوئیاں آفتاں اوہدے اُتّے وَدھائے گا۔

¹⁹ تے جے کوئی ایس کتاب دی نبُوّت دِیاں گلّاں وِچوں کُجھ کڈھے تے خُدا اوس زِندگی دے بُوٹے تے پاک شہر وِچوں جِنہاں دا ایس کتاب وِچ ذِکر ہویا اے اوہدا حِصّہ کڈھ چھڈے گا۔

²⁰ جیہڑا ایہناں گلّاں دی گواہی دیندا اے۔ اوہ ایہہ آکھدا اے۔ پئی بے شک مَیں چھیتی آؤن والا آں۔ آمِین اَے خُداوند یِسُوع آ۔

²¹ خُداوند یِسُوع دا فضل پاک لوکاں دے نال رہے۔ آمِین۔