مُکاشفہ 2 - پنجابی نواں عہد نامہ نظرثانی شدہ چھپائی

اِفِسُس دی کلِیسیا نُوں سینہا

¹ اِفِسُس دی کلِیسیا دے فرِشتے نُوں ایہہ لِکھ۔ پئی جِس اپنے سَجّے ہتّھ وِچ سَتّ تارے لَئے ہوئے نیں تے سونے دِیاں ستّاں دِیویاں وِچ پِھردا اے۔ اوہ ایہہ آکھدا اے پئی۔

² مَیں تیرے کمّ تے تیری محنت تے تیرے صبر نُوں تے جاننا آں تے ایہہ وی پئی تُوں بُریاں نُوں ویکھ نئیں سکدا۔ تے جیہڑے اپنے آپ نُوں رسُول آکھدے نیں تے ہَین نئیں۔ تُوں اوہناں نُوں ازما کے جُھوٹھیاں ویکھیا۔

³ تے تُوں صبر کرنا ایں تے میرے ناں دی خاطر مُصِیبت سہہ سہہ کے تھکیا نئیں۔

⁴ پر مَینُوں تیرے اُتّے ایہہ شکایت اے۔ پئی تُوں اپنی پہلی مُحبّت نُوں چھڈ دِتّا۔

⁵ ایس لئی تُوں چیتا کر پئی تُوں کِتّھوں ڈِگّا ایں۔ تے تَوبہ کر کے پہلے وانگر کمّ کر۔ تے جے تُوں تَوبہ نا کریں گا۔ تے تیرے کول مَیں آ کے تیرا دِیوا اوہدی تھاں توں ہٹا دیاں گا۔

⁶ بے شک تیرے وِچ ایہہ گلّ تے اے۔ پئی تُوں نِیکُلیوں دے کمّاں توں نفرت کرنا ایں جِنہاں توں مَیں وی نفرت کرنا آں۔

⁷ جِہدے کنّ ہون اوہ سُن لَئے۔ پئی رُوح کلِیسیاواں نُوں کِیہ آکھدا اے۔ جیہڑا جِتّے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔

سمُرنہ دی کلِیسیا نُوں سینہا

⁸ تے سمُرنہ دی کلِیسیا دے فرِشتے نُوں ایہہ لِکھ پئی جیہڑا شُروع تے اخِیر اے تے جیہڑا مر گیا سی تے جِیوپیا۔ اوہ ایہہ آکھدا اے۔

⁹ پئی مَیں تیری مُصِیبت تے غرِیبی نُوں جاننا آں (پر تُوں دَولتمند ایں) تے جیہڑے اپنے آپ نُوں یہُودی آکھدے نیں تے اوہ ہَین نئیں سگوں شیطان دی جماعت نیں اوہناں دِیاں طعنیاں مہِنیاں نُوں وی جاننا آں۔

¹⁰ جیہڑے دُکھ تینُوں جَھلّنے پَین گے۔ اوہناں توں نا ڈر۔ ویکھو ابلیس تُہاڈے وِچوں کُجھ نُوں قید وِچ پان نُوں تیار اے۔ پئی تُسی ازمائے جاؤ تے دَس دِناں تِیکر مُصِیبت پاؤ گے۔ جان دین تِیکر وی وفادار رہو تے مَیں تینُوں زِندگی دا تاج دیاں گا۔

¹¹ جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جِتّے اوہنوں دُوجی مَوت توں نُقصان نا پہنچے گا۔

پرگُمن دی کلِیسیا نُوں سینہا

¹² تے پرگُمن دی کلِیسیا دے فرِشتے نُوں ایہہ لِکھ پئی جِہدے کول دو مُونہی تِکھی تلوار اے اوہ ایہہ آکھدا اے پئی۔

¹³ مَیں ایہہ تے جاننا آں پئی تُوں شیطان دے تخت دے تھاں وِچ رہنا ایں۔ تے میرے ناں اُتّے قیم رہنا ایں۔ تے جِنہاں دِناں وِچ میرا وفادار گواہ اِنتپاس تُہاڈے وِچ اوس تھاں قتل ہویا سی جِتّھے شیطان رہندا اے اوہناں دِناں وِچ وی تُوں میرے اُتّے اِیمان رکھن توں اِنکار نا کِیتا۔

¹⁴ پر مَینُوں کُجھ گلّاں دی تیرے اُتّے شکایت اے ایس لئی پئی تیرے اوتھے کُجھ لوک بِلعام دی تعلِیم مَنّن والے نیں جِس بلق نُوں بنی اِسرائیل اگّے ٹھوکر رکھن دی تعلِیم دِتّی یعنی ایہہ پئی اوہ بُتاں دِیاں قُربانِیاں کھان تے حرامکاری کرن۔

¹⁵ اِنجے ایتھے وی تیرے کُجھ لوک ایسے طرح نِیکُلیوں دی تعلِیم نُوں مَن دے نیں۔

¹⁶ تَد تَوبہ کر نئیں تے مَیں تیرے کول چھیتی آ کے اپنے مُنھ دی تلوار نال اوہناں دے نال لڑاں گا۔

¹⁷ جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جِتّے مَیں اوہنوں لُکے ہوئے مَن وِچوں دیاں گا۔ تے اِک چِٹّا پتّھر دیاں گا اوس پتّھر اُتّے اِک نواں ناں لِکھیا ہویا ہوئے گا جِہنُوں اوہدے لین والے دے سِوا کوئی نا جانے گا۔

تھواتِیرہ دی کلِیسیا نُوں سینہا

¹⁸ تے تھواتِیرہ دی کلِیسیا دے فرِشتے نُوں ایہہ لِکھ پئی۔ خُدا دا پُتر جِہدِیاں اَکھّیاں اَگ دی لاٹ وانگر تے پَیر خالص پِتّل وانگر نیں ایہہ آکھدا اے پئی۔

¹⁹ مَیں تیرے کمّاں تے مُحبّت تے اِیمان تے خِدمت تے صبر نُوں تے جاننا آں۔ تے ایہہ وی پئی تیرے پِچّھلے کمّ پہلے کمّاں نالوں وَدّھ نیں۔

²⁰ پر مَینُوں تیرے اُتّے ایہہ شکایت اے۔ پئی تُوں اوس عورت اِیزبِل نُوں رہن دِتّا اے۔ جیہڑی اپنے آپ نُوں نَبِیہ آکھدی اے۔ تے میرے بندیاں نُوں حرامکاری کرن تے بُتاں دِیاں قُربانِیاں کھان دی تعلِیم دے کے بد راہ کر دی اے۔

²¹ تے مَیں اوہنوں تَوبہ کرن دی مُہلت دِتّی پر اوہ اپنی حرامکاری توں تَوبہ نئیں کرنا چاہندی۔

²² ویکھ مَیں اوہنوں مَنجی اُتّے سُٹّناں آں۔ تے جیہڑے اوہدے نال زنا کر دے نیں جے اوہدے جِہے کمّاں توں تَوبہ نا کرن۔ تے اوہناں نُوں بڑی مُصِیبت وِچ سُٹّناں آں۔

²³ تے اوہدے پُتراں نُوں جانوں ماراں گا۔ تے سارِیاں کلِیسیاواں نُوں پتا لگّے گا۔ پئی گُردیاں تے دِلاں دا جانن والا مَیں آں۔ تے مَیں تُہاڈے وِچوں ہر اِک نُوں اوہدیاں کمّاں دے سببّوں بدلہ دیاں گا۔

²⁴ پر تُہانوں تھواتِیرہ دے لوکاں نُوں جیہڑے اوس تعلِیم نُوں نئیں مَن دے تے اوہناں گلّاں توں جِنہاں نُوں لوک شیطان دِیاں ڈونگھیاں گلّاں آکھدے نیں ناواقِف ہو۔ ایہہ آکھنا آں۔ پئی تُہاڈے اُتّے ہور بھار نا پاواں گا۔

²⁵ بے شک جو کُجھ تُہاڈے کول اے۔ میرے آؤن تِیکر گُھٹ کے پَھڑی رکھو۔

²⁶ جیہڑا جِتّے تے جیہڑا میرے کمّاں دے سببّوں اخِیر تِیکر عمل کرے مَیں اوہنوں قوماں اُتّے اختیار دیاں گا۔

²⁷ تے اوہ لوہے دے ڈنڈے نال اوہناں اُتّے حکُومت کرے گا۔ جیویں گھمیار دے بھانڈے ٹُٹ پُھٹ جاندے نیں۔ ایسے طرح مَیں وی اجیہا اختیار اپنے باپ کولوں لیا اے۔

²⁸ تے مَیں اوہنوں سویر دا تارا دیاں گا۔

²⁹ جِہدے کنّ ہَین اوہ سُنے پئی رُوح کلِیسیاواں نُوں کِیہ آکھدا اے۔