مرقس 3 - پنجابی نواں عہد نامہ نظرثانی شدہ چھپائی

سُکّے ہتّھ والا بندہ

¹ تے اوہ عبادت خانے وِچ فیر گیا۔ تے اوتھے اِک بندہ سی جِہدا ہتّھ سُکّا ہو یا سی۔

² تے اوہ اوہدی تاک وِچ لگّے ہوئے سن۔ پئی جیکر اوہ سبت دے دِن اوہنوں ولّ کرے تے اسی اوہدے اُتّے نالش کریئے۔

³ تے اوہنے اوس بندے نُوں جِہدا ہتّھ سُکّا ہویا سی آکھیا۔ پئی وِچکار کھلو جا۔

⁴ تَد اوس اوہناں نُوں آکھیا۔ سبت دے دِن بھلے کمّ کرنے روا نیں یا بُرے کمّ؟ جان بچانی یا جان مارنی؟ پر اوہ چُپ ای رہے

⁵ تَد اوس اوہناں دی سخت دِلی دے سبّب اُداس ہو کے غُصّے دی نظر نال اوہناں ولّ ویکھیا تے اوس بندے نُوں آکھیا اپنا ہتّھ وَدّھا۔ تے اوس وَدھایا تے اوہدا ہتّھ ٹھیک ہوگیا۔

⁶ تَد فرِیسیاں باہر جا کے اوسے ویلے ہیرودیاں نال اوہدے برخلاف صلاح کِیتی پئی کِیویں اوہنوں مار سُٹّیئے۔

سمُندر دے کنڈھے بِھیڑ

⁷ تے یِسُوع اپنے شاگِرداں سَنے سمُندر ولّ ٹُر گیا تے گلِیل توں بڑی خلقت مگر ٹُر پئی۔

⁸ تے یہُودیہ تے یرُوشلِیم تے اِدومَیہ تے یَردن دے پاروں تے صُور تے صَیدا دے آلے دَوالیوں وی اِک وڈّی بِھیڑ ایہہ خبر سُن کے پئی اوہ کیڈے وڈّے کمّ کر دا اے اوہدے کول آئی۔

⁹ تے اوس اپنے شاگِرداں نُوں آکھیا پئی بِھیڑ دے سبّب اِک بیڑی میرے لئی تیار رہے پئی لوک مَینُوں تنگ نا کرن۔

¹⁰ کیوں جو اوس بتھیریاں نُوں ولّ کِیتا سی۔ ایتھوں تِیکر پئی جیہڑے لوک سخت بیمار سن اوہنوں چُھون لئی اوہدے اُتّے ڈِگّدے جاندے سن۔

¹¹ تے پلِیت رُوحاں جد اوہنوں ویکھدِیاں سن اوہدے اگّے ڈِگّ پَیندیاں سن تے چِیکاں مار کے آکھدیاں سن۔ تُوں خُدا دا پُتر ایں۔

¹² تے اوس اوہناں نُوں بڑی تاکِید کِیتی پئی مَینُوں مشہُور نا کرو۔

یِسُوع باراں رسُولاں نُوں چُن دا اے

¹³ فیر اوس اِک پہاڑ اُتّے چڑھ کے جِنہاں نُوں آپ چاہندا سی اوہناں نُوں کول سدّیا۔ تے اوہ اوہدے کول گئے۔

¹⁴ تے اوس باراں نُوں مُقرّر کِیتا پئی اوہدے نال رہن۔ تے اوہ اوہناں نُوں گھلّے۔ پئی منادی کرن۔

¹⁵ تے نالے بدرُوحاں نُوں کڈھن دی قُدرت رکھن۔

¹⁶ تے اوس شمعُون دا ناں پطرس وی رکھیا۔

¹⁷ تے زبدی دا پُتر یعقُوب تے یعقُوب دا بھرا یُوحنّا۔ جِنہاں دوآں دا ناں بُوانِرگِس یعنی گرج دے پُتر رکھیا۔

¹⁸ تے اندریاس تے فِلپُّس۔ تے برتُلمائی تے متّی۔ تے تُوما تے حلفئی دا پُتر یعقُوب تے تدّی۔ تے شمعُون قنانی۔

¹⁹ تے یہُوداہ اِسکریُوتی جِس اوہنوں پھڑوا وی دِتّا۔ تے اوہ گھر آیا۔

یِسُوع تے بَعلزبُول

²⁰ تے اینی بِھیڑ فیر اکٹّھی ہوئی پئی اوہ روٹی وی نا کھا سکے۔

²¹ جد اوہدے سَنگیاں ایہہ حال سُنیا تَد اوہنوں قابُو کرن لئی نِکلے۔ کیوں جو اوہناں آکھیا پئی اوہ سَودائی اے۔

²² تے فقِیہ جیہڑے یرُوشلِیم توں آئے سن آکھن لگّے پئی اوہ بَعلزبُول نال مِلیا ہویا اے۔ تے بدرُوحاں دے سردار دی مدد نال بدرُوحاں نُوں کڈھدا اے۔

²³ اوس اوہناں نُوں کول سَدّ کے تمثِیلاں وِچ آکھیا پئی شیطان شیطان نُوں کِیویں کڈھ سکدا اے؟

²⁴ تے جیکر کِسے راج وِچ پُھٹ پَے جاوے۔ تے اوہ راج قیم نئیں رہ سکدا۔

²⁵ تے جے کِسے گھر وِچ پُھٹ پَے جاوے تے اوہ گھر قیم نا رہ سکے گا۔

²⁶ تے جے شیطان اپنے ای مُقابلے اُتّے اُٹھ کھلووے۔ تے اوہدے وِچ پُھٹ پَے جاوے تے اوہ قیم نئیں رہ سکدا۔ سگوں اوہدا اوڑک ہوندا اے۔

²⁷ پر زوراور بندے دے گھر وِچ کوئی اوہدا اسباب لُٹّن لئی وڑ نئیں سکدا۔ جد تِیکر پہلاں اوس زوراور نُوں بَنّھ نا لَوے۔ تَد ای اوہ اوہدا گھر لُٹّے گا۔

²⁸ مَیں تُہانوں سَچ آکھنا آں پئی بنی آدم دے سارے گُناہ تے کُفر جِنّے اوہ بکن گے۔ مُعاف کِیتے جان گے۔

²⁹ پر اوہ جیہڑا پاک رُوح دے حق وِچ کُفر بولے۔ اوہنوں کدی وی مُعافی نئیں مِلدی۔ سگوں ہمیشہ دے گُناہ دا مُجرم اے۔

³⁰ کیوں جو اوہناں آکھیا سی پئی پلِیت رُوح اوہدے وِچ اے۔

یِسُوع دی ماں تے بھرا

³¹ تے اوہدی ماں تے اوہدے بھرا آئے تے باہر کھلو کے اوس نُوں سدّیا۔

³² تے بِھیڑ اوہدے چَوفیرے بَیٹھی ہوئی سی۔ تے لوک اوہنوں آکھن لگّے پئی ویکھ۔ تیری ماں تے تیرے بھرا باہر تینُوں مِلنا چاہندے نیں۔

³³ اوس اوہناں نُوں جواب دے کے آکھیا۔ کون اے میری ماں تے میرے بھرا؟

³⁴ تے اوہناں ولّ جیہڑے اوہدے آلے دوالے بَیٹھے ہوئے سن نِگاہ کر کے اوس آکھیا۔ ویکھو۔ میری ماں تے میرے بھرا ایہہ نیں۔

³⁵ کیوں جو جیہڑا کوئی خُدا دی مرضی اُتّے چلّے اوہ ای میرا بھرا تے بھین تے ماں اے۔