مرقس 16 - پنجابی نواں عہد نامہ نظرثانی شدہ چھپائی

مسِیح دا مُردیاں وِچوں جی اُٹھنا

¹ تے جد سبت دا دِن گُذر گیا۔ تے مریم مگدلِینی تے یعقُوب دی ماں مریم تے سلومی نے خوشبو والِیاں شیواں مُل لیّاں۔ پئی جا کے اوہدے اُتّے مِلن۔

² تے ہفتے دے پہلے دِن بُہت سویرے سُورج چڑھدیاں ای اوہ قبر اُتّے آئِیاں۔

³ تے آپو وِچ آکھدیاں سن۔ پئی ساڈے لئی پتّھر نُوں قبر دے مُنھوں کون ریڑھ کے لانبھے کرے گا؟

⁴ تے جد اوہناں نِگاہ کِیتی تے اوس پتّھر نُوں لانبھے ریڑھیا ہویا ویکھیا۔ پئی اوہ بُہت بھارا سی۔

⁵ تے قبر وِچ جا کے اوہناں اِک جوان نُوں چِٹّے کپڑے پایاں ہویاں سَجّے پاسے بَیٹھا ویکھیا۔ تے اوہ گھبرا گِئیاں۔

⁶ اوس اوہناں نُوں آکھیا۔ نا گھبراؤ تُسی یِسُوع ناصری نُوں جیہڑا صلِیب اُتّے چاڑھیا گیا سی لَبّھدیاں اوہ۔ اوہ تے جی اُٹھیا اے۔ اوہ ایتھے نئیں اے ویکھو ایہہ اوہ تھاں اے۔ جِتّھے اوہناں اوہنوں رکھیا سی۔

⁷ پر جاؤ اوہدے شاگِرداں تے پطرس نُوں آکھو پئی اوہ تُہاتھوں اگّے گلِیل نُوں جاندا اے۔ تُسی اوتھے اوہنوں ویکھو گے۔ جیویں اوس تُہانوں آکھیا سی۔

⁸ تے اوہ نِکل کے قبر کولوں نَسّیاں۔ کیوں جو اوہ کنبدِیاں تے گھابر دیاں سن تے ڈردِیاں مارِیاں کِسے نُوں کُجھ نا آکھیا۔

یِسُوع مریم مگدلِینی تے ظاہر ہوندا اے

⁹ تے ہفتے دے پہلے دِن اوس سویرے جی اُٹھ کے پہلاں مریم مگدلِینی نُوں جِہدے وِچوں اوس سَتّ بدرُوحاں نُوں کڈھیا سی وکھالی دِتّا۔

¹⁰ اوس جا کے اوہدے ساتھِیاں نُوں جیہڑے غم کر دے تے روندے سن خبر دِتّی۔

¹¹ تے اوہناں ایہہ سُن کے پئی اوہ جِیوندا اے تے اوہنوں وکھالی دِتّا۔ سَچ نا مَنّیا۔

یِسُوع اپنے دو پَیروکاراں تے ظاہر ہوندا اے

¹² اوہدے پِچّھوں اوس ہور رُوپ وِچ اوہناں وِچوں دوبندیاں نُوں جدوں اوہ پَینڈا کر دیاں پِنڈاں وِچوں لنگھدے جاندے سن وکھالی دِتّا۔

¹³ تے اوہناں جا کے باقی دیاں نُوں خبر دِتّی پر اوہناں ایہناں دا وی سَچ نا مَنّیا۔

یِسُوع یارھاں شاگِرداں تے ظاہر ہوندا اے

¹⁴ ایدوں پِچّھے اوس یارھاں نُوں جد اوہ کھان بَیٹھے سن وکھالی دِتّی تے اوہناں دی بے یقیِنی تے سخت دِلی دا اُلاہما دِتّا ایس لئی پئی جِنہاں اوہنوں جی اُٹھیا ہویاں ویکھیا سی۔ اوہناں لوکاں دا اوہناں سَچ نا مَنّیا۔

¹⁵ تے اوس اوہناں نُوں آکھیا۔ تُسی ساری دُنیا وِچ جا کے ساری خلقت دے اگّے اِنجِیل دی منادی کرو۔

¹⁶ جیہڑا اِیمان لیاؤندا تے بپتِسمہ پاندا اے۔ سو ای نجات پاوے گا۔ تے جیہڑا اِیمان نئیں لیاؤندا۔ اوہ مُجرم کِیتا جاوے گا۔

¹⁷ تے اِیمان لیاؤن والیاں وِچ ایہہ مُعجزے ہون گے۔ پئی اوہ میرا ناں لے کے بدرُوحاں نُوں کڈھن گے۔ تے نَوِیاں نَوِیاں بولیاں بولن گے۔

¹⁸ اوہ سپّاں نُوں چُک لین گے۔ تے جے کُجھ زہر والی شے پی وی لین تے اوہناں دا کُجھ نئیں وگڑے گا۔ اوہ روگِیاں اُتّے ہتّھ رکھن گے۔ تے اوہ چنگے ہو جان گے۔

یِسُوع اسمان تے چُکیا جاندا اے

¹⁹ فیر خُداوند یِسُوع اوہناں نال کلام مُکا کے اسمان اُتّے اُٹھا لیا گیا۔ تے خُدا دے سَجّے ہتّھ جا بَیٹھا۔

²⁰ تے اوہناں باہر جا کے ہر تھاں منادی کِیتی۔ تے خُداوند اوہناں دے نال ہو کے کمّ کر دا تے کلام نُوں اوہناں مُعجزیاں دے راہِیں جیہڑے نال نال ہوندے سن ثابت کر دا سی۔ آمِین۔