مرقس 10 - پنجابی نواں عہد نامہ نظرثانی شدہ چھپائی

یِسُوع طلاق دے بارے تعلِیم دیندا اے

¹ تے اوہ اوتھوں اُٹھ کے یہُودیہ دِیاں حداں وِچ تے یَردن دے پار آیا تے بُہت لوک اوہدے کول فیر اکٹّھے ہوئے۔ تے اوہ اپنے دستُور دے سببّوں فیر اوہناں نُوں تعلِیم دین لگّا۔

² فرِیسیاں اوہدے کول آ کے اوہدے ازمان لئی اوہدے توں سوال پُچھیا۔ پئی شوہر نُوں روا اے پئی بیوی نُوں چھڈ دے

³ اوس اوہناں نُوں جواب دے کے آکھیا۔ پئی مُوسیٰ تُہانوں کِیہ حُکم دِتّا؟

⁴ اوہ آکھن لگّے مُوسیٰ تے اجازت دِتّی پئی طلاق لِکھ کے چھڈ دین

⁵ یِسُوع نے اوہناں نُوں آکھیا۔ تُہاڈی سخت دِلی دے سبّب اوس تُہاڈے واسطے ایہہ حُکم لِکھیا

⁶ پر خلقت دے مُڈھوں اوس اوہناں نُوں نَر تے ناری بنایا۔

⁷ ایس کر کے بندہ اپنے ماں پئیو نُوں چھڈے گا تے اپنی بیوی نال مِلیا رہے گا۔

⁸ تے اوہ دو نَوِیں اِک بدن ہون گے۔ سو اوہ اگّے نُوں دو نا رہے پر اِک بدن نیں۔

⁹ سو جِہنُوں خُدا جوڑ دِتّا اوہنوں بندہ اَڈ نا کرے۔

¹⁰ تے گھر وِچ شاگِرداں نیں ایس گلّ دی بابت فیر اوہدے توں پُچھیا۔

¹¹ تے اوس اوہناں نُوں آکھیا۔ پئی جے کوئی اپنی بیوی نُوں چھڈے تے دُوجی نال ویاہ کرے اوہ اوہدے حق وِچ زنا کر دا اے۔

¹² تے جیکر اوہ آپ اپنے گھر والے نُوں چھڈے تے دُوجے نال ویاہ کرے۔ اوہ وی زنا کر دی اے۔

یِسُوع نِکّے بچّیاں نُوں برکت دیندا اے

¹³ تے لوک نِکّے بچّیاں نُوں اوہدے کول لیائے پئی اوہ اوہناں نُوں چُھوئے۔ پر شاگِرداں اوہناں نُوں جِھڑکیا۔

¹⁴ یِسُوع ایہہ ویکھ کے بُہت ناراض ہویا۔ تے اوہناں نُوں آکھیا۔ بالاں نُوں میرے کول آؤن دیو۔ اوہناں نُوں نا روکو۔ کیوں جو خُدا دی بادشاہی ایہناں جیہاں دی اے۔

¹⁵ مَیں تُہانوں سَچ آکھنا آں۔ پئی جو کوئی خُدا دی بادشاہی نُوں بال وانگُوں نا مَنّے اوہ اوہدے اندر کَدے نئیں جائے گا۔

¹⁶ تے اوس اوہناں نُوں کُچھّڑ چُکیا تے اوہناں اُتّے ہتّھ فیر کے اوہناں نُوں برکت دِتّی۔

اِک مالدار بندہ

¹⁷ تے جد اوہ راہ وِچ لگا جاندا سی اِک بندہ اوہدے کول آیا۔ تے اوہدے اگّے گوڈے نواکے اوہنوں پُچھیا اَے نیک اُستاد مَیں کِیہ کراں پئی ہمیشہ دی زِندگی دا وارث ہوواں؟

¹⁸ یِسُوع اوہنوں آکھیا۔ تُوں مَینُوں نیک کاہِنُوں آکھنا ایں؟ کوئی نیک نئیں اے بِناں خُدا دے۔

¹⁹ تُوں حُکماں نُوں جاننا ایں۔ خُون نا کر۔ زنا نا کر۔ چوری نا کر۔ جُھوٹھی گواہی نا دے۔ فریب نا دے۔ اپنے ماں پئیو دی عِزّت کر۔

²⁰ اوس اوہنوں آکھیا اَے اُستاد۔ ایہناں سارِیاں گلّاں نُوں مَیں اپنے نِکّیاں ہوندیاں توں مَندا آیا ہاں۔

²¹ یِسُوع اوہدے ولّ ویکھ کے اوہنوں پیار کِیتا۔ تے اوہنوں آکھیا تیرے وِچ اِک گلّ دا گھاٹا اے۔ جا۔ تے جو کُجھ تیرا اے۔ ویچ تے غرِیباں نُوں دے۔ تے تینُوں اسمان وِچ خزانہ مِلے گا۔ تے آ۔ میرے پِچّھے ٹُر پَو۔

²² اوہ ایس گلّوں بَھیڑا پیا۔ تے اُداس ہو کے ٹُرگیا۔ کیوں جو اوہ بڑا مال دار سی۔

²³ تے یِسُوع چَوفیرے ویکھ کے اپنے شاگِرداں نُوں آکھیا۔ خُدا دی بادشاہی وِچ مالداراں دا وڑنا کِنّاں اَوکھا اے۔

²⁴ تے شاگِرد اوہدیاں گلّاں توں حَیران ہوئے۔ یِسُوع فیر اوہناں نُوں آکھیا۔ بچّیو۔ جیہڑے لوک دَولت اُتّے آسرا رکھدے نیں اوہناں لئی خُدا دی بادشاہی وِچ وڑنا بڑا ای اَوکھا اے۔

²⁵ سُوئی دے نکّے وِچوں اُوٹھ دا لنگھناں ایہدے نالوں سُکھالا اے پئی دَولت مند خُدا دی بادشاہی وِچ وڑے۔

²⁶ تے اوہ بڑے ای حَیران ہو کے اوہنوں آکھن لگّے فیر کِہدی نجات ہو سکدی اے؟

²⁷ یِسُوع اوہناں ولّ ویکھ کے آکھیا۔ بندیاں کولوں ایہہ اَنہونا اے۔ پر خُدا کولوں نئیں۔ خُدا توں تے سبھ کُجھ ہوسکدا اے۔

²⁸ پطرس اوہنوں آکھن لگّا۔ ویکھ اساں سبھ کُجھ چھڈیا تے تیرے مگر ٹُر پئے۔

²⁹ یِسُوع آکھیا۔ مَیں تُہانوں سَچ آکھنا آں اجیہا کوئی نئیں پئی جِس گھر یا بھراواں یا بھیناں یا ماں یا پئیو یا بال بچّیاں یا زمین نُوں میرے تے اِنجِیل دے لئی چھڈیا اے

³⁰ تے ہُن ایس سَمے وِچ اوہ سَو حِصّے وَدّھ نا پاوے۔ گھر تے بھراواں تے بھیناں تے مانواں تے بال بچّیاں تے زمیناں نُوں۔ پر دُکھاں نال۔ تے آؤن والے زمانے وِچ ہمیشہ دی زِندگی۔

³¹ پر بتھیرے جیہڑے پہلے نیں پِچّھلے ہون گے۔ تے پِچّھلے پہلے۔

یِسُوع ترِیجی وار اپنی مَوت ولّوں دسدا اے

³² تے اوہ یرُوشلِیم دے راہ جاندے سن۔ تے یِسُوع اوہناں دے اگّے اگّے ٹُردا جاندا سی۔ تے اوہ حَیران ہوئے تے مگر آؤن والے ڈر دے سن۔ تے فیر اوہ باراں نُوں نال لے کے جو کُجھ اوہدے اُتّے ہونا سی۔ اوہناں نُوں دسن لگّا۔

³³ پئی ویکھو۔ اسی یرُوشلِیم نُوں جانے آں۔ تے اِبنِ آدم سردار کاہِناں تے فقِیہاں دے حوالے کِیتا جائے گا۔ تے اوہ اوہنوں مار سُٹّن دا حُکم دین گے۔ تے اوہنوں غیر قوماں دے حوالے کرن گے۔

³⁴ تے اوہ اوہدے نال مخَول کرن گے۔ تے اوہدے اُتّے تُھکن گے۔ تے اوہنوں کولڑے مارن گے۔ تے قتل کرن گے۔ تے تِنّاں دِناں پِچّھوں اوہ فیر جی اُٹھے گا۔

یعقُوب تے یُوحنّا دی مِنّت

³⁵ تَد زبدی دے پُتراں یعقُوب تے یُوحنّا اوہدے کول آ کے اوہنوں آکھیا۔ اَے اُستاد۔ اسی چاہنے آں۔ پئی جو کُجھ تَیتھوں منگِئے سو اوہ ای تُوں ساڈے لئی کریں۔

³⁶ اوس اوہناں نُوں آکھیا۔ تُسی کِیہ چاہندے اوہ۔ پئی مَیں تُہاڈے لئی کراں؟

³⁷ اوہناں اوہنوں آکھیا۔ سانُوں ایہہ بخش پئی اسی اِک تیرے سَجّے تے اِک کھبّے تیرے جلال وِچ بَیٹھے۔

³⁸ یِسُوع اوہناں نُوں آکھیا۔ تُسی نئیں جان دے پئی کِیہ منگدے اوہ۔ بھلا تُسی ایہہ پیالہ پی سکدے ہو جیہڑا مَیں پِینا اے؟ یا اوہ بپتِسمہ جیہڑا مَیں لینا اے۔ تُسی لے سکدے ہو؟

³⁹ اوہناں اوہنوں آکھیاں ساتھوں ہو سکدا اے۔ یِسُوع اوہناں نُوں آکھیا۔ جیہڑا پیالہ مَیں پِینا اے تُسی پِیو گے۔ تے جیہڑا بپتِسمہ مَیں لینا اے تُسی لوؤ گے۔

⁴⁰ پر اوہناں دے بِناں جِنہاں لئی تیار کِیتا گیا اے۔ کِسے نُوں اپنے سَجّے یا کھبّے بہالنا میرا کمّ نئیں اے۔

⁴¹ تے جدوں دَساں شاگِرداں نیں ایہہ سُنیا۔ تے اوہ یعقُوب تے یُوحنّا نال غُصّے ہون لگّے۔

⁴² تَد یِسُوع اوہناں نُوں اپنے کول سَدّ کے آکھیا۔ تُسی جان دے اوہ۔ پئی جیہڑے غیر قوماں دے حاکم گِنے جاندے نیں۔ اوہ اوہناں اُتّے دابا پاندے نیں۔ تے اوہناں دے وڈّے لوک اوہناں اُتّے دَھونس جماندے نیں۔

⁴³ پر تُہاڈے وِچ اجیہا نئیں اے۔ سگوں جیہڑا تُہاڈے وِچ وَڈا ہونا چاہے۔ سو تُہاڈا کاماں ہوئے۔

⁴⁴ تے تُہاڈے وِچوں جیہڑا سردار بننا چاہے۔ سو ساریاں دا نوکر بنے۔

⁴⁵ ایس کر کے پئی اِبنِ آدم وی سیوا کران نئیں سگوں سیوا کرن تے بتھیریاں دے تھاں ڈنڈ بھرن نُوں اپنی جان دین آیا اے۔

یِسُوع اَنھے برتِمائی نُوں چَنگا کر دا اے

⁴⁶ تے اوہ یرِیحُو وِچ آئے۔ تے جد اوہ تے اوہدے شاگِرد تے اِک وڈّی بِھیڑ یرِیحُو توں نِکلی تے تِمائی دا پُتر برتِمائی اِک اَنھا منگتا راہ دے کنڈے بَیٹھا ہویا سی۔

⁴⁷ تے ایہہ سُن کے پئی اوہ یِسُوع ناصری اے۔ اُچّی اُچّی آکھن لگّا۔ اَے داؤد دے پُتر یِسُوع میرے اُتّے رَحم کر۔

⁴⁸ تے بتھیریاں اوہنوں جِھڑکیا پئی چُپ کر پر اوس ہور وی زور نال پُکاریا۔ پئی اَے داؤد دے پُتر۔ میرے اُتّے رَحم کر۔

⁴⁹ تَد یِسُوع کھلو کے آکھیا پئی اوہنوں سَدّ لوؤ۔ تے اوہناں اوس اَنھے نُوں ایہہ آکھ کے سدّیا پئی حَوصلہ کر۔ اُٹھ اوہ تینُوں سدّدا اے۔

⁵⁰ اوہ اپنا کپڑا سُٹ کے اُٹھ کھلوتا۔ تے یِسُوع کول آیا۔

⁵¹ تے یِسُوع اوہنوں آکھیا۔ تُوں کِیہ چاہنا ایں۔ پئی مَیں تیرے لئی کراں؟ اوس اَنھے اوہنوں آکھیا۔ اَے اُستاد ایہہ پئی مَیں سوجاکھا ہو جاواں۔

⁵² یِسُوع اوہنوں آکھیا جا تیرے اِیمان تینُوں بچایا۔ اونویں ای اوہ سُجاکھا ہوگیا تے راہ وِچ اوہدے مگر ٹُر پیا۔