متّی 8 - پنجابی نواں عہد نامہ نظرثانی شدہ چھپائی

یِسُوع اِک کوڑھے نُوں شفا دیندا اے

¹ تے جد اوہ اوس پہاڑوں اُتریا بتھیرے لوک اوہدے مگر ٹُر پئے۔

² تے ویکھو اِک کوڑھے اگّے ہو کے اوہنوں سجدہ کر کے آکھیا خُداوندا جے تُوں چاہیں تے مَینُوں پاک صاف کر سکنا ایں۔

³ تے ہتّھ وَدّھا کے اوس اوہنوں چُھوئیا تے آکھیا مَیں چاہناں آں۔ تُوں پاک صاف ہو جا۔ تے اوسے ویلے اوہدا کوڑھ صاف ہوگیا۔

⁴ تے یِسُوع اوہنوں آکھیا خبردار کِسے نُوں نا دسیں۔ پر جا کے اپنا آپ کاہِن نُوں وکھا۔ تے جیہڑی نذر مُوسیٰ نے ٹھیرائی اے۔ چڑھا۔ تاں جو اوہناں لئی گواہی ہوئے۔

یِسُوع اِک رُومی صُوبیدار دے نوکر نُوں شفا دیندا اے

⁵ تے جد اوہ کَفرنحُوم وِچ اَپڑیا اِک صُوبیدار اوہدے کول آیا۔ تے اوہدی مِنّت کر کے آکھیا پئی۔

⁶ اَے خُداوند میرا نوکر جھولے دا ماریا گھر وِچ پیا ڈاہڈا تڑپھدا اے۔

⁷ تے اوس اوہنوں آکھیا مَیں آ کے اوہنوں چَنگا کراں گا۔

⁸ تَد صُوبیدار جواب دِتّا۔ خُداوند مَیں ایس لائق کِتّھوں ہویا پئی تُوں میری چھت ہیٹھاں آویں؟ پر نِرا کلام کر تے میرا نوکر چَنگا ہو جائے گا۔

⁹ کیوں جو مَیں وی نوکر ہاں۔ سپاہی میرے حُکم وِچ نیں۔ تے مَیں اِک نُوں آکھنا آں پئی جا تے اوہ جاندا اے۔ تے دُوجے نُوں آ۔ تے اوہ آؤندا اے۔ تے اپنے غلام نُوں پئی ایہہ کمّ کر۔ تے اوہ کر دا اے۔

¹⁰ تے یِسُوع ایہہ سُن کے تعجُّب کِیتا۔ تے اوہناں نُوں جیہڑے مگر مگر آوندے سن آکھیا۔ مَیں تُہانوں سَچ آکھنا آں پئی اِسرائیل وِچ دی مَیں اینا اِیمان نئیں ویکھیا۔

¹¹ تے مَیں تُہانوں آکھنا آں پئی بتھیرے چڑھدیوں تے لہندیوں آؤن گے تے ابرہام تے اِضحاق تے یعقُوب دے نال اسمان دی بادشاہی وِچ بَیٹھن گے۔

¹² پر بادشاہی دے فرزند باہر لے ہنیرے وِچ سُٹّے جان گے۔ اوتھے رونا تے کچیچیاں وٹنا ہوئے گا۔

¹³ تے یِسُوع صُوبیدار نُوں آکھیا۔ جا تے جِہیا تُوں یقِین کِیتا اوہی تیرے لئی ہوئے۔ تے اوہ نوکر اوسے گھڑی چَنگا ہوگیا۔

یِسُوع بتھیرے لوکاں نُوں شفا دیندا اے

¹⁴ تے یِسُوع پطرس دے گھر وِچ آ کے اوہدی سَس نُوں تاپ نال پَیاں ہویاں ویکھیا۔

¹⁵ تے اوہنے اوہدا ہتّھ چُھوئیا تے تاپ لیَہہ گئی۔ تے اوس اُٹھ کے اوہدی سیوا کِیتی۔

¹⁶ تے جد شام پئی لوک بتھیریاں بد رُوح چمبڑیاں ہویاں نُوں اوہدے کول لے آئے۔ تے اوس اوہناں رُوحاں نُوں کلام ای نال باہر کڈھ دِتّا تے ساریاں بِیماراں نُوں چَنگا کِیتا۔

¹⁷ تاں جو اوہ گلّ جیہڑی یسعیاہ بنی آکھی سی پُوری ہوئے۔ پئی اوس آپ ساڈیاں ماندگِیاں لے لئیاں۔ تے ساڈیاں روگاں نُوں چُک لیا۔

یِسُوع پیچھے چَلّن دے خواہش مند لوک

¹⁸ تے جد یِسُوع اپنے چَوفیرے بڑی خلقت ویکھی تَد اوس پار چَلّن دا حُکم دِتّا۔

¹⁹ تے اِک فقِیہ اگّے ہو کے اوہنوں آکھیا۔ اَے اُستاد جِتّھے کِتّھے تُوں جائیں مَیں تیرے مگر چلاں گا۔

²⁰ تے یِسُوع اوہنوں آکھیا لُومبڑِیاں کول گھورنے تے وَا دیاں پنچھیاں کول آہلنے۔ پر اِبنِ آدم کول تھاں نئیں اے جِتّھے سِر دھرے۔

²¹ تے شاگِرداں وِچوں اِک ہور نے اوہنوں آکھیا۔ خُداوندا اجازت دے مَیں پہلاں جا کے اپنے پئیو نُوں دفناواں۔

²² پر یِسُوع اوہنوں آکھیا میرے مگر ٹُر آ۔ تے مُردیاں نُوں اپنے مُردے دفناں دے۔

یِسُوع طوفان نُوں روک دیندا اے

²³ تے جد اوہ بیڑی اُتّے چڑھیا اوہدے شاگِرد اوہدے مگر آئے۔

²⁴ تے ویکھو سمُندر وِچ ایڈی ہنیری آئی پئی بیڑی ٹَھلّاں وِچ لُکدی جاندی سی۔ پر اوہ آپ سُتّا پیا سی۔

²⁵ تے اوہناں کول آ کے اوہنوں اُٹھایا تے آکھیا خُداوندا بچا۔ اسی مر چلّے آں۔

²⁶ تے اوس اوہناں نُوں آکھیا اَے تھوڑے اِیمان والیو! تُسی ڈر دے کیوں ہو؟ تَد اوس اُٹھ کے وَا تے سمُندر نُوں جِھڑکیا تے بڑا امن ہوگیا۔

²⁷ تے اوہ لوک تعجُّب کر کے آکھن لگّے پئی ایہہ کِس طرح دا بندہ اے پئی وَا تے سمُندر وی اوہدی مَن دے نیں۔

یِسُوع دو بندیاں نُوں جِنہاں وِچ بدرُوحاں سن شفا دیندا اے

²⁸ تے جد پار جا کے اوہ گدرینِیاں دے دیس وِچ اَپڑیا اوہنوں دو بندے جِنہاں وِچ بدرُوحاں سن۔ قبراں وِچوں نِکل کے آ مِلے تے اوہ اَیڈے ڈاہڈے سن پئی کوئی اوس راہوں لنگھ نئیں سی سکدا۔

²⁹ تے ویکھو اوہناں چِیک مار کے آکھیا۔ اَے خُدا دے پُتر تیرا ساڈے نال کِیہ واسطہ؟ تُوں ویلے توں پہلاں ای سانُوں دُکھ دین نُوں ایتھے آگیا ایں؟

³⁰ تے اوہناں توں دُراڈے بتھیرے سُؤراں دا اِجّڑ چُگدا سی۔

³¹ سو بدرُوحاں ایہہ آکھ کے اوہدی مِنّت کِیتی جے تُوں سانُوں کڈھناں ایں تے سانُوں اوہناں سُؤراں دے اِجّڑ وِچ گھل دے۔

³² تے اوس اوہناں نُوں آکھیا جاؤ۔ تے اوہ نِکل کے سُؤراں وِچ جاوڑیاں۔ تے ویکھو سارا اِجّڑ ڈھائے اُتّوں سمُندر وِچ سِر توڑ بھجیا تے پانی وِچ ڈُب مریا۔

³³ تَد چران والے نَسّ گئے تے نگّر وِچ جا کے سارا حال دسیا۔ تے نالے بدرُوحاں والیاں دا حال وی۔

³⁴ تے ویکھو سارا شہر یِسُوع نُوں اگّوں والی مِلن نُوں نِکلیا تے اوہنوں ویکھ کے اوہدی مِنّت کِیتی پئی ساڈیاں حداں توں باہر ٹُرجا۔