متّی 7 - پنجابی نواں عہد نامہ نظرثانی شدہ چھپائی

دُوسریاں تے الزام نا لاؤ

¹ الزام نا لاؤ پئی تُہاڈے اُتّے الزام نا لگّے۔

² کیوں جو جیویں تُسی الزام لاندے ہو تُہاڈے اُتّے وی الزام لگّن گے۔ تے جِس ناپ نال تُسی ناپدے ہو اوسے نال تُہاڈے لئی ناپیا جاوے گا۔

³ تے اوس ککھ نُوں جیہڑا تیرے بھرا دی اَکھ وِچ اے تُوں کیوں ویکھنا ایں۔ تے اوس چھتیر ولّ جیہڑی تیری اپنی اَکھ وِچ اے دھیان نئیں کر دا؟

⁴ یا تُوں کیہڑے مُنھ نال اپنے بھرا نُوں آکھیں گا۔ ”لیا تیری اَکھ وِچوں ککھ کڈھاں۔“ تے ویکھ تیری اپنی اَکھ وِچ چھتیر اے۔

⁵ اَے مکّارا۔ پہلاں ایس چھتیر نُوں اپنی اکھّوں کڈھ لے۔ تَد چنگی طرح ویکھ کے تُوں اپنے بھرا دی اکھّوں اوس ککھ نُوں کڈھ سکیں گا۔

⁶ پاک شے کُتّیاں نُوں نا دیو تے نا اپنیاں موتِیاں نُوں سُؤراں اگّے سُٹّو۔ اجیہا نا ہوئے پئی اوہ اوہناں نُوں پیراں ہیٹھ لتاڑن تے مُڑ کے تُہانوں پاڑ سُٹّن۔

منگو۔ لَبّھو۔ کھڑکاؤ

⁷ منگو تے تُہانوں دِتّا جائے گا لَبّھو تے مِلے گا۔ کھڑکاؤ تے تُہاڈے لئی کھو لیا جائے گا۔

⁸ کیوں جو ہر اِک منگن والا پا لَیندا اے تے لَبّھن والے نُوں لَبّھ پَیندا اے۔ تے کھڑکان والے لئی کھولیا جائے گا۔

⁹ یا تُہاڈے وِچوں اوہ کیہڑا بندہ ایہہ پئی اوہدا پُتر اوہدے توں روٹی منگے تے اوہنوں پتّھر دیوے گا؟

¹⁰ یا جے مچّھی منگے اوہنوں سَپّ دیوے گا؟

¹¹ سو جدوں تُسی جیہڑے بُرے ہو اپنیاں بچّیاں نُوں چَنگیاں شیواں دینیاں جان دے ہو تے تُہاڈا باپ جیہڑا اسمان اُتّے اے اوہناں نُوں جیہڑے اوہدے کولوں منگدے نیں۔ چَنگیاں شیواں ضرُور دے گا۔

¹² ایس کر کے سبھو کُجھ جو تُسی چاہندے ہو پئی لوک تُہاڈے نال کرن اوہ ای اوہناں نال تُسی وی کرو کیوں جو توریت تے نبیاں دی تعلِیم ایہو ای اے۔

بِھیڑا بُوہا

¹³ بِھیڑے بُوہے راہ وڑو۔ کیوں جو موکلا اے اوہ بُوہا تے کُھلا اے اوہ راہ جیہڑا بربادی نُوں پُہنچاندا اے۔ تے بُہتے نیں جیہڑے اوتھوں وی وڑدے نیں۔

¹⁴ کیوں جو بِھیڑا اے اوہ بُوہا تے سَوڑا اے اوہ راہ جیہڑا زِندگی نُوں پُہنچاندا اے۔ تے جیہڑے اوہنوں لبّھدے نیں تھوڑے نیں۔

رُکھّ تے اوہدا پَھل

¹⁵ جُھوٹھے پیغمبراں توں خبردار رہو جیہڑے تُہاڈے کول بھیڈاں دے بھیس وِچ آوندے نیں پر وِچوں پاڑن والے بگھیاڑ نیں۔

¹⁶ تُسی اوہناں دے پَھلاں توں اوہناں نُوں پچھانوں گے۔ ملہیاں توں داکھاں یا پوہلیاں توں ہِجیراں لوک اکٹّھیاں کر دے نیں؟

¹⁷ ایسے طرح ہر اِک چنگے رُکھّ نُوں چَنگا تے بُرے رُکھّ نُوں بُرا پَھل لگدا اے۔

¹⁸ چَنگا رُکھّ بُرا پَھل نئیں لیا سکدا اے تے نا بُرا رُکھّ چَنگا پَھل لیا سکدا اے۔

¹⁹ ہر اِک رُکھّ جیہڑا چَنگا پَھل نئیں لیاؤندا اوہ وَڈّھیا جاندا تے اَگ وِچ سُٹّیا جاندا اے۔

²⁰ سو تُسی اوہناں دے پَھلاں توں اوہناں نُوں پچھانوں گے۔

مَیں تُہانوں نئیں جان دا

²¹ نا ہر کوئی جیہڑا مَینُوں خُداوند خُداوند آکھدا اے اسمان دی بادشاہی وِچ وڑے گا پر اوہ جیہڑا میرے باپ دی جو اسمان اُتّے اے مرضی پُوری کر دا اے۔

²² اوس دِہاڑے بتھیرے مَینُوں آکھن گے خُداوندا خُداوندا تیرا ناں لے کے نبُوّتاں اساں نئیں سن کِیتیاں؟ تے تیرا ناں لے کے بدرُوحاں نئیں کڈِھیاں؟ تے تیرا ناں لے کے ڈھیر سارِیاں کراماتاں نئیں وکھائیاں؟

²³ تے مَیں اوہناں نُوں تَد صاف آکھاں گا پئی مَیں کدی تُہانوں نئیں جانیا۔ اَے شریعت توڑن والیو مَیتھوں دُراڈے ہو جاؤ۔

دو گھر بنان والے

²⁴ سو جیہڑا کوئی میرِیاں ایہناں گلّاں نُوں سُندا تے اوہناں نُوں کر دا اے اوہ اِک عقل والے بندے وانگر سمجھیا جائے گا جِس پتّھر اُتّے اپنا گھر بنایا۔

²⁵ تے مینہ وسّیا تے ہڑ آئے تے ہنیرِیاں وَگِیاں تے اوس گھر اُتّے سٹّاں مارِیاں تے اوہ نا ڈِگّیا کیوں جو اوہدی نِینّھ پتّھر اُتّے رکھی گئی سی۔

²⁶ تے جیہڑا کوئی میرِیاں ایہہ گلّاں سُن کے اوہناں نُوں نئیں کر دا سو اِک مُورکھ وانگر سمجھیا جائے گا۔ جِس اپنا گھر ریت اُتّے بنایا۔

²⁷ تے مینہ وسّیا تے ہڑ آئے تے ہنیرِیاں وَگِیاں تے اوس گھر نُوں دھکّا ماریا تے اوہ ڈَھے پیا تے اوہدا ڈِگّنا بُرا ہویا۔

یِسُوع دا اختیار

²⁸ تے ایویں ہویا پئی جد یِسُوع ایہناں گلّاں نُوں مُکالیا تَد بِھیڑ اوہدی تعلِیم توں حَیران ہوئی۔

²⁹ کیوں جو اوہ اوہناں دے فقِیہاں وانگر نئیں سگوں اختیار والے وانگر اوہناں نُوں سِکھاؤندا سی۔