متّی 6 - پنجابی نواں عہد نامہ نظرثانی شدہ چھپائی

خَیرات دے بارے تعلِیم

¹ خبردار ہو پئی تُسی اپنی نیکی نُوں لوکاں دے سامھنے وکھان لئی نا کرو۔ نئیں تے تُہاڈے باپ کولوں جیہڑا اسمان اُتّے اے تُہانوں کوئی اِنعام نئیں مِلے گا۔

² سو جد تُوں خَیرات کریں اپنے اگّے تُرہی نا وجا جیویں مکّار عبادت خانیاں تے بزاراں وِچ ایس کر کے کر دے نیں پئی لوک اوہناں دی وڈیائی کرن۔ مَیں تُہانوں سَچ آکھنا آں پئی اوہناں اپنا اِنعام پالیا۔

³ پر جد تُوں خَیرات کرنا ایں تے تیرے کھبّے ہتّھ نُوں خبر نا ہوئے پئی تیرا سَجّا ہتّھ کِیہ کر دا اے۔

⁴ تاں جو تیری خَیرات پڑدے وِچ ہوئے تے تیرا باپ جیہڑا پڑدے وِچ ویکھ لَیندا اے تینُوں بدلہ دیوے گا۔

دُعا دے بارے تعلِیم

⁵ تے جد تُسی دُعا منگو تے مکّاراں وانگُوں نا ہوؤ کیوں جو اوہ عبادت خانیاں وِچ تے چَونکاں دیاں موڑاں اُتّے کھلو کے دُعا منگنی پسند کر دے نیں۔ پئی لوک اوہناں نُوں ویکھن۔ مَیں تُہانوں سَچ آکھنا آں پئی اوہناں اپنا اِنعام پالیا۔

⁶ پر تُوں جد دُعا منگیں تَد اپنی کوٹھڑی وِچ جا تے بُوہا مار کے اپنے باپ توں جیہڑا پڑدے وِچ اے دُعا منگ تے تیرا باپ جیہڑا پڑدے وِچ ویکھ لَیندا اے تینُوں بدلہ دے گا۔

⁷ دُعا منگدیاں ہورناں قوماں وانگُوں بَک بَک نا کرو کیوں جو اوہ سمجھدے نیں پئی ساڈے بوہتا بولن نال ساڈی سُنی جائے گی۔

⁸ سو تُسی اوہناں وانگُوں نا ہوؤ کیوں جو تُہاڈا باپ تُہاڈے منگن توں پہلاں ای جان دا اے پئی تُہانوں کیہڑیاں کیہڑیاں شیواں دی لوڑ اے۔

⁹ سو تُسی ایس طرح دُعا منگو۔ اے ساڈے باپ جو اسماناں اُتّے ایں۔ تیرا ناں پاک مَنّیا جائے۔

¹⁰ تیرا راج آوے۔ تیری مرضی جیویں اسماناں اُتّے پُوری ہوندی اے زمین اُتّے وی ہوئے۔

¹¹ ساڈی روز دی روٹی اَج سانُوں دے۔

¹² تے ساڈیاں قصوراں نُوں بخش دے جیویں اساں اپنے قصورواراں نُوں بخش دِتّا اے۔

¹³ تے سانُوں ازمایش وِچ نا لیا۔ سگوں بُریائی توں بچا [کیوں جو بادشاہی تے قُدرت تے جلال ہمیشہ تِیکر تیرے ای نیں۔ آمِین۔]

¹⁴ کیوں جو جے تُسی لوکاں نُوں اوہناں دِیاں تقصِیراں بخشو گے تے تُہاڈا اسمانی باپ تُہانوں وی بخشے گا۔

¹⁵ پر جے تُسی لوکاں نُوں اوہناں دِیاں تقصِیراں نا بخشو گے۔ تے تُہاڈا باپ وی تُہاڈیاں تقصِیراں نا بخشے گا۔

روزہ دے بارے تعلِیم

¹⁶ تے جد تُسی روزہ رکھو مکّاراں وانگُوں اپنا مُنھ اُداس نا بناؤ کیوں جو اوہ ایس لئی اپنا مُنھ وگاڑ دے نیں پئی لوکاں نُوں روزہ رکھّے ہوئے معلُوم ہون۔ مَیں تُہانوں سَچ آکھنا آں پئی اوہناں اپنا اِنعام پالیا۔

¹⁷ پر تُوں جدوں روزہ رکھّیں اپنے سِر نُوں تیل مَل تے مُنھ دھو۔

¹⁸ پئی تُوں بندیاں نُوں نئیں پر اپنے باپ نُوں جیہڑا پڑدے وِچ اے روزہ رکھیا ہویا معلُوم ہوئیں تے تیرا باپ و جیہڑا پڑدے وِچ ویکھ لَیندا اے تینُوں بدلہ دیوے گا۔

اسمان تے خزانہ

¹⁹ زمین اُتّے اپنے لئی خزانہ اکٹّھا نا کرو جِتّھے کِیڑا تے جنگال خراب کر دے تے جِتّھے چور وی سَنّھ مار دے تے چُرا لے جاندے نیں۔

²⁰ پر اسمان اُتّے اپنے لئی خزانہ اکٹّھا کرو۔ جِتّھے نا کِیڑا نا جنگال خراب کر دا اے تے جِتّھے چور نا سَنّھ مار دے تے نا چُرا لے جاندے نیں۔

²¹ کیوں جو جِتّھے تیرا خزانہ ایہہ اوتھے ای تیرا دِل وی ہوئے گا۔

بدن دا دِیوا

²² بدن دا دِیوا اَکھ اے سو جیکر تیری اَکھ صاف ہوئے تے تیرا سارا بدن چاننا ہوئے گا۔

²³ پر جیکر تیری اَکھ بُری ہوئے تے تیرا سارا بدن ہنیرا ہوئے گا۔ سو جے تیرا اندر دا چانن ہنیرا ہوئے تے کیڈا وَڈا ہنیرا ہویا؟

خُدا تے اَملاک

²⁴ کوئی بندہ دو مالکاں دی سیوا نئیں کر سکدا ایس لئی پئی یا اِک نال وَیر رکھّے گا تے دُوجے نال پیار یا اِک نال مِلیا رہے گا تے دُوجے نُوں کُجھ نا سمجھے گا۔ تُسی خُدا تے دَولت دو آں دی سیوا نئیں کر سکدے۔

فِکراں

²⁵ ایس کر کے مَیں تُہانوں آکھنا آں پئی اپنی جان دا فِکر نا کرو پئی اسی کِیہ کھاواں گے یا کِیہ پِیاں گے تے نا اپنے بدن دا پئی کِیہ پاواں گے؟ جان خُوراک نالوں تے بدن کپڑیاں نالوں وَدّھ نئیں ایہہ؟

²⁶ وَا دیاں پنچھیاں ولّ ویکھو پئی اوہ نا بِیجدے نا وَڈّھ دے تے نا کوٹھِیاں وِچ جمع کر دے نیں۔ تے وی تُہاڈا اسمانی باپ اوہناں نُوں پالدا اے۔ بھلا تُسی اوہناں نالوں قدر والے نئیں اوہ؟

²⁷ تُہاڈے وِچوں اوہ کون اے جیہڑا فِکر کرن نال اپنا قد اِک ہتّھ وَدّھا سکدا اے؟

²⁸ تے کپڑیاں دا کاہِنُوں فِکر کر دے اوہ بیابان دیاں پُھلّاں توں مَت لوؤ پئی اوہ کِیہ کر وَدھدے نیں۔ اوہ نا محنت کر دے نا کَتّدے نیں۔

²⁹ پر مَیں تُہانوں آکھنا آں پئی سُلیمان وی اپنی ساری شان وِچ ایہناں وِچوں اِک جیہا نئیں سی پاندا ہوندا۔

³⁰ سو اَے تھوڑے اِیمان والیو جد خُدا بیابانی گھاہ نُوں ایس طرح پواندا اے جیہڑا اَج ای اے تے بھلکے بھٹّھی وِچ جھوکیا جاندا اے تُہانوں سگوں ضرُور نا پوائے گا؟

³¹ سو تُسی فِکر کر کے ایہہ نا آکھو پئی اسی کِیہ کھایئے یاں کِیہ پِیئے یا کِیہ پائیے۔

³² کیوں جو ایہناں سارِیاں شیواں نُوں غیر قوماں لَبّھدیاں نیں۔ تے تُہاڈا اسمانی باپ جاندا اے پئی تُہانوں ایہناں سبھناں شیواں دی لوڑ اے۔

³³ پر تُسی پہلاں اوہدی بادشاہی تے سچیائی نُوں لَبّھو۔ تَد ایہہ سارِیاں شیواں وی تُہانوں دِتّیاں جان گِیاں۔

³⁴ سو کل دے لئی فِکر نا کرو کیوں جو کل اپنے لئی آپ فِکر کرے گا اَج دا دُکھ اَج لئی بہتیرا اے۔