متّی 4 - پنجابی نواں عہد نامہ نظرثانی شدہ چھپائی

یِسُوع دا ازمایا جانا

¹ اوس ویلے رُوح یِسُوع نُوں بیابان وِچ لے گیا پئی ابلیس کولوں ازمایا جائے۔

² تے جد اوہنے چالی دِن تے چالی رات روزہ رکھ لیا سی فیر اوہنوں بُھکھ لگّی۔

³ تَد ازمان والے نیڑے آ کے اوہنوں آکھیا جے تُوں خُدا دا پُتر ایں تے آکھ پئی ایہہ پتّھر روٹِیاں بن جان۔

⁴ پر اوس جواب دِتّا لِکھیا ہویا اے پئی بندہ نِری روٹی نال ای جِیوندا نئیں رہے گا پر ہر اِک گلّ نال جیہڑی خُدا دے مُنھوں نِکل دی اے۔

⁵ فیر ابلیس اوہنوں مُقدّس شہر وِچ نال لے گیا تے ہیکل دے کِنگرے اُتّے کھلھار کے آکھیا۔

⁶ جے تُوں خُدا دا پُتر ایں تے اپنے آپ نُوں ہیٹھاں ڈیگ دے کیوں جو لِکھیا ہویا اے۔ پئی اوہ اپنے فرِشتیاں نُوں تیری بابت حُکم دے گا تے اوہ ہتّھاں اُتّے تینُوں چُک لین گے۔ پئی کِتے پتّھر نال تیرے پَیر نُوں سَٹ نا لگّے۔

⁷ یِسُوع اوہنوں آکھیا اے وی لِکھیا ہویا اے پئی تُوں خُداوند اپنے خُدا نُوں نا ازما۔

⁸ فیر ابلیس اِک بڑے اُچّے پہاڑ اُتّے اوہنوں لے گیا تے دُنیا دِیاں سارِیاں بادشاہیاں تے اوہناں دی شان شوکت اوہنوں وکھائی۔

⁹ تے اوہنوں آکھیا ایہہ سبھ کُجھ مَیں تینُوں دیاں گا جے تُوں نِیواں ہو کے مَینُوں سجدہ کریں۔

¹⁰ تَد یِسُوع اوہنوں آکھیا اَے شیطان دُراڈے ہو جا۔ کیوں جو لِکھیا ہویا ایہہ پئی تُوں خُداوند اپنے خُدا نُوں سجدہ کر۔ تے نِری اوسے دی بندگی کر۔

¹¹ تَد ابلیس اوہنوں چھڈ گیا تے ویکھو فرِشتیاں کول آ کے اوہدی خِدمت کِیتی۔

یِسُوع گلِیل وِچ خِدمت شُروع کر دا اے

¹² تے ایہہ سُن کے پئی یُوحنّا پھڑیا گیا اے اوہ گلِیل نُوں ٹُرپیا۔

¹³ تے ناصرۃ نُوں چھڈ کے کَفرنحُوم وِچ جیہڑا سمُندر دے کنڈھے زبُولُون تے نفتالی دِیاں حداں وِچ اے جا رہیا۔

¹⁴ تاں جو یسعیاہ نبی دی گلّ پُوری ہوئے پئی۔

¹⁵ زبُولُون دی دھرتی تے نفتالی دی دھرتی غیر قوماں دا گلِیل سمُندر دے راہ یَردنوں پار۔

¹⁶ اوہناں لوکاں جیہڑے ہنیرے وِچ بَیٹھے ہوئے سن بڑا چانن ویکھیا تے مَوت دے دیس تے چھاں وِچ بَیٹھیاں ہویاں اُتّے چانن چمکیا۔

¹⁷ اوس ویلے توں یِسُوع منادی کرنی تے ایہہ آکھنا شُروع کِیتا پئی تَوبہ کرو کیوں جو اسمان دی بادشاہی نیڑے آگئی اے۔

یِسُوع چار مچھّیاں پھڑن والیاں نُوں چُن دا اے

¹⁸ تے گلِیل دے سمُندر دے کنڈھے پِھردیاں ہویاں اوس دو بھراواں نُوں اِک شمعُون جیہڑا پطرس اکھواؤندا ایہہ تے اوہدے بھرا اندریاس نُوں سمُندر وِچ جال پاندیاں ویکھیا۔ کیوں جو اوہ مچھّیاں پھڑن والے سن۔

¹⁹ تے اوہناں نُوں آکھیا میرے مگر آؤ۔ تے مَیں تُہانوں بندیاں نُوں پھڑن والے بناواں گا۔

²⁰ تے اوہ جھٹ جالاں نُوں چھڈ کے اوہدے مگر ٹُر پئے۔

²¹ تے اوتھوں اگّے وَدّھ کے اوس ہور دو بھراواں نُوں زبدی دے پُتر یعقُوب تے اوہدے بھرا یُوحنّا نُوں ویکھیا پئی اوہ بیڑی وِچ اپنے پئیو زبدی دے نال اپنیاں جالاں نُوں گنڈھ رہے سن۔ تے اوس اوہناں نُوں سدّیا۔

²² تے اوہ جھٹ بیڑی نُوں تے اپنے پئیو نُوں چھڈ کے اوہدے مگر ٹُر پئے۔

یِسُوع شفا دی تعلِیم دیندا اے

²³ تے یِسُوع اوہناں دے عِبادتخانیاں وِچ سِکھاؤندا تے بادشاہی دی خُوشخبری دی منادی کر دا تے لوکاں دیاں ساریاں روگاں تے سارِیاں ماندگِیاں نُوں چَنگا کر دا ہویا سارے گلِیل وِچ پِھردا گیا۔

²⁴ تے سارے سُوریہ وِچ اوہدی دُھم پَے گئی تے لوکاں نیں ساریاں بِیماراں نُوں جیہڑے کئی طرح دے روگاں تے دُکھاں وِچ پَھسے ہوئے سن جِنہاں نُوں بدرُوحاں چمبڑیاں ہویاں سن۔ تے مِرگی والیاں۔ تے ادھرلنگیاں نُوں اوہدے کول لیاندا تے اوس اوہناں نُوں چَنگیاں کِیتا۔

²⁵ تے وڈّیاں وڈّیاں بِھیڑاں گلِیل توں تے دِکَپُلِس تے یرُوشلِیم تے یہُودیہ توں تے یَردن دے پاروں اوہدے مگر ٹُر پئیاں۔