متّی 19 - پنجابی نواں عہد نامہ نظرثانی شدہ چھپائی

طلاق دے بارے یِسُوع دی تعلِیم

¹ تے جد یِسُوع ایہہ گلّاں مُکائِیاں تے اینج ہویا پئی اوہ گلِیلوں ٹُرپیا۔ تے یَردن دے پار یہُودیہ دِیاں حداں وِچ آیا۔

² تے بتھیرے لوک اوہدے مگر ٹُر پئے۔ تے اوس اوہناں نُوں اوتھے ای چَنگا کِیتا۔

³ تے فریسی اوہدے ازمان لئی اوہدے کول آئے۔ تے اوہنوں آکھیا ایہہ روا اے پئی بندہ کِسے وی گلّوں اپنی بیوی نُوں چھڈ دیوے؟

⁴ اوس اوہناں نُوں جواب دِتّا۔ تُساں نئیں پڑھیا پئی جِس اوہناں نُوں بنایا اوس اوہناں نُوں مُڈھوں نَر تے ناری پَیدا کِیتا۔

⁵ تے آکھیا ”ایس لئی بندہ اپنے ماں پئیو نُوں چھڈ دے گا تے اپنی بیوی نال مِلیا رہے گا۔ تے اوہ دوویں اِک بدن ہو جان گے۔“

⁶ ایس کر کے اوہ دو نا رہے پر اِک ای بدن نیں سو جِہنُوں خُدا نے جوڑیا اے اوہنوں بندہ وَکھ نا کرے۔

⁷ اوہ اوہنوں آکھن لگّے فیر مُوسیٰ نے کیوں حُکم دِتّا پئی طلاق نامہ دے کے اوہنوں چھڈ دے؟

⁸ اوہ اوہناں نُوں آکھن لگّا مُوسیٰ تے تُہاڈی سخت دِلی دے سبّب تُہانوں اپنیاں وَوہٹِیاں نُوں چھڈ دین دی اجازت دِتّی پر مُڈھوں ایس طرح نئیں سی ہویا۔

⁹ تے مَیں تُہانوں آکھنا آں پئی جیہڑا کوئی اپنی بیوی نُوں زناکاری دے سِوا ہور کِسے گلّ بدلے چھڈ دیوے تے دُوجی نال ویاہ کرے اوہ زنا کر دا اے تے جیہڑا اوس چھڈی ہوئی نُوں ویاہے اوہ زنا کر دا اے۔

¹⁰ شاگِرد اوہنوں آکھن لگّے۔ جے بیوی نال بندے دا ایہہ حال اے تے ویاہ کرنا ای چَنگا نئیں۔

¹¹ پر اوس اوہناں نُوں آکھیا سبھے ایس گلّ نُوں قبول نئیں کر سکدے۔ پر جِنہاں نُوں دِتّا گیا اے۔

¹² کیوں جو بعض کُھسرے اجیہے نیں جیہڑے ماں دے گربھوں اجیہے جمّے نیں۔ تے اجیہے کُھسرے نیں جِنہاں نُوں بندیاں کھُسریاں کر دِتّا۔ تے اجیہے کُھسرے وی نیں جِنہاں اسمان دی بادشاہی دی خاطر اپنے آپ نُوں کھُسریاں کر لیا اے۔ جیہڑا قبول کر سکدا اے اوہ ای قبولے۔

یِسُوع چھوٹے بچّیاں نُوں برکت دیندا اے

¹³ اوس ویلے اوہدے کول بال لیاندے گئے پئی اوہ اوہناں اُتّے ہتّھ رکھّے تے دُعا کرے۔ شاگِرداں اوہناں نُوں جِھڑکیا۔

¹⁴ پر یِسُوع آکھیا بچّیاں نُوں کُجھ نا آکھو تے نا اوہناں نُوں میرے کول آؤن توں روکو کیوں جو اسمان دی بادشاہی ایہو جِہیاں دی اے۔

¹⁵ تے اوہ اوہناں اُتّے ہتّھ رکھ کے اوتھوں ٹُرگیا۔

اِک دَولتمند جَنا

¹⁶ تے ویکھو اِک بندے نے اوہدے کول آن کے آکھیا اَے اُستاد مَیں کیہڑا بھلا کمّ کراں پئی ہمیشہ دی زِندگی مَینُوں مِلے؟

¹⁷ اوس اوہنوں آکھیا بھلیائی دی بابت مَیتھوں کیوں پُچھنا ایں؟ بھلا تے اِک ای اے۔ پر جے تُوں زِندگی وِچ داخل ہونا چاہنا ایں۔ تے حُکماں نُوں مَن۔

¹⁸ اوس اوہنوں آکھیا کیہڑیاں نُوں؟ یِسُوع آکھیا ایہہ پئی تُوں خُون نا کر۔ زنا نا کر۔ چوری نا کر۔ جُھوٹھی گواہی نا دے۔

¹⁹ اپنے ماں باپ دی عِزّت کر۔ تے اپنے گوانڈھی نُوں اپنے جِہیا پیار کر۔

²⁰ اوہ جوان اوہنوں آکھن لگّا مَیں ایہناں سارِیاں گلّاں نُوں مَندا آیا آں۔ اجے ہور کاہدے وِچ مَیں گھٹ آں۔

²¹ یِسُوع نے اوہنوں آکھیا جے تُوں کامِل ہونا چاہنا ایں تے جا کے اپنا سبھ کُجھ ویچ تے غرِیباں نُوں دے تے تینُوں اسمان اُتّے خزانہ مِلے گا۔ تَد آ کے میرے مگر ٹُر پَو۔

²² جد اوس جوان ایہہ گلّ سُنی تَد اُداس ہو کے ٹُر گیا۔ کیوں جو اوہ بڑا مالدار سی۔

²³ تَد یِسُوع اپنے شاگِرداں نُوں آکھیا مَیں تُہانوں سَچ آکھنا آں پئی دَولتمند بندہ اسمان دی بادشاہی وِچ مُشکل نال داخل ہوئے گا۔

²⁴ تے فیر مَیں تُہانوں آکھنا آں پئی سُوئی دے نکّے وِچوں اُوٹھ دا لنگھناں ایس نالوں سوکھالا اے پئی دَولتمند بندہ خُدا دی بادشاہی وِچ داخل ہوئے۔

²⁵ ایہہ سُن کے شاگِرد بڑے حَیران ہوئے تے آکھن لگّے فیر کون نجات پا سکدا اے؟

²⁶ یِسُوع اوہناں چَنگا ویکھ کے آکھیا بندیاں توں ایہہ گلّ اَنہونی اے۔ پر خُدا توں سبھ کُجھ ہوسکدا اے۔

²⁷ تَد پطرس نے جواب دِتّا۔ ویکھ اساں سبھ کُجھ چھڈیا تے تیرے مگر ٹُر پئے آں فیر سانُوں کِیہ مِلے گا؟

²⁸ یِسُوع اوہناں نُوں آکھیا مَیں تُہانوں سَچ آکھنا آں پئی جد اِبنِ آدم نَوِیں پَیدایش وِچ اپنے جلال دے تخت اُتّے بَہے گا تُسی وی جیہڑے میرے مگر ٹُر پئے ہو باراں تختاں اُتّے بَہو گے تے اِسرائیل دے باراں گھرانیاں دی عدالت کرو گے۔

²⁹ تے جِنہاں گھراں یا بھراواں یا بھیناں یا ماپیاں یا بال بچّیاں یا زمین نُوں میرے ناں دی خاطر چھڈ دِتّا اے اوہنوں سَو حِصّے وَدّھ مِلے گا۔ تے اوہ ہمیشہ دی زِندگی دا وارث ہوئے گا۔

³⁰ پر بتھیرے جیہڑے پِچّھلے نیں پہلے ہون گے۔ تے پہلے پِچّھلے ہون گے۔