متّی 16 - پنجابی نواں عہد نامہ نظرثانی شدہ چھپائی

اسمانی نِشان دا مطالبہ

¹ فیر فرِیسیاں تے صدوقیاں آ کے اوہدے ازمان لئی اوہدے اگّے عرض کِیتی پئی سانُوں اسمانوں اِک نِشان وکھا۔

² پر اوس اوہناں نُوں جواب دِتّا پئی ”جد شام پَیندی اے تُسی آکھدے ہو کھرا ہو جائے گا۔ کیوں جو اسمان لال اے۔“

³ تے سرگھی ویلے آکھدے ہو۔ ”پئی اَج ہنیری وگے گی کیوں جو اسمان لال تے گہرا اے۔“ اسمان دی ڈول دی جاچ کرنی تُہانوں آؤندی اے پر سمیاں دے نِشان تُسی معلُوم نئیں کر سکدے؟

⁴ بُرے تے زناکار لوک نِشان لبّھدے نیں۔ پر ایہناں نُوں یُوناہ دے نِشان دے سِوا کوئی نِشان دِتّا نا جائے گا تے اوہ اوہناں نُوں چھڈ کے ٹُرگیا۔

فرِیسیاں تے صدوقیاں دا خمیر

⁵ تے شاگِرد پار پہنچے تے روٹی نال لینی بُھل گئے سن۔

⁶ تے یِسُوع نے اوہناں نُوں آکھیا خبردار فرِیسیاں تے صدوقیاں دے خمیر توں ہُشیار رہو۔

⁷ تے اوہ آپو وِچ وچار کر کے آکھن لگّے اسی روٹی جو نئیں لیائے۔

⁸ پر یِسُوع ایہہ معلُوم کر کے آکھیا اَے تھوڑے اِیمان والیو تُسی کیوں آپو وِچ وچار کر دے ہو پئی روٹی اسی نال نئیں لیائے۔

⁹ اجے تُسی نئیں سمجھدے؟ تے پنجاں ہزاراں تے پنجاں روٹِیاں دی گلّ تُہانوں یاد نئیں نالے ایہہ پئی کِنیاں ٹوکریاں تُساں چُکیاں سن؟

¹⁰ تے نا اوہناں چَوہاں ہزاراں دِیاں ستّاں روٹِیاں دی گلّ۔ تے تُساں کِنے ٹوکرے چُک لَئے سن۔

¹¹ تُسی کیوں نئیں سمجھدے ہو پئی مَیں تُہاڈے نال روٹِیاں دی گلّ نئیں کِیتی سی؟ پر فرِیسیاں تے صدوقیاں دے خمیر توں ہُشیار رہو۔

¹² تَد اوہناں نُوں سمجھ آئی پئی اوس روٹی دے خمیر توں نئیں پر فرِیسیاں تے صدوقیاں دی تعلِیم توں ہُشیار رہن نُوں آکھیا سی۔

یِسُوع لئی پطرس دا اِقرار

¹³ تے یِسُوع نے قَیصریہ فِلپّی دے علاقے وِچ آ کے اپنے شاگِرداں نُوں پُچھیا پئی لوک کِیہ آکھدے نیں پئی اِبنِ آدم کون اے؟

¹⁴ اوہ آکھن لگّے کئی تے یُوحنّا بپتِسمہ دین والا آکھدے نیں تے کئی ایلیّاہ تے ہور یِرمیاہ یا نبیاں وِچوں کوئی اِک۔

¹⁵ اوہ اوہناں نُوں آکھن لگّا پر تُسی کِیہ آکھدے ہو پئی مَیں کون آں؟

¹⁶ شمعُون پطرس نے جواب دے کے آکھیا۔ تُوں تے مسِیح ایں زِندہ خُدا دا پُتر۔

¹⁷ یِسُوع اوہنوں جواب دے کے آکھیا دھنّ ایں تُوں شمعُون یُوناہ دے پُتر کیوں جو جِسم تے لہو ایہہ گلّ تینُوں نئیں دسی پر میرے باپ جیہٹرا اسماناں وِچ اے۔

¹⁸ تے مَیں وی تینُوں آکھنا آں پئی تُوں پطرس ایں تے مَیں ایس پتّھر اُتّے اپنی کلِیسیا بناواں گا تے پاتال دا اوہدے اُتّے وَس نا چلّے گا۔

¹⁹ مَیں اسمان دی بادشاہی دِیاں کُنجیاں تینُوں دیاں گا۔ تاں جو کُجھ تُوں زمین اُتّے بنھے گا اسمان وِچ بَدّھا جائے گا تاں جو کُجھ تُوں زمین اُتّے کھولیں گا اسمان وِچ کھولیا جائے گا۔

²⁰ تَد اوس شاگِرداں نُوں پَکّی کِیتی پئی کِسے نُوں نا آکھن پئی اوہ مسِیح اے۔

یِسُوع اپنے دُکھ سہن تے مَوت ولّوں دسدا اے

²¹ اوس ویلے توں یِسُوع اپنے شاگِرداں نُوں دسن لگّا پئی ضرُور اے۔ پئی مَیں یرُوشلِیم نُوں جاواں تے بزُرگاں تے سردار کاہِناں تے فقِیہاں کولوں بُہت دُکھ جھلّاں تے ماریا جاواں تے ترِیجے دِہاڑے جی اُٹھاں۔

²² تَد پطرس اوہنوں اِک پاسے لے جا کے جِھڑکن لگّا تے آکھیا اَے خُداوندا تیری خَیر ہوئے۔ ایہہ تیرے نال کدی نا ہوئے گا۔

²³ اوس پرت کے پطرس نُوں آکھیا اوہ شیطاناں پِچّھے ہَٹ تُوں میرے لئی ٹھوکر ایں کیوں جو تُوں خُدا دی نئیں پر بندیاں دِیاں گلّاں دا دھیان رکھنا ایں۔

²⁴ تَد یِسُوع نے اپنے شاگِرداں نُوں آکھیا۔ جے کوئی میرے پِچّھے آؤنا چاہے تے اپنے آپ دا اِنکار کرے تے اپنی صلِیب چُک کے میرے مگر ٹُر پئے۔

²⁵ کیوں جو جیہڑا کوئی اپنی جان بچانی چاہے اوہ اوہنوں گوائے گا پر جیہڑا کوئی میرے لئی اپنی جان گوا دیوے اوہ اوہنوں لَبھّے گا۔

²⁶ بندے نُوں کِیہ فائدہ اے جے ساری دُنیا نُوں کماوے تے اپنی جان نُوں گوا دیوے؟ تے بندہ اپنی جان دے بدلے کِیہ دیوے گا؟

²⁷ کیوں جو اِبنِ آدم اپنے باپ دے جلال وِچ اپنے فرِشتیاں دے نال آوے گا۔ تے اوس ویلے ہر اِک نُوں اوہدی کرنی دے سبّبوں پَھل دیوے گا۔

²⁸ مَیں تُہانوں سَچ آکھنا آں پئی ایہناں وِچوں جیہڑے ایتھے کھلوتے ہوئے نیں کئی نیں جیہڑے مَوت دا سواد نا لین گے۔ جد تِیکر اِبنِ آدم نُوں اوہدی بادشاہی وِچ آؤندیاں نا ویکھ لین گے۔