لُوقا 3 - پنجابی نواں عہد نامہ نظرثانی شدہ چھپائی

یُوحنّا بپتِسمہ دین والے دی منادی

¹ تِبرِیُس قَیصر دے راج دے پندرھویں ورھے وِچ جِس ویلے پُنطِیُس پِیلاطُس یہُودیہ دا حاکم سی۔ تے ہیرودیس گلِیل دا حاکم سی تے اوہدا بھرا فِلپُّس اِتُوریہَّ تے ترخونیتِس دے مُلک دا۔ تے لِسانیاس اَبِلینے دا حاکم سی۔

² جدوں حنّا تے کائفا سردار کاہِن سن اوس ویلے خُدا دا کلام زکریاہ دے پُتر یُوحنّا اُتّے اُجاڑ وِچ اُتریا۔

³ تے اوہ یَردن دے سارے آلے دوالے دے دیس وِچ آ کے گُناہاں دی مُعافی لئی تَوبہ دے بپتِسمہ دی منادی کرن لگّا۔

⁴ جیویں یسعیاہ نبی دے کلام دی کتاب وِچ لِکھیا ہویا اے۔ پئی اُجاڑ وِچ ہوکا دین والے دی اواز۔ خُداوند دی راہ نُوں تیار کرو اوہدے رستیاں نُوں سِدّھیاں بناؤ۔

⁵ ہر اِک کھڈ بھری جائے گی تے ہر اِک پہاڑ تے ٹِبّا نِیواں کِیتا جائے گا۔ تے جیہڑا ڈِنگا اے۔ سِدّھا تے اُچّا نِیواں اے پدرا بنے گا۔

⁶ تے ساری خلقت خُدا دی نجات ویکھے گی۔

⁷ تَد اوہناں بِھیڑاں نُوں جیہڑیاں اوہدے ہتھّوں بپتِسمہ لین لئی نِکل آئِیاں سن اوہ آکھن لگّا اے سپّاں دے بچّیو تُہانوں کِس دسیا پئی آن والے غضب توں بھجو۔

⁸ سو تَوبہ دے لائق پَھل لیاؤ تے اپنے مَناں وِچ ایہہ نا آکھو پئی ابرہام ساڈا پئیو اے۔ ایس لئی مَیں تُہانوں آکھنا آں پئی ابرہام دے لئی خُدا ایہناں پتّھراں توں اولاد پَیدا کر سکدا اے۔

⁹ تے نالے ہُن رُکھّاں دی جڑ اُتّے کُہاڑا دھریا ہویا اے۔ سو جیہڑا رُکھّ چَنگا پَھل نئیں لیاؤندا اوہ وَڈّھیا جاندا تے اَگ وِچ سُٹّیا جاندا اے۔

¹⁰ تے لوکاں اوہدے توں ایہہ پُچھیا پئی اسی فیر کِیہ کریئے؟

¹¹ اوس اوہناں نُوں جواب دِتّا پئی جِہدے کول دو جَھگّے ہون اوہ اوہنوں دے دیوے جِہدے کول نئیں اے۔ تے جِہدے کول کھان نُوں ہوئے اوہ وی اینج ای کرے۔

¹² تے محصُولئے وی بپتِسمہ لین نُوں آئے تے اوہنوں آکھیا اَے اُستاد اسی کِیہ کریئے؟

¹³ اوس اوہناں نُوں آکھیا جیہڑا تُہاڈے لئی مُقرّر اے۔ اوہدے توں وَدّھ نا لوؤ۔

¹⁴ تے سپاہیاں وی اوہدے کولوں پُچھیا پئی اسی کِیہ کریئے؟ اوس اوہناں نُوں آکھیا کِسے اُتّے ظُلم نا کرو کِسے کولوں ناحق نا لوؤ۔ تے اپنی تنخواہ اُتّے راضی رہو۔

¹⁵ تے جد لوک اُڈِیک وِچ سن تے سبھے یُوحنّا دی بابت اپنے دِلاں وِچ سوچدے سن پئی شاید ایہہ مسِیح نا ہوئے۔

¹⁶ تَد یُوحنّا نے سبھناں نُوں جواب دِتّا مَیں تے تُہانوں پانی نال بپتِسمہ دینا آں۔ پر میرے نالوں اِک ودِھیک طاقت والا آؤندا اے۔ جِہدی جُتّی دی مَیں وَدّھری کھولن جوگا نئیں آں۔ اوہ تُہانوں پاک رُوح تے اَگ نال بپتِسمہ دیوے گا۔

¹⁷ اوہدا چھج اوہدے ہتّھ وِچ اے۔ پئی اوہ اپنے کھلواڑے نُوں چنگی طرح صاف کرے۔ تے دانے اپنی کوٹھی وِچ جمع کرے تے تُوڑی نُوں اوس اَگ نال ساڑے گا۔ جیہڑی بُجھّن والی نئیں اے۔

¹⁸ تے اوہ بتھیریاں ہور نصِیحتاں دے دے کے لوکاں نُوں خُوشخبری سُناندا رہیا۔

¹⁹ پر چوتھائی مُلک دے حاکم ہیرودیس نے۔ جد یُوحنّا اوہدے بھرا دی گھر والی ہیرودیاس دی بابت تے اوہناں سارِیاں بُرائیاں دی بابت جیہڑیاں ہیرودیس کِیتیاں سن اوہنوں ملامت کِیتی۔

²⁰ سبھناں توں وَدّھ ایہہ بُریائی وی کِیتی۔ پئی یُوحنّا نُوں قیدے پایا۔

یِسُوع دا بپتِسمہ

²¹ جد ساریاں لوکاں بپتِسمہ لے لیا سی۔ تے یِسُوع وی بپتِسمہ لے کے دُعا پیا منگدا سی۔ تے ایویں ہویا پئی اسمان کُھل گیا۔

²² تے رُوحُ القُدس کبُوتر وانگر اوہدے اُتّے اُتریا تے اسمان توں اِک اواز آئی۔ پئی ”تُوں میرا پیارا پُتر ایں تَیتھوں مَیں راضی ہاں۔“

یِسُوع دے وڈوڈیرے

²³ تے جد یِسُوع آپ سکھالن لگّا تدوں اوہ تیہیاں ورھیاں دا سی۔ تے اوہ (لوکاں دی سمجھ وِچ) یُوسف دا پُتر سی۔ تے اوہ عیلی دا۔

²⁴ تے اوہ متّات دا۔ تے اوہ لاوی دا۔ تے اوہ ملکی دا۔ تے اوہ ینّا دا۔ تے اوہ یُوسف دا۔

²⁵ تے اوہ مَتّتِیاہ دا۔ تے اوہ عامُوس دا۔ تے اوہ ناحُوم دا۔ تے اوہ اسلیاہ دا۔ تے اوہ نوگہ دا۔

²⁶ تے اوہ ماعَت دا۔ تے اوہ مَتّتِیاہ دا۔ تے اوہ شِمعی دا۔ تے اوہ یوسیخ دا۔ تے اوہ یوداہ دا۔

²⁷ تے اوہ یُوحنّا دا۔ تے اوہ ریسا دا۔ تے اوہ زَرُبّابُل دا۔ تے اوہ سیالتی ایل دا۔ تے اوہ نیری دا۔

²⁸ تے اوہ ملکی دا۔ تے اوہ اَدّی دا۔ تے اوہ قوسام دا۔ تے اوہ اِلمودام دا۔ تے اوہ عیر دا۔

²⁹ تے اوہ یشُوع دا۔ تے اوہ الیعزر دا۔ تے اوہ یورِیم دا۔ تے اوہ متّات دا۔ تے اوہ لاوی دا۔

³⁰ تے اوہ شمعُون دا۔ تے اوہ یہُوداہ دا۔ تے اوہ یُوسف دا۔ تے اوہ یُونان دا۔ تے اوہ اِلیاقِیم دا۔

³¹ تے اوہ مِلے آہ دا۔ تے اوہ مِنّاہ دا۔ تے اوہ متَّتاہ دا۔ تے اوہ ناتن دا۔ تے اوہ داؤد دا۔

³² تے اوہ یسّی دا۔ تے اوہ عوبید دا۔ تے اوہ بوعز دا۔ تے اوہ سلمون دا۔ تے اوہ نحسون دا۔

³³ تے اوہ عمّینداب دا۔ تے اوہ ارنی دا۔ تے اوہ حِصرُون دا۔ تے اوہ فارص دا۔ تے اوہ یہُوداہ دا۔

³⁴ تے اوہ یعقُوب دا۔ تے اوہ اِضحاق دا۔ تے اوہ ابرہام دا۔ تے اوہ تارہ دا۔ تے اوہ نحُور دا۔

³⁵ تے اوہ سرُوج دا۔ تے اوہ رعُو دا۔ تے اوہ فلج دا۔ تے اوہ عِبر دا۔ تے اوہ سلح دا۔

³⁶ تے اوہ قینان دا۔ تے اوہ اَرفکسد دا۔ تے اوہ سِم دا۔ تے اوہ نُوح دا۔ تے اوہ لمک دا۔

³⁷ تے اوہ متُوسِلح دا۔ تے اوہ حنوک دا۔ تے اوہ یارِد دا۔ تے اوہ مَہلل ایل دا۔ تے اوہ قینان دا۔

³⁸ تے اوہ انُوس دا۔ تے اوہ سیت دا۔ تے اوہ آدم دا۔ تے اوہ خُدا دا سی۔