یُوحنّا 21 - پنجابی نواں عہد نامہ نظرثانی شدہ چھپائی

یِسُوع سَتّ شاگِرداں تے ظاہر ہوندا اے

¹ ایہناں گلّاں دے پِچّھوں یِسُوع فیر تِبریاس دے سمُندر اُتّے اپنے آپ نُوں شاگِرداں اُتّے ظاہر کِیتا۔ تے اوس ایس طرح ظاہر کِیتا۔

² شمعُون پطرس تے تُوما جِہنُوں جوڑا آکھدے نیں۔ تے گلِیل دے قانا دا نتنی ایل تے زبدی دے پُتر تے اوہدے شاگِرداں وِچوں دو ہور اکٹّھے ہوئے ہوئے سن۔

³ شمعُون پطرس اوہناں نُوں آکھیا مَیں مچھّیاں پھڑن جانا آں۔ اوہ اوہنوں آکھن لگّے۔ اسی وی تیرے نال چلنے آں۔ اوہ باہر نِکلے تے بیڑی اُتّے چڑھ بَیٹھے تے اوس رات کُجھ نا پھڑیا۔

⁴ پر جد دِن چڑھن لگّا یِسُوع کنڈھے اُتّے آ کے کھلو گیا پر شاگِرد نئیں سن جان دے پئی ایہہ یِسُوع اے۔

⁵ تَد یِسُوع اوہناں نُوں آکھیا اَے بچّیو! تُہاڈے کول کُجھ کھان نُوں اے؟ اوہناں اوہنوں جواب دِتّا پئی نئیں۔

⁶ اوس اوہناں نُوں آکھیا بیڑیوں سَجّے پاسے جال سُٹّو تاں پھڑو گے۔ سو اوہناں سُٹّیا تے ہُن بتھیریاں مچھّیاں دے سبّب کر کے اوہ اوہنوں کھِچّ نا سکے۔

⁷ ایس لئی اوہ شاگِرد جِہنُوں یِسُوع پیار کر دا سی پطرس نُوں آکھن لگّا ایہہ تے خُداوند اے۔ سو جد شمعُون پطرس ایہہ سُنیا پئی ایہہ خُداوند اے تَد اپنا کپڑا لکّ نال بَنّھ لیا کیوں جو ننگا سی تے سمُندر وِچ چھال ماری۔

⁸ پر ہور شاگِرد مچھّیاں دا جال کھِچّدے ہوئے نِکّی بیڑی وِچ آئے ایس لئی پئی اوہ کنڈھے توں دُراڈے نئیں سن پر دوکوُ سَو ہتّھ دی وِتھ سی۔

⁹ سو جد اوہ کنڈھے اُتّے اُترے۔ کولیاں دی اَگ دھری ویکھی تے اوہدے اُتّے مچّھی رکھی ہوئی تے نال روٹی۔

¹⁰ یِسُوع اوہناں نُوں آکھیا جیہڑیاں مچھّیاں تُساں ہُن پَھڑیاں نیں اوہناں وِچوں لیاؤ۔

¹¹ سو شمعُون پطرس بیڑی اُتّے چڑھ کے جال نُوں زمین اُتّے کھِچّیا۔ تے اوہ اِک سَو ترونجاں وڈّیاں مچھّیاں نال بھریا ہویا سی۔ تے بھانویں اینِیاں سارِیاں سن پر جال نا ٹُٹّا۔

¹² یِسُوع اوہناں نُوں آکھیا آؤ روٹی کھاؤ تے شاگِرداں وِچوں کِسے نُوں پچُھّن دی دلیری نا ہوئی پئی تُوں کون ایں؟ کیوں جو اوہ جان دے سن پئی اوہ خُداوند ای اے۔

¹³ یِسُوع آ کے روٹی لئی تے اوہناں نُوں دِتّی ایسے طرح مچّھی وی۔

¹⁴ ہُن ایہہ ترِیجی وار اے پئی یِسُوع مُردیاں وِچوں جی اُٹھن دے پِچّھوں شاگِرداں نُوں وکھالی دِتّی۔

یِسُوع تے پطرس

¹⁵ سو جد اوہناں کھالیا۔ یِسُوع نیں شمعُون پطرس نُوں آکھیا۔ اَے شمعُون یُوحنّا دے پُتر تُوں ایہناں توں میرے نال وَدّھ مُحبّت رکھنا ایں؟ تے اوس اوہنوں آکھیا اَے خُداوند تُوں تے جاننا ایں پئی مَیں تینُوں پیار کرنا آں اوس اوہنوں آکھیا میرے لیلے چار۔

¹⁶ فیر دُوجی وار اوہنوں آکھیا اَے شمعُون یُوحنّا دے پُتر توں میرے نال مُحبّت رکھنا ایں؟ اوس اوہنوں آکھیا خُداوند تُوں تے جاننا ایں پئی مَیں تینُوں پیار کرنا ہاں۔ اوس اوہنوں آکھیا میرِیاں بھیڈاں نُوں پال۔

¹⁷ اوس اوہنوں ترِیجی وار آکھیا اَے شمعُون یُوحنّا دے پُتر تُوں مَینُوں پیار کرنا ایں؟ ایس گلّے پئی اوس ترِیجی وار اوہنوں آکھیا تُوں مَینُوں پیار کرنا ایں؟ پطرس اُداس ہویا تے اوہنوں آکھیا اَے خُداوند تُوں ای سبھ کُجھ جاننا ایں تینُوں معلُوم اے پئی مَیں تینُوں پیار کرنا آں۔ یِسُوع اوہنوں آکھیا میرِیاں بھیڈاں نُوں چار۔

¹⁸ مَیں تینُوں سَچ سَچ آکھنا آں جد تُوں جوان سَیں تُوں اپنا لکّ آپ بنھدا تے جِتّھے جی کر دا سی ٹُردا پِھردا سَیں۔ پر جدوں تُوں بُڈّھا ہوویں گا تَد اپنے ہتّھ پَساریں گا تے دُوجا تیرا لکّ بنھے گا تے جِتّھے تیرا جی نئیں کر دا اوتھے تینُوں چُک لے جائے گا۔

¹⁹ اوس ایس گلّ نال اشارہ کِیتا پئی اوہ کیہڑی مَوت نال خُدا دی وڈیائی کرے گا تے ایہہ آکھ کے آکھیا میرے مگر آ۔

یِسُوع تے دُوجا شاگِرد

²⁰ پطرس پِچھّاں مُڑ کے اوس شاگِرد نُوں جِہنُوں یِسُوع پیار کر دا سی مگر آؤندیاں ویکھیا جِس رات دی روٹی ویلے وی اوہدی ہِک اُتّے ڈھاسنا لائیاں ہویاں آکھیا سی ”اَے خُداوند اوہ کون اے جیہڑا تینُوں پھڑواؤندا اے؟“

²¹ سو پطرس اوہنوں ویکھ کے یِسُوع نُوں آکھیا اَے خُداوند اوہدا کِیہ ہوئے گا؟

²² یِسُوع اوہنوں آکھیا جے میری مرضی ہوئے پئی ایہہ میرے آؤن تِیکر اے تے تینُوں کِیہ؟ تُوں میرے مگر آ

²³ تَد بھراواں وِچ ایہہ گلّ مشہُور ہوگئی پئی اوہ شاگِرد نا مرے گا پر یِسُوع اوہنوں ایہہ نئیں سی آکھیا پئی ایہہ نا مرے گا پر ایہہ پئی جے میری مرضی ہوئے پئی ایہہ میرے آؤن تِیکر اے تے تینُوں کِیہ؟

²⁴ ایہہ اوہو ای شاگِرد اے جیہڑا اوہناں گلّاں دی گواہی دیندا اے تے جِس ایہہ گلّاں لِکھیاں۔ تے اسی جاننے آں پئی اوہدی گواہی سَچّی اے۔

اخِیر

²⁵ تے ہور ڈھیر سارے کمّ نیں جیہڑے یِسُوع کِیتے۔ جے اوہ وَکھو وکھرے لِکھے جاندے تے مَیں سمجھنا آں پئی جیہڑیاں کِتاباں لِکھیاں جاندِیاں اوہ دُنیا وِچ نا سماندِیاں۔