یُوحنّا 14 - پنجابی نواں عہد نامہ نظرثانی شدہ چھپائی

یِسُوع پئیو دے کول جان دا راہ

¹ تُہاڈا دِل نا گھبرائے۔ تُسی خُدا اُتّے یقِین کر دے ہو میرے اُتّے وی یقِین کرو۔

² میرے باپ دے گھر وِچ بتھیرے مکان نیں جے ناں ہوندے تے مَیں تُہانوں آکھ دیندا کیوں جو مَیں تُہاڈے لئی تھاں تیار کرن جاناں آں۔

³ تے جے مَیں جا کے تُہاڈے لئی تھاں تیار کراں مَیں مُڑ آ کے تُہانوں اپنے نال لے لاں گا پئی جِتّھے مَیں آں تُسی وی ہوؤ۔

⁴ تے جِتّھے مَیں جاناں آں تُہانوں راہ معلُوم اے۔

⁵ تُوما اوہنوں آکھیا اَے خُداوند سانُوں معلُوم نئیں پئی تُوں کِتّھے جاناں ایں۔ سانُوں راہ کِیویں معلُوم ہوئے۔

⁶ یِسُوع اوہنوں آکھیا مَیں ای راہ تے سچیائی تے زِندگی آں۔ میرے بِناں کوئی باپ دے کول نئیں آؤندا۔

⁷ جے تُسی مَینُوں جان دے تے میرے باپ نُوں وی جان دے۔ تے ہُن توں تُسی اوہنوں جان دے ہو۔ تے اوہنوں ویکھ لیا اے۔

⁸ فِلپُّس اوہنوں آکھیا اَے خُداوند سانُوں باپ وکھا تے سانُوں ایہو ای بس اے۔

⁹ یِسُوع اوہنوں آکھیا اَے فِلپُّس مَیں اینے چِر دا تُہاڈے نال آں تے تُوں مَینُوں نئیں جان دا؟ جِس مَینُوں ویکھیا اے اوس باپ نُوں ویکھ لیا اے۔ تے تُوں کِیویں آکھنا ایں پئی باپ سانُوں وکھال؟

¹⁰ تُوں سَچ نئیں مَن دا پئی مَیں باپ وِچ آں تے باپ میرے وِچ اے؟ جیہڑیاں گلّاں مَیں تُہانوں آکھنا آں مَیں اپنے ولّوں نئیں آکھدا۔ پر باپ میرے وِچ رہ کے اپنے کمّ کر دا اے۔

¹¹ مَینُوں مَنّو پئی مَیں باپ وِچ آں تے باپ میرے وِچ اے۔ جے ایویں نئیں تے اوہناں کمّاں دے سبّب ای مَینُوں مَنّو۔

¹² مَیں تُہانوں سَچ سَچ آکھنا آں پئی اوہ جیہڑا میرے اُتّے اِیمان لیاؤندا اے جیہڑے کمّ مَیں کرنا آں اوہ وی کرے گا۔ تے ایہناں نالوں وی وڈّے کرے گا کیوں جو مَیں باپ کول جاناں آں۔

¹³ تاں جو کُجھ تُسی میرا ناں لے کے منگو گے مَیں اوہ کراں گا تاں جو پُتر وِچ باپ نُوں جلال مِلے۔

¹⁴ جے تُسی میرا ناں لے کے میرے کولوں کُجھ منگو گے مَیں اوہ کراں گا۔

رُوحُ القُدس دا وعدہ

¹⁵ جے تُسی مَینُوں پیار کر دے ہو تاں میرے حُکماں نُوں مَنّو گے۔

¹⁶ تے مَیں باپ کول عرض کراں گا تے اوہ تُہانوں دُوجا مددگار بخشے گا پئی اوہ سدا تُہاڈے نال ہوئے۔

¹⁷ یعنی سچیائی دا رُوح جِہنُوں دُنیا نئیں پا سکدی کیوں جو اوہ نا اوہنوں ویکھدی اے تے نا اوہنوں جاندی اے۔ تُسی اوہنوں جان دے ہو کیوں جو اوہ تُہاڈے نال رہندا اے تے تُہاڈے وِچ ہوئے گا۔

¹⁸ مَیں تُہانوں یتِیم نا چھڈاں گا۔ مَیں تُہاڈے کول آواں گا۔

¹⁹ اجے تھوڑا چِر اے تے دُنیا مَینُوں فیر نا ویکھے گی پر تُسی ویکھدے رہو گے ایس کر کے پئی مَیں جِیونا آں تُسی وی جیوگے۔

²⁰ اوس دِن تُسی جانو گے پئی مَیں اپنے باپ وِچ آں تے تُسی میرے وِچ تے مَیں تُہاڈے وِچ۔

²¹ جِہدے کول میرے حُکم نیں تے اوہ اوہناں نُوں مَندا اے اوہ ای اے جیہڑا مَینُوں پیار کر دا اے تے جیہڑا مَینُوں پیار کر دا اے میرے باپ دا پیارا ہوئے گا تے مَیں اوہنوں پیار کراں گا۔ تے اپنے آپ نُوں اوہدے اُتّے ظاہر کراں گا۔

²² اوس یہُوداہ نیں جیہڑا اِسکریُوتی نئیں سی اوہنوں آکھیا اَے خُداوند ایہہ کِیہ ہویا اے پئی تُوں اپنا آپ ساڈے اُتّے ظاہر کریں گا تے دُنیا اُتّے نئیں۔

²³ یِسُوع اوہنوں جواب دِتّا جے کوئی مَینُوں پیار کر دا اے اوہ میرے کلام نُوں مَنّے گا۔ تے میرا باپ اوہنوں پیار کرے گا۔ تے اسی اوہدے کول آواں گے تے اوہدے نال رہاں گے۔

²⁴ اوہ جیہڑا مَینُوں پیار نئیں کر دا اوہ میرے کلام نُوں نئیں مَن دا۔ تے جیہڑا کلام تُسی سُندے ہو میرا نئیں پر باپ دا اے جِس مَینُوں گھلّیا۔

²⁵ ایہہ گلّاں مَیں تُہاڈے نال رہندیاں تُہانوں آکھیاں نیں۔

²⁶ پر مددگار جیہڑا پاک رُوح اے جِہنُوں باپ میرے ناں اُتّے گھلّے گا اوہو تُہانوں سبھ کُجھ سکھالے گا۔ تے جو کُجھ مَیں تُہانوں آکھیا اے تُہانوں یاد کرا دے گا۔

²⁷ سُکھ مَیں تُہانوں دیئی جاناں آں۔ اپنا سُکھ مَیں تُہانوں دینا آں۔ جیویں دُنیا دیندی اے اوس طرح تُہانوں نئیں دیندا۔ تُہاڈا دِل نا گھبرائے تے نا ڈرے۔

²⁸ تُساں سُن لیا اے پئی مَیں تُہانوں آکھیا پئی مَیں جاناں تے تُہاڈے کول فیر آؤناں آں۔ جے تُسی مَینُوں پیار کر دے تے خُوش ہوندے پئی مَیں باپ کول جاناں آں کیوں جو باپ مَیتھوں وَڈا اے۔

²⁹ تے ہُن مَیں تُہانوں اوہدے ہون توں پہلاں ای دس چھڈیا اے تاں جو جد اوہ ہو لَوے تُسی اِیمان لیاؤ۔

³⁰ ایدوں پِچّھوں مَیں تُہاڈے نال بُہت گلّاں نا کراں گا کیوں جو دُنیا دا سردار آؤندا اے تے میرے وِچ اوہدا کُجھ نئیں اے۔

³¹ ایہہ ایس لئی ہوندا اے۔ تاں جو دُنیا جانے پئی مَیں باپ نُوں پیار کرنا آں تے جیویں باپ نے مَینُوں حُکم دِتّا اوسے طرح مَیں کرنا آں۔ اُٹھو ایتھوں چلّئے۔