یعقُوب 4 - پنجابی نواں عہد نامہ نظرثانی شدہ چھپائی

دُنیا نال دوستی

¹ تُہاڈے وِچ لڑائِیاں تے جھگڑے کِتّھوں آ گئے نیں ایہہ اوہناں خواہشاں توں نئیں جیہڑیاں تُہاڈے انگاں وِچ فساد کر دِیاں نیں؟

² تُسی خواہش کر دے ہو پر تُہانوں مِلدا نئیں۔ خُون تے ساڑا کر دے ہو پر کُجھ تُہانوں لَبّھدا نئیں تُسی لڑدے تے جھگڑ دے ہو۔ تُہانوں ایس لئی نئیں مِلدا پئی منگدے نئیں۔

³ تُسی منگدے ہو پر نئیں مِلدا۔ ایس لئی پئی بُری نِیّت نال منگدے ہو تاں جو اپنی خُوشی وِچ خرچ کرو۔

⁴ زنا کرن والیو! تُسی نئیں جاندِیاں پئی دُنیا دی یاری خُدا دا وَیر اے؟ سو جیہڑا دُنیا دا یار بننا چاہندا اے اوہ اپنے آپ نُوں خُدا دا وَیری بناندا اے۔

⁵ تُسی ایہہ سمجھدے ہو پئی پاک کتاب ایویں آکھدی اے؟ پئی رُوح جیہڑا ساڈے وِچ اوس وسایا اے اوہ غیرت نال چاہ کر دا اے؟

⁶ اوہ تے بُہتا فضل دیندا اے۔ ایس لئی ایہہ لِکھیا ہویا اے۔ پئی خُدا مغرُوراں دا سامنا کر دا اے۔ تے حلِیماں نُوں فضل دیندا اے۔

⁷ سو خُدا دے تابعیاں ہو جاؤ تے ابلیس نال لڑائی کرو تے اوہ تُہاڈے توں بھج جائے گا۔

⁸ خُدا دے نیڑے جاؤ تے اوہ تُہاڈے نیڑے آوے گا۔ گُناہیو۔ اپنے ہتّھاں نُوں صاف کرو تے دو دِلیؤ اپنے دِلاں نُوں پاک کرو۔

⁹ افسوس تے سیاپا کرو تے روؤ تُہاڈا ہاسا سیاپا ہو جائے تے تُہاڈی خُوشی اُداسی ہو جائے۔

¹⁰ خُدا اگّے نِیویں ہوؤ۔ تے اوہ تُہانوں اُچّا کرے گا۔

اِک دُوجے دی عیب جوئی دے خلاف خبرداری

¹¹ بھراؤ! اِک دُوجے دی بدگوئی نا کرو۔ جیہڑا اپنے بھرا دی بدگوئی کر دا اے یا الزام لاندا اے اوہ شریعت دی بدگوئی کر دا اے تے شریعت اُتّے الزام لاندا اے۔ جے تُوں شریعت اُتّے الزام لانا ایں تے تُوں شریعت اُتّے عمل نئیں کِیتا۔ سگوں اوہدے اُتّے حاکم بنیا۔

¹² شریعت دا دین والا تے حاکم اِکّو اے جیہڑا بچا سکدا اے۔ تے مار وی سکدا اے۔ تُوں کون ایں جیہڑا اپنے گواہنڈی اُتّے الزام لانا ایں؟

شیخی دے خلاف خبرداری

¹³ تُسی جیہڑے ایہہ آکھدے ہو پئی اسی اَج تے بھلکے فلانے شہر وِچ جاواں گے تے اوتھے وَرھا رہاں گے۔ تے سوداگری کر کے نفع لاں گے۔

¹⁴ تے ایہہ نئیں جان دے پئی کل کِیہ ہوئے گا۔ تُہاڈی زِندگی شے ای کِیہ اے۔ ہواڑ جِہیا حال اے ہُن دسی ہُنے گواچ گئی۔

¹⁵ تُہانوں سگوں ایہہ آکھنا چاہیدا اے پئی جے خُداوند چاہے تے اسی جِیوندے وی رہاں گے۔ تے ایہہ یا اوہ کمّ وی کراں گے۔

¹⁶ پر ہُن تُسی اپنیاں شیخیاں دا فخر کر دے ہو۔ پر تُہاڈا فخر بَھیڑا اے۔

¹⁷ سو جیہڑا بھلا کرنا جان دا اے تے نئیں کر دا اوہ گُناہ کر دا اے۔