یعقُوب 3 - پنجابی نواں عہد نامہ نظرثانی شدہ چھپائی

زبان دی خاصیت

¹ میرے بھراؤ! تُہاڈے وِچوں بتھیرے اُستاد نا بنن کیوں جو اسی جاننے آں۔ پئی اسی جیہڑے اُستاد آں وَدّھ سزا پاں گے۔

² ایس واسطے پئی اسی سارے دے سارے قصور کرنے آں۔ کامِل بندہ اوہ اے جیہڑا گلّاں وِچ قصور نا کرے اوہ سارے بدن نُوں وی قابُو وِچ رکھ سکدا اے۔

³ جد اسی اپنے قابُو وِچ لیاؤن واسطے گھوڑیاں دے مُنھ وِچ لگام چاہڑنے آں تے اوہناں دے سارے بدن نُوں وی ایدھر اودھر پِھرا سکنے آں۔

⁴ ویکھو جہاز وی بھانویں وڈّے وڈّے ہوندے نیں تے تیز وَا نال ٹورے جاندے نیں تَد وی اِک نِکّی جِہی پتوار دی راہِیں ملّاح دی مرضی نال پھرائے جاندے نیں۔

⁵ ایسے طرح جِیبھ وی اِک نِکّا جِہیا انگ اے تے بڑی شیخی مار دی اے۔ ویکھو تھوڑی جِہی اَگ کیڈے وڈّے بیابان وِچ اَگ لا دیندی اے۔

⁶ جِیبھ وی اِک اَگ اے۔ جِیبھ ساڈے انگاں وِچوں شرارت دا اِک جہان اے تے سارے بدن نُوں پلِیت کر دی اے تے ساری دُنیا نُوں اَگ لاندی اے۔ تے دوزخ دی اَگ نال بَلدی رہندی اے۔

⁷ کیوں جو سارے چَوکُھر تے پکھیرُو تے کِیڑے کاڑے تے دریا دے جنَور اِنسان اپنے قابُو وِچ لیا سکدا اے۔ تے لیایا وی اے۔

⁸ تے جِیبھ نُوں کوئی قابُو نئیں کر سکدا اوہ اِک بلا اے جیہڑی ڈکی نئیں جاندی۔ مار چھڈن والے زہر نال بھری ہوئی اے۔

⁹ ایسے نال اسی خُداوند تے باپ دی وڈیائی کرنے آں تے ایسے نال ای اسی بندیاں نُوں جیہڑے خُدا دی صُورت اُتّے بنائے گئے نیں بد دُعا دینے آں۔

¹⁰ اِکّی مُنھ توں نیک دُعا تے بد دُعا نِکلدی اے۔ میرے بھراؤ! ایہہ نئیں ہونا چاہیدا۔

¹¹ کَدے اِکّی تھاؤں چشمے وِچوں مِٹّھا تے کھارا پانی نِکل سکدا اے؟

¹² میرے بھراؤ! ہنجیر دے رُکھّ نال زَیتُون یا انگور دے رُکھّ نال ہنجیر لگ سکدے نیں؟ ایسے طرح کھارے چشمے وِچوں مِٹّھا پانی نئیں نِکل سکدا۔

عالمِ بالا دی حِکمت

¹³ تُہاڈے وِچوں سیانا تے سمجھ والا کون اے؟ جیہڑا اجیہا ہوئے اوہ اپنے کمّاں نُوں نیک چال چَلّن دی راہِیں اوس حلِیمی نال ظاہر کرے جیہڑی حِکمت وِچوں پَیدا ہوندی اے۔

¹⁴ پر جے تُسی اپنے دِلاں وِچ ڈاہڈا ساڑا تے جُدائِیاں رکھدے ہو۔ تے سچیائی دے برخلاف نا شیخی مارو نا جُھوٹھ بولو۔

¹⁵ ایہہ دانائی اوہ نئیں جیہڑی اُتّوں آؤندی اے سگوں دُنیاوی تے نفسانی تے شیطانی اے۔

¹⁶ ایس واسطے جِتّھے ساڑا تے جُدائی ہوندی اے اوتھے فساد تے ہر طرح دا بُرا کمّ وی ہوندا اے۔

¹⁷ پر جیہڑی دانائی اُتّوں آؤندی اے اوّل تے اوہ پاک ہوندی اے۔ فیر مِلاپڑی تے حلِیم تے مَت لین والی۔ رَحم تے چنگے پَھلاں نال لدّی ہوئی۔ تے رَئی تے مکر نئیں کر دی۔

¹⁸ تے صُلح کران والیاں لئی نیکی دا پَھل صُلح نال بِیجیا جاندا اے۔