یعقُوب 2 - پنجابی نواں عہد نامہ نظرثانی شدہ چھپائی

طرفداری دے خلاف اِنتباہ

¹ میرے بھراؤ ساڈے جلالی خُداوند یِسُوع مسِیح دا اِیمان تُہاڈے وِچ رَئی نال نا ہوئے۔

² کیوں جو جے اِک بندہ تے سونے دی چھاپ تے چنگے کپڑے پا کے تُہاڈی جماعت وِچ آوے۔ تے اِک غرِیب بندے مَیلے مَیلے کپڑے پا کے آوے۔

³ تے تُسی اوس چنگے کپڑے والے دی رَئی کرو تے آکھو پئی تُوں ایتھے چنگے تھاں بَہہ جا۔ تے اوس غرِیب بندے نُوں آکھو پئی تُوں ایتھے کھلوتا رہو یا میرے پیراں کول بَہہ جا۔

⁴ تے تُساں آپو وِچ رَئی نا کِیتی؟ تے بَھیڑی نِیّت والے مُنصف نا بنے؟

⁵ میرے پیارے بھراؤ! سُنو۔ خُدا ایس جہان دیاں غرِیباں نُوں اِیمان وِچ دَولتمند ہون لئی نئیں چُنیا؟ تے اپنے پیار کرن والیاں نال بادشاہی دا وارث ہون دا وعدہ نئیں کِیتا؟

⁶ پر تُساں غرِیب بندے دی بے عِزّتی کِیتی۔ دَولتمند تُہاڈے اُتّے ظُلم نئیں کر دے تے اوہ ای تُہانوں کھِچّ کے کچہریاں وِچ نئیں لے جاندے؟

⁷ تے اوس بزُرگ ناں اُتّے کُفر نئیں بَکدے جیہڑا تُہاڈے اُتّے لگّا ہویا اے؟

⁸ تَد وی جے پاک کتاب دی گلّ دے سببّوں بادشاہی شریعت نُوں پُوریاں کر دے ہو پئی اپنے گواہنڈی نُوں اپنے وانگر پیار کر تے چَنگا کر دے ہو۔

⁹ پر جے تُسی رَئی کر دے ہو تے گُناہ کر دے ہو تے شریعت تُہانوں قصوروار بناندی اے۔

¹⁰ کیوں جو جِس ساری شریعت اُتّے عمل کِیتا تے اِک گلّوں بُھل گیا اوہ سارِیاں گلّاں دا قصوروار بنیا۔

¹¹ ایس لئی پئی جِس ایہہ آکھیا پئی زنا نا کر اوسے ای ایہہ آکھیا تُوں خُون نا کر۔ پر جے تُوں زنا تے نا کِیتا۔ پر خُون کِیتا تَد وی تُوں شریعت دا قصوروار بنیا۔

¹² تُسی اوہناں لوکاں وانگر کلام وی کرو تے کمّ وی کرو۔ جِنہاں دی اَزادی دی شریعت دے سببّوں عدالت ہوئے گی۔

¹³ کیوں جو جِس رَحم نئیں کِیتا اوہدا نیاں رَحم بِناں ہوئے گا۔ رَحم عدالت نُوں جِت جاندا اے۔

اِیمان تے اعمال

¹⁴ میرے بھراؤ! جے کوئی آکھے پئی مَیں اِیمان دار آں پر عمل نا کر دا ہوئے تے کِیہ فائدہ اے؟ اجیہا اِیمان اوہنوں نجات دے سکدا اے؟

¹⁵ جے کوئی بھرا بھین ننگے ہون تے اوہناں نُوں روز دی روٹی دا گھاٹا ہوئے۔

¹⁶ تے تُہاڈے وِچوں کوئی اوہناں نُوں آکھے پئی خَیر نال جاؤ تے نِگہے ہو تے رجّے رہو۔ پر جیہڑیاں شیواں جِسم نُوں لوڑ دِیاں نیں اوہناں نُوں نا دیو تے کِیہ فائدہ اے؟

¹⁷ ایسے طرح اِیمان وی جے اوہدے نال عمل نا ہون تے اپنے آپ وِچ مُردہ اے۔

¹⁸ سگوں کوئی آکھ سکدا اے۔ پئی تُوں اِیمان والا ایں تے مَیں عملاں والا۔ تُوں اپنا اِیمان عملاں بِناں مَینُوں وکھا تے مَیں اپنا اِیمان عملاں نال تینُوں وِکھانا آں؟

¹⁹ تُوں ایس گلّ اُتّے اِیمان رکھنا ایں پئی خُدا اِکّو اے۔ خَیر چَنگا کرنا ایں۔ شیطان وی اِیمان رکھدے۔ تے کمبدے نیں۔

²⁰ پر اَے نکمّے بندے تُوں ایہہ وی نئیں جان دا پئی اِیمان بِن عملاں کِسے کمّ دا نئیں؟

²¹ جدوں ساڈے پئیو ابرہام اپنے پُتر اِضحاق نُوں قُربان گاہ اُتّے قُربان کِیتا تے اوہ عملاں دے سبّب راستباز نا ہویا؟

²² سو تُوں ویکھ لیا اے پئی اِیمان اوہدیاں عملاں نال مِل کے اثر کِیتا تے عملاں دے سبّب اِیمان پُورا ہویا۔

²³ تے ایہہ نوِشتہ پُورا ہویا پئی ابرہام خُدا اُتّے اِیمان لیایا تے ایہہ اوہدے واسطے راستبازی گِنی گئی تے اوہ خُدا دا دوست اکھوایا۔

²⁴ سو تُساں ایہہ ویکھ لیا اے۔ پئی بندہ نِرا اِیمان نال ای نئیں سگوں عملاں نال راستباز ٹھہردا اے۔

²⁵ ایسے طرح راحب کسبی وی جد اوس قاصداں نُوں اپنے گھر وِچ رکھیا تے دُوجے راہ وِداع کِیتا تے اوہ عملاں دے سبّب راستباز نا بنی؟

²⁶ سو جیویں جِسم رُوح بِناں مویا ہویا اے ایسے طرح اِیمان وی عملاں بِناں مویا ہویا اے۔