عِبرانیوں 8 - پنجابی نواں عہد نامہ نظرثانی شدہ چھپائی

یِسُوع ساڈا سردار کاہِن

¹ ہُن جیہڑیاں گلّاں اسی پئے آکھنے آں اوہناں وِچوں وڈّی گلّ ایہہ اے پئی ساڈا اجیہا سردار کاہِن اے۔ جیہڑا اسماناں اُتّے جناب باری دے تخت دے سَجّے پاسے بَیٹھا اے۔

² تے اوس پاک مکان تے سَچّے تنبُو دا ٹہلیا اے جِہنُوں خُداوند کھلھاریا اے اِنسان نے نئیں۔

³ تے ایس کر کے پئی سردار کاہِن نذراں تے قُربانِیاں چاہڑن لئی ہوندا اے۔ ایس لئی ضرُور ہویا۔ پئی اوہدے کول وی کُجھ چاہڑن جوگا ہوئے۔

⁴ تے جے اوہ زمین اُتّے ہوندا تے کدی وی کاہِن نا ہوندا۔ ایس لئی شریعت دے سببّوں نذراں چاہڑن والے تے اگّے ای نیں۔

⁵ ایہہ اسمان دِیاں شیواں دی نقل تے پرچھانویں دی سیوا کر دے نے جِیکُوں مُوسیٰ وی جد تنبُو بنان نُوں تیار سی تے اوہنوں ایہہ ہدایت ہوئی پئی ویکھ جیہڑا نمونہ پہاڑ اُتّے وکھایا گیا سی اوہدے وانگر سارِیاں شیواں بنائِیاں۔

⁶ پر ہُن اوہنوں اودُوں اینی چنگی سیوا لَبّھی۔ جِنّاں اوہ اودُوں چنگے عہد دا وی وچولا اے۔ جیہڑا اودُوں چَنگیاں وعدیاں اُتّے بَدّھا گیا۔

⁷ کیوں جو جے پہلا عہد بے نُقص ہوندا تاں دُوجے لئی تھاں نا لَبھّدی۔

⁸ سو اوہ اوہناں دے عیب دس کے آکھدا اے۔ پئی خُداوند آکھدا اے۔ ویکھ! اوہ دِن آوندے نیں پئی مَیں اِسرائیل دے ٹبّر تے یہُوداہ دے ٹبّر ٹور نال اِک نواں عہد بَنّھاں گا۔

⁹ ایہہ اوس عہد وانگر نا ہوئے گا۔ جیہڑا مَیں اوہناں دے پئیو دادیاں نال اوس دِن بَدّھا سی جد مِصر دے مُلک توں کڈھ لیاؤن لئی اوہناں دا ہتّھ پھڑیا ایس لئی پئی اوہ میرے عہد اُتّے قیم نئیں رہے۔ تے خُداوند آکھدا اے۔ پئی مَیں اوہناں دی کُجھ پرواہ نئیں کِیتی۔

¹⁰ فیر خُداوند آکھدا اے۔ پئی جیہڑا عہد اِسرائیل دے ٹبّر نال اوہناں دِناں پِچّھوں بَنّھاں گا اوہ ایہہ اے پئی مَیں اپنے قانُون اوہناں دِیاں عقلاں وِچ پاں گا تے اوہناں دیاں دِلاں اُتّے لِکھاں گا۔ تے مَیں اوہناں دا خُدا ہوواں گا۔ تے اوہ میری اُمّت ہون گے۔

¹¹ تے اوہناں ساریاں نُوں اپنے اپنے وطنی تے اپنے اپنے بھرا نُوں ایہہ تعلِیم نا دینی پَوے گی۔ پئی تُوں خُداوند نُوں جان کیوں جو نِکّے توں لے کے وڈّے تِیکر سارے مَینُوں جانن گے۔

¹² ایس لئی پئی مَیں اوہناں دِیاں بدکارِیاں اُتّے رَحم کراں گا۔ تے اوہناں دے گُناہاں نُوں فیر کدی یاد نا کراں گا۔

¹³ جد اوہ اوہنوں نواں عہد آکھدا اے۔ تے پہلے نُوں پرانا کِیتا۔ تے جیہڑی شے پرانی تے مُدّت دی ہو جاندی اے سو اوہ مِٹن دے نیڑے اے۔