عِبرانیوں 4 - پنجابی نواں عہد نامہ نظرثانی شدہ چھپائی

¹ فیر جد اوہدے آرام وِچ وڑن دا وعدہ باقی اے۔ تے سانُوں ڈرنا چاہیدا اے۔ پئی تُہاڈے وِچوں کوئی پِچّھے رہیا ہویا معلُوم نا ہوئے۔

² کیوں جو سانُوں وی اوہناں وانگر خُوشخبری سُنائی گئی۔ پر سُنے ہوئے کلام اوہناں نُوں ایس لئی کُجھ فائدہ نا دِتّا۔ پئی سُنن والیاں دے دِلاں وِچ اِیمان نال نا رچیا۔

³ کیوں جو اسی جیہڑے اِیمان لیائے اوس آرام وِچ داخل ہُنے آں۔ جیویں اوس آکھیا۔ پئی مَیں اپنے غُصّے وِچ سَونہہ کھادِی۔ پئی ایہہ میرے آرام وِچ داخل نا ہون گے۔ بھانویں دُنیا بنن توں پہلاں اوہدے کمّ مُک گئے سن۔

⁴ اوس ستویں دِن دی بابت کِسے تھاں ایہہ آکھیا۔ پئی خُدا اپنے سارے کمّاں توں وِھلِیاں ہو کے ستویں دِن آرام کِیتا۔

⁵ تے ایسے تھاں وِچ پئی اوہ میرے آرام وِچ داخل نا ہون گے۔

⁶ جد ایہہ گلّ باقی اے۔ پئی بعضے اوس آرام وِچ داخل ہون۔ تے جِنہاں نُوں پہلاں خُوشخبری سُنائی گئی سی۔ اوہ نافرمانی دے سبّب داخل نا ہوسکے۔

⁷ فیر اِک خاص دِن ٹھیراکے اینی مُدّت پِچّھوں داؤد دی کتاب وِچ اوہنوں اَج دا دِن آکھدا اے۔ جیویں پہلاں آکھیا گیا۔ پئی جے اَج تُسی اوہدی اواز سُنو تے اپنے دِلاں نُوں ڈاھڈیاں نا کرو۔

⁸ تے جے یشُوع اوہناں نُوں آرام وِچ لیاؤندا۔ تے اوہ اوس ویلے اوہدے پِچّھوں اِک دُوجے دِن دا ذِکر نا کر دا۔

⁹ ایس لئی خُدا دے لوکاں واسطے اِک خاص سبت دا آرام باتی اے۔

¹⁰ کیوں جو جیہڑا اوہدے آرام وِچ داخل ہویا اے اوس وی اپنے کمّاں نُوں پُوریاں کر کے آرام کِیتا۔ جیویں خُدا وی آرام کِیتا۔

¹¹ سو بھراؤ اسی اوس آرام وِچ داخل ہون دا جتن کریئے۔ اجیہا نا ہوئے پئی اوہناں وانگر نافرمانی کر کے کوئی بندہ ڈِگّ پَوے۔

¹² کیوں جو خُدا دا کلام زِندہ تے اثر کرن والا تے ہر اِک دو مُونہی تلوار نالوں تیز اے۔ تے جان تے رُوح تے جوڑ جوڑ تے مِنّجھ مِنّجھ وَکھو وکھرے کر کے دُسّر لنگھ جاندا اے۔ تے دِل دیاں خیالاں تے اِرادیاں نُوں جاچدا اے۔

¹³ جِہدے نال سانُوں کمّ اے۔ اوہدے کولوں دُنیا دی کوئی شے چُھپی ہوئی نئیں۔ سگوں اوہدیاں اکھّاں اگّے سارِیاں شیواں ننگِیاں تے کُھلِیاں ہویاں نیں۔

یِسُوع وَڈا سردار کاہِن

¹⁴ سو جد ساڈا اجیہا اِک وَڈا سردار کاہِن اے جیہڑا اسماناں وِچوں لنگھ گیا۔ یعنی خُدا دا پُتر یِسُوع۔ تے اسی اپنے اِقرار اُتّے پکّے پَیر رہئے۔

¹⁵ کیوں جو ساڈا اجیہا سردار کاہِن نئیں جیہڑا ساڈیاں کمزوریاں وِچ ساڈا دردی نا ہوسکے سگوں سارِیاں گلّاں وِچ ساڈے وانگر ازمایا گیا۔ تَد وی بے گُناہ رہیا۔

¹⁶ سو اسی فضل دے تخت کول دلیری نال چلّئے۔ تاں جو ساڈے اُتّے رَحم ہوئے تے اوہ فضل پایئے جیہڑا لوڑ دے ویلے ساڈی مدد کرے۔