عِبرانیوں 2 - پنجابی نواں عہد نامہ نظرثانی شدہ چھپائی

بڑی وڈّی نجات

¹ ایس لئی چاہیدا اے۔ پئی اوہناں گلّاں اُتّے جیہڑیاں اساں سُنیاں نیں ہور وی دِل لاکے دھیان کریئے۔ متے اوہناں توں رُڑھ کے دُور نا لگے جائیے۔

² کیوں جو جد اوہ کلام جیہڑا فرِشتیاں دی راہِیں کِیتا گیا سی قیم رہیا تے ہر قصور تے نافرمانی دا ٹھیک ٹھیک بدلہ مِلیا۔

³ تے اینی وڈّی نجات توں بے پرواہ رہ کے اسی کِیویں بچ سکنے آں۔ جِہدا بیان پہلاں خُداوند دی راہِیں ہویا۔ تے سُنن والیاں توں سانُوں پَکّی طرح ثبُوت اَپڑیا۔

⁴ تے نال ای خُدا وی اپنی مرضی دے سببّوں نشاناں تے کراماتاں تے طرح طرح دے مُعجزیاں تے پاک رُوح دِیاں نِعمتاں دی راہِیں اوہدی گواہی دیندا رہیا۔

اوہ ہستی جیہڑی سانُوں نجات تک لے جاندی اے

⁵ اوس آؤن والی دُنیا نُوں جِہدا اسی ذِکر کرنے آں۔ اوس فرِشتیاں دے ہیٹھ نئیں کِیتا۔

⁶ سگوں اِکّی بندے اِک تھاں ایہہ لِکھیا اے۔ پئی اِنسان کِیہ شے اے۔ پئی تُوں اوہدا خیال کریں یا بندے دا پُتر کِیہ اے۔ پئی تُوں اوہدا دھیان کریں۔

⁷ تُوں اوہنوں فرِشتیاں نالوں کُجھ ای گھٹ کِیتا۔ تُوں اوہدے اُتّے جلال تے عِزّت دا تاج رکھیا۔ تے اپنے ہتّھ دے کمّاں اُتّے اوہنوں مُختِیار کِیتا۔

⁸ تُوں سارِیاں شیواں اوہدے پیراں ہیٹھ کر دِتّیاں نیں۔ سو جد سبھ کُجھ اوہدے ہیٹھ کر دِتّا تے کوئی شے نا چھڈی جیہڑی اوہدے ہیٹھ نا کِیتی۔ پر اسی اجے تِیکر سارِیاں شیواں اوہدے ہیٹھ نئیں ویکھدے۔

⁹ ہاں اوہنوں ویکھنے آں جیہڑا فرِشتیاں نالوں کُجھ ای گھٹ کِیتا گیا اے یعنی یِسُوع نُوں جِس مَوت دا دُکھ سہہ کے جلال تے عِزّت دا تاج پایا۔ تاں جو خُدا دے فضل نال اوہ ہر اِک بندے دی خاطر مَوت دا سواد لَئے۔

¹⁰ کیوں جو جِہدے لئی سارِیاں شیواں نیں تے جِہدی راہِیں سارِیاں شیواں نیں اوہنوں ایہہ پھبدا سی پئی جد بُہت ساریاں پُتراں نُوں جلال وِچ لے آوے تے اوہناں دی نجات دے بانی نُوں دُکھاں دے سبّب کامِل بنائے۔

¹¹ کیوں جو پاک کرن والے تے پاک ہون والے سارے اِک ای اصل توں نیں۔ ایس لئی اوہ اوہناں نُوں بھرا آکھن توں نئیں شرماؤندا۔

¹² سو اوہ آکھدا اے پئی تیرا ناں مَیں اپنے بھراواں اگّے بیان کراں گا۔ تے کلِیسیا وِچ تیری وڈیائی دے گِیت گاواں۔

¹³ تے فیر ایہہ پئی مَیں اوہدے اُتّے بھروسا رکھاں گا فیر ایہہ وی پئی ویکھ مَیں اوہناں بچّیاں سَنے جیہڑے خُدا مَینُوں دِتّے نیں۔

¹⁴ سو جِس حال بچّے خُون تے گوشت وِچ سنگی نیں اوسے طرح اوہ اوہناں وانگر آپ وی اوہناں وِچ شریک ہویا۔ تاں جو اوہ مَوت دی راہِیں اوہنوں جِہنُوں مَوت اُتّے طاقت مِلی یعنی ابلیس نُوں بے کار کر دے۔

¹⁵ تے اوہناں نُوں چھڈا لَئے جیہڑے ساری عُمر مَوت دے ڈر نال غلامی وِچ پَھسے رہے۔

¹⁶ اوس فرِشتیاں دا نئیں سگوں ابرہام دی نسل دا رُوپ دھاریا۔

¹⁷ سو اوہنوں سارِیاں گلّاں وِچ اپنے بھراواں وانگر ضرُور بننا پیا۔ تاں جو ایہناں گلّاں وِچ جیہڑیاں خُدا نال تعلق رکھدیاں نیں۔ اوہ رَحم دِل تے دیانتدار سردار کاہِن بنے تے اُمّت دے گُناہاں دا کفّارہ دے۔

¹⁸ کیوں جو جد اوس آپ ای ازمایشاں دا دُکھ سہیا۔ اوہ اوہناں دی وی مدد کر سکدا اے۔ جِنہاں دی ازمایش ہوندی اے۔