گلتِیوں 5 - پنجابی نواں عہد نامہ نظرثانی شدہ چھپائی

اپنی اَزادی نُوں محفوظ رکھو

¹ مسِیح نے سانُوں اَزاد رہن لئی اَزاد کِیتا اے۔ سو تگڑے رہو تے فیر غلامی دے جُولے ہیٹھ نا جُپّو۔

² ویکھو مَیں پَولُس تُہانوں آکھنا آں پئی جے تُسی سُنتی بَہو گے۔ تے مسِیح توں تُہانوں کُجھ فائدہ نا ہوئے گا۔

³ سگوں مَیں ہر اِک سُنتی بہن والے اگّے فیر گواہی دینا آں۔ پئی ساری شریعت اُتّے عمل کرنا اوہدا فرض اے۔

⁴ تُسی جیہڑے شریعت دی راہِیں راستباز ٹھہرنا چاہندے ہو مسِیح توں وکھرے ہو گئے۔ تے فضل ولّوں رہ گئے۔

⁵ کیوں جو اسی رُوح دے سبّب اِیمان دی راہِیں راست بازی دی آس پُوری ہون دی اُڈِیک وِچ آں۔

⁶ تے مسِیح یِسُوع وِچ نا تے سُنتی بہنا کِسے کمّ دا اے۔ تے نا سُنتی نا بہنا۔ پر اوہ اِیمان جیہڑا مُحبّت دی راہِیں اثر کر دا اے۔

⁷ تُسی تے چنگی طرح پئے دَوڑ دے سو۔ کِس تُہانوں سچیائی دے مَنّن توں ڈکیا؟

⁸ ایہہ چُک تُہاڈے سَدّن والے ولّوں نئیں؟

⁹ تھوڑا جِہیا خمیر ساری تَون نُوں خمیرا کر دیندا اے۔

¹⁰ مَینُوں خُداوند وِچ تُہاڈے اُتّے ایہہ وساہ اے پئی تُسی ہور طرح دا خیال نا کرو گے۔ پر جیہڑا تُہانوں گھبراؤندا اے اوہ بھانویں کیہڑا ہوئے سزا پائے گا۔

¹¹ تے بھراؤ مَیں جے اجے تِیکر سُنتی بہن دی منادی کرنا آں تے ہُن تِیکر ستایا کیوں جانا آں؟ تے صلِیب دی ٹھوکر تے جاندی رہی۔

¹² چَنگا ہوئے جے تُہانوں سَوڑِیاں پان والے اپنا آپ سارا وَڈّھ لین۔

¹³ بھراؤ! تُسی اَزادی لئی سَدّے گئے سو پر اجیہا نا ہوئے پئی اوہ اَزادی جِسم دِیاں گلّاں دا موقع بنے۔ سگوں پیار نال اِک دُوجے دی سیوا کرو۔

¹⁴ کیوں جو ساری شریعت اِکّی گلّ وِچ پُوری ہوندی اے۔ پئی تُوں اپنے گواہنڈی نال اپنے جِہیا پیار رکھ۔

¹⁵ پر جے تُسی اِک دُوجے نُوں وَڈّھ دے تے پاڑ کھاندے ہو۔ تے خبردار رہو۔ پئی تُہاڈا اِک دُوجے کولوں ستیاناس نا ہوئے۔

خُدا دا رُوح تے اِنسانی شرِشت

¹⁶ پر مَیں ایہہ آکھنا آں پئی رُوح دے طَور نال چلّو ایس طرح نال تُسی جِسم دی خواہش نُوں کدی پُورا نا کرو گے۔

¹⁷ کیوں جو جِسم دی خواہش رُوح دے اُلٹ اے۔ تے رُوح جِسم دے اُلٹ۔ تے ایہہ اِک دُوجے دے دُشمن نیں۔ ایس کر کے پئی جو کُجھ تُسی چاہندے ہو نا کرو۔

¹⁸ تے جے تُسی رُوح دے طَور نال ٹُردے ہو۔ تے شریعت دے ہیٹھ نئیں رہے۔

¹⁹ ہُن جِسم دے کمّ تے ظاہر نیں یعنی زناکاری۔ پلِیتی۔ لُچ پُناں۔

²⁰ بُت پرستی۔ جادُوگری۔ دُشمنیاں۔ جھگڑا۔ ساڑا۔ غُصّہ۔ دھڑے بازی۔ دوجائیگِیاں۔ بِدعتاں۔

²¹ بُغض۔ نشے بازی۔ ناچ رنگ تے ہور ایہو جیہے۔ ایہناں دی بابت تُہانوں اگیترا دس دیناں آں جیویں پہلاں وی دسیا سی۔ پئی اجیہے کمّ کرن والے خُدا دی بادشاہی دے وارث نا ہون گے۔

²² پر رُوح دا پَھل پیار۔ خُوشی۔ تسلّی۔ برداشت۔ مِہربانی۔ نیکی۔ دیانتداری۔

²³ حلِیمی پرہیزگاری اے۔ اجیہاں کمّاں دے برخلاف کوئی شریعت نئیں۔

²⁴ تے جیہڑے مسِیح یِسُوع دے نیں۔ اوہناں جِسم نُوں اوہدیاں چاہواں تے خواہشاں سَنے سُولی چاڑھ دِتّا اے۔

²⁵ جے اسی رُوح دے سببّوں جیونے آں۔ تے رُوح دے طَور نال چلنا وی چاہیدا اے۔

²⁶ اسی نا حق فخر کر کے نا اِک دُوجے نُوں چِڑائیے۔ تے نا اِک دُوجے ولّوں سڑئیے۔