گلتِیوں 2 - پنجابی نواں عہد نامہ نظرثانی شدہ چھپائی

پَولُس تے دُوجے رسُول

¹ فیر چَوداں ورھیاں پِچّھوں برنباس دے نال مَیں دُوجی وار یرُوشلِیم گیا تے طِطُس نُوں وی نال لے گیا۔

² تے میرا جانا اِلہام دے سببّوں ہویا تے اوہناں نُوں اوہ خُوشخبری دسی جِہدی منادی مَیں غیر قوماں وِچ کرنا آں تے اوہناں لوکاں نُوں جیہڑے کِسے گنتری وِچ سن۔ پڑدے نال دسی۔ ایس کر کے پئی متے میری اگلی پِچّھلی کِیتی کتری ایویں نا جائے۔

³ پر طِطُس جیہڑا میرے نال سی۔ تے یُونانی اے سُنتی بہن لئی مجبُور نا کِیتا گیا۔

⁴ ایہہ اوہناں جُھوٹھیاں بھراواں دے سببّوں ہویا جیہڑے چوری چوری آ وڑے سن ایس کر کے پئی اوس اَزادی دا جیہڑی سانُوں مسِیح وِچ مِلدی اے سُوہے بن کے پتا لین۔ تے سانُوں غلامی وِچ لیاؤن۔

⁵ اِک گھڑی وی اوہناں دا تابعیاں رہنا سانُوں نا سکھایا۔ ایس کر کے پئی خُوشخبری دی سچیائی تُہاڈے وِچ قیم رہے۔

⁶ تے جیہڑے لوک کِسے گنتری وِچ سن (بھانویں کیویں وی سن۔) مَینُوں ایس گلّ نال کِیہ۔ خُدا کِسے بندے دی رَئی نئیں کر دا۔ اوہناں لوکاں جیہڑے کِسے گنتری وِچ سن مَینُوں کوئی صلاح نا دِتّی۔

⁷ پر اُلٹا جدوں اوہناں ایہہ ویکھیا۔ پئی سُنتِیاں نُوں خُوشخبری دین دا کمّ پطرس نُوں سونپیا گیا۔ ایسے طرح بے سُنتِیاں نُوں سُنان دا میرے سپُرد ہویا۔

⁸ (کیوں جو جِس سُنتِیاں دی رسالت لئی پطرس وِچ اثر کِیتا اوسے ای غیر قوماں لئی میرے وِچ اثر کِیتا۔)

⁹ تے یعقُوب تے کیفا تے یُوحنّا نے جیہڑے کلِیسیا دے سرپَینچ سمجھے جاندے سن۔ جدوں اوس فضل نُوں جیہڑا مَینُوں مِلیا سی معلُوم کِیتا تے سانجھداری دا سَجّا ہتّھ دے کے مَینُوں تے برنباس نُوں جوڑی دار بنا لیا۔ پئی اسی غیر قوماں ولّ جائیے۔ تے اوہ سُنتِیاں ولّ۔

¹⁰ تے نِرا ایہہ آکھیا پئی غرِیباں نُوں یاد رکھو۔ جِس گلّ دی مَینُوں آپ وی لگن سی۔

انطاکیہ وِچ پَولُس پطرس نُوں جِھڑکدا اے

¹¹ تے جدوں کیفا انطاکیہ وِچ آیا۔ مَیں رُوبرُو ہو کے اوہدا مُقابلہ کِیتا۔ کیوں جو اوہ تقصِیری سی۔

¹² ایس لئی پئی یعقُوب ولّوں کُجھ جِنّیاں دے آؤن توں پہلاں تے اوہ غیر قوماں نال کھاندا ہوندا سی۔ پر جدوں اوہ آ گئے تے سُنتِیاں توں ڈر دا مارا ہَٹ گیا۔ تے وکھرا ہوگیا۔

¹³ تے رہندے یہُودی وی اوہدے نال رَل کے دو رنگی چلّے۔ ایتھوں تِیکر پئی برنباس وی اوہناں نال دو رنگی وِچ رُڑھ وَگیا۔

¹⁴ جدوں مَیں ویکھیا پئی اوہ اِنجِیل دی سچیائی دے سببّوں سِدّھے راہ نئیں ٹُردے تے مَیں سبھناں دے سامھنے کیفا نُوں آکھیا۔ پئی جے یہُودی ہوندیاں تیرا ورتاوا غیر قوماں وانگر رہیا اے۔ نا یہُودِیاں وانگر تے تُوں یہُودِیاں دِیاں رِیتاں اُتّے چَلّن لئی غیر قوماں نُوں مجبُور کیوں کرنا ایں؟

یہُودی تے غیر قوم والے اِیمان نال نجات پاندے نیں

¹⁵ بھانویں اسی جنم دے یہُودی آں تے گُناہی غیر قوماں وِچوں نئیں۔

¹⁶ تَد وی ایہہ جان کے پئی بندہ شریعت دے کمّاں نال نئیں سگوں نِرا یِسُوع مسِیح اُتّے اِیمان لیاؤن نال راستباز ٹھہردا اے۔ اساں آپ وی مسِیح یِسُوع اُتّے اِیمان لیاندا۔ ایس کر کے پئی اسی مسِیح اُتّے اِیمان لیاؤن نال راستباز سمجھے جائیے نا شریعت دیاں کمّاں نال۔ کیوں جو شریعت دیاں کمّاں نال کِسے راستباز نئیں ٹھہرنا۔

¹⁷ پر اسی جیہڑے مسِیح وِچ راستباز ٹھہرن دی چاہ کرنے آں جے آپی گُناہیں نِکلئے تے دسو گُناہ دا مسِیح سیوادار اے؟ کدی وی نئیں۔

¹⁸ کیوں جو جے مَیں اوہناں شیواں نُوں جِنہاں نُوں ڈھاہ چھڈیا اے فیر بناواں۔ تے اپنے آپ نُوں تقصِیری ٹھہرانا آں۔

¹⁹ ایس کر کے پئی مَیں شریعت دی راہِیں شریعت ولّوں مر گیا تاں جو خُدا ولّوں جِیُوپَواں۔

²⁰ مَیں مسِیح دے نال سُولی دِتّا گیا آں ہُن مَیں جِیوندا نا رہیا۔ سگوں مسِیح میرے وِچ جِیوندا اے۔ تے مَیں جیہڑا ہُن جِسم وِچ جِیوناں آں۔ تے خُدا دے پُتر اُتّے اِیمان لیاؤن نال جِیوناں آں۔ جِس مَینُوں پیار کِیتا تے میری تھانویں اپنا آپ دے دِتّا۔

²¹ مَیں خُدا دے فضل نُوں ایویں نئیں گواؤندا۔ کیوں جو جے راست بازی شریعت دی راہِیں ہوندی اے تے مسِیح ایویں موئیا۔