گلتِیوں 1 - پنجابی نواں عہد نامہ نظرثانی شدہ چھپائی

¹ پَولُس ولّوں جیہڑا نا بندیاں ولّوں تے نا بندیاں دی راہِیں پر یِسُوع مسِیح تے خُدا باپ ولّوں جِس اوہنوں مُردیاں وِچوں جوالیا رسُول اے۔

² تے ساریاں بھراواں ولّوں جیہڑے میرے نال ہَین گلِتیہ دِیاں کلِیسیاواں دے ناں۔

³ خُدا باپ تے ساڈے خُداوند یِسُوع مسِیح ولّوں فضل تے تسلّی تُہانوں مِلدی رہے۔

⁴ جِس ساڈیاں گُناہاں دے بدلے اپنے آپ نُوں قُربان کر دِتّا۔ ایس کر کے پئی ساڈے خُدا تے باپ دی مرضی دے سببّوں سانُوں ہُن وی بَھیڑی دُنیا توں چھڈائے۔

⁵ اوہدی وڈیائی سدا تِیکر ہوندی رہے۔ آمِین۔

اِک ای خُوشخبری

⁶ مَینُوں اچرج جاپدا اے پئی تُسی ایڈی چھیتی اوہدے ولّوں پھر کے جِس تُہانوں مسِیح دے فضل نال سدّیا کِسے ہور خُوشخبری ولّ دھیان کر دے ہو۔

⁷ پر اوہ دُوجی خُوشخبری نئیں۔ ہاں بعضے اجیہے نیں جیہڑے تُہانوں گھبراؤندے تے مسِیح دی خُوشخبری نُوں وِگاڑنا چاہندے نیں۔

⁸ پر جے اسی یا اسمانوں کوئی فرِشتہ وی بِناں اوس خُوشخبری دے جیہڑی اساں تُہانوں سُنائی اے۔ کوئی ہور خُوشخبری تُہانوں سُنائے تے لعنتی ہوئے۔

⁹ جیہا اسی پہلاں آکھ چُکے آں۔ تِہا ای ہُن مَیں فیر وی تُہانوں آکھنا آں۔ پئی اوس خُوشخبری دے بِناں جیہڑی تُساں قبول کِیتی سی جے کوئی تُہانوں ہور خُوشخبری سُنائے سو لعنتی ہوئے۔

¹⁰ ہُن مَیں بندیاں نُوں سجن بنانا آں یا خُدا نُوں؟ مَیں بندیاں نُوں راضی کرنا چاہناں آں؟ جے مَیں ہُن تِیکر بندیاں نُوں خُوش کر دا رہندا تے مسِیح دا بندہ نا ہوندا۔

پَولُس کِیویں رسُول بنیا

¹¹ بھراؤ مَیں تُہانوں دس چھڈناں آں۔ پئی جیہڑی خُوشخبری مَیں تُہانوں سُنائی اوہ بندے وانگر نئیں۔

¹² کیوں جو نا تے اوہ مَینُوں بندیاں ولّوں اَپڑی تے نا مَینُوں کِسے سِکھائی۔ پر یِسُوع مسِیح ولّوں مَینُوں اوہدا اِلہام ہویا۔

¹³ ایس لئی پئی یہُودی طریقے وِچ جیہڑا میرا حال سی۔ تُساں سُن ای لیا اے۔ مَیں خُدا دی کلِیسیا نُوں حدّوں وَدّھ کے ستاؤندا تے برباد کر دا ساں۔

¹⁴ تے مَیں یہُودی طریقے وِچ اپنی قوم دِیاں بتھیریاں ہانِیاں نالوں وَدھدا جان دا ساں تے وڈّیاں دِیاں رِیتاں دے وِچ بڑے جوش نال لگّا ہویا ساں۔

¹⁵ پر جدوں اوس خُدا دی جِس مَینُوں میری ماں دے ڈِھڈ توں وَکھریاں کِیتا تے اپنے فضل نال سدّیا ایہہ مرضی ہوئی۔

¹⁶ پئی اپنے پُتر نُوں میرے دِل وِچ ظاہر کرے۔ ایس کر کے پئی غیر قوماں وِچ مَیں اوہدی خُوشخبری دیاں۔ تے نا مَیں گوشت تے لہو کولوں صلاح پُچھی۔

¹⁷ تے نا یرُوشلِیم وِچ اوہناں دے کول گیا۔ جیہڑے مَیتھوں پہلے رسُول سن۔ سگوں عرب نُوں ٹُر گیا۔ تے فیر اوتھوں دمِشق پرت آیا۔

¹⁸ تَد تِنّاں ورھیاں پِچّھوں کیفا نُوں مِلن لئی مَیں فیر یرُوشلِیم گیا۔ تے پندراں دِن اوہدے کول رہیا۔

¹⁹ پر ہورناں رسُولاں وِچوں خُداوند دے بھرا یعقُوب دے بِناں کِسے نُوں نا ویکھیا۔

²⁰ جیہڑیاں گلّاں مَیں تُہانوں لِکھناں آں ویکھو خُدا نُوں گواہ کر کے آکھنا آں۔ پئی اوہ جُھوٹھیاں نئیں۔

²¹ ایدوں پِچّھے مَیں سُوریہ تے کِلِکیہ دے علاقیاں وِچ آیا۔

²² تے یہُودیہ دِیاں کلِیسیاواں جیہڑیاں مسِیح وِچ سن میرِیاں واقف تے نئیں سن۔

²³ پر سُندیاں سن پئی جیہڑا پہلاں سانُوں ستاؤندا سی۔ ہُن اوسے اِیمان دی جِہنُوں برباد کر دا سی۔ خُوشخبری دیندا اے۔

²⁴ تے اوہ میرے صدقہ خُدا دی وڈیائی کر دیاں سن۔