اِفسِیوں 6 - پنجابی نواں عہد نامہ نظرثانی شدہ چھپائی

بچّے تے ماں پئیو

¹ بچّیو! تُسی خُداوند وِچ اپنے ماں پئیو دے آکھے لگو۔ کیوں جو ایہہ چاہیدا اے۔

² اپنے ماں پئیو دی عِزّت کر۔ (ایہہ پہلا حُکم اے جِہدے نال وعدہ اے۔)

³ تاں جو تیرا بھلا ہوئے۔ تے تیری عُمر زمین اُتّے وڈّی ہوئے۔

⁴ تے بچّیاں والیو۔ اپنے بچّیاں نُوں غُصّہ نا دواؤ۔ سگوں خُدا ولّوں تعلِیم تے نصِیحت دے دے کے اوہناں دی پالنا کرو۔

نوکر تے مالک

⁵ نَوکرو۔ جیہڑے جِسم ولّوں تُہاڈے مالک نیں صاف دِلی نال ڈردے تے کمبدے ہوئے اوہناں دے اجیہے آکھے لگو۔ جیویں مسِیح دے۔

⁶ تے بندیاں نُوں خُوش کرن والیاں وانگر وکھالے لئی سیوا نا کرو۔ سگوں مسِیح دیاں بندیاں وانگر دِل نال خُدا دی مرضی پُوری کرو۔

⁷ تے اوہ خِدمت بندیاں دی نئیں۔ سگوں خُداوند دی جان کے دِل نال کرو۔

⁸ کیوں جو تُسی جان دے ہو۔ پئی جیہڑا اجیہا چَنگا کمّ کرے گا۔ بھانویں غلام ہوئے بھانویں اَزاد۔ خُداوند کولوں اوہو جیہا ای پاوے گا۔

⁹ تے اے مالِکو! تُسی جِھڑکاں چھڈ کے اوہناں نال ایہو جیہا سلُوک کرو کیوں جو تُسی جان دے اوہ۔ پئی اوہناں دا تے تُہاڈا دوہاں دا مالک اسمان اُتّے اے۔ تے اوہ کِسے دی رَئی نئیں کر دا۔

خُدا دے سارے ہتّھیار

¹⁰ باقی خُداوند تے اوہدی بڑی قُوّت دی طاقت وِچ تگڑے رہو۔

¹¹ خُداوند دے سارے ہتّھیار لا لوؤ۔ پئی تُسی ابلیس دِیاں چالاکیاں اگّے کھلون جوگے ہوؤ۔

¹² کیوں جو اساں لہو تے جِسم نال نئیں سگوں اساں حکُومت تے اختیار والیاں تے ایس دُنیا دے ہنیرے دِیاں حاکماں تے شرارت دِیاں رُوحانی فَوجاں نال گُھلنا اے۔ جیہڑیاں اسمانی تھانواں وِچ نیں۔

¹³ ایس واسطے تُسی خُدا دے سارے ہتّھیار بَنّھ لو۔ تاں جو بَھیڑے دِن وِچ تُسی مُقابلہ کرن جوگے ہوؤ۔ تے سارے کمّاں نُوں مُکا کے قیم رَیہہ سکو۔

¹⁴ سو سچیائی دی پیٹی لکّ بَنّھ کے تے راستبازی دا بکتر پا کے۔

¹⁵ تے پیراں وِچ تسلّی دی خُوشخبری دی تیاری دی جُتّی پا کے اوہناں ساریاں اُتّے اِیمان دی سِپر لاکے کھلے رہو۔

¹⁶ جِہدے نال تُسی اوس شرِیر دے بَلدے ہوئے تِیراں نُوں بُجھا سکو۔

¹⁷ تے نجات دا خود پاؤ تے رُوح دی تلوار جیہڑی خُدا دا کلام اے۔ لے لوؤ۔

¹⁸ تے ہر ویلے تے سبھنیں گلِّیں رُوح وِچ دُعا تے مِنّت کر دے رہو۔ تے ایسے مطلب واسطے جاگدے رہو پئی تُسی سارے پاک لوکاں لئی دُعا منگدے رہو۔

¹⁹ تے میرے لئی وی۔ تاں جو بولن دے ویلے مَینُوں کلام کرن دی ہِمّت مِلے۔ جِہدے نال مَیں ایس خُوشخبری دے بھیت نُوں دلیری نال ظاہر کراں۔

²⁰ جِہدے واسطے سنگلی نال بَدّھا ہویا ایلچی آں۔ تے اوہنوں دلیری نال بیان کراں جیویں چاہیدا اے۔

اخِیری سلام

²¹ تے تُخِکس جیہڑا پیارا بھرا تے خُداوند دا دیانتدار نوکر اے تُہانوں میرِیاں سارِیاں گلّاں دسے گا۔ تاں جو تُسی جانو پئی مَیں کِیہ کرنا آں۔

²² اوہنوں مَیں تُہاڈے کول ایسے واسطے گھلّیا اے۔ پئی تُسی ساڈے حال توں واقف ہو جاؤ۔ تے اوہ تُہاڈے دِلاں نُوں تسلّی دے۔

²³ خُدا باپ تے خُداوند یِسُوع مسِیح ولّوں بھراواں نُوں تسلّی مِلے۔ تے اوہناں وِچ اِیمان دے نال مُحبّت ہوئے۔

²⁴ جیہڑے ساڈے خُداوند یِسُوع مسِیح نال سدا قیم رہن والی مُحبّت رکھدے نیں۔ اوہناں ساریاں اُتّے فضل ہوئے۔