اِفسِیوں 5 - پنجابی نواں عہد نامہ نظرثانی شدہ چھپائی

نُور وِچ زِندگی گُذارنا

¹ ایس لئی پیاریاں بچّیاں وانگر خُدا دی رِیس۔

² تے تُہاڈا چالا مُحبّت وِچ ہوئے جیویں مسِیح وی تُہاڈے نال مُحبّت کِیتی۔ تے ساڈے واسطے اپنے آپ نُوں خُوشبوئی وانگر خُدا دی نظر کر کے قُربان کِیتا۔

³ تے جیویں پاک لوکاں نُوں پھبدا اے۔ تُہاڈے وِچ زناکاری تے گندگی یا لالچ دا ناں وی نا آوے۔

⁴ تے نا بے لہنگی تے بکواس یا پھکّڑ۔ کیوں جو ایہہ نئیں۔ سگوں شُکر کرو۔

⁵ کیوں جو تُسی چنگی طرح جان دے ہو۔ پئی کِسے زنائی یا گندے بندے یا لالچی دی جیہڑا بُت پرست دے برابر اے۔ مسِیح تے خُدا دی بادشاہی وِچ کوئی وِرثہ نئیں۔

⁶ کوئی تُہانوں بے فائدہ گلّاں نال دھوکھا نا دے۔ کیوں جو ایہناں دے سببّوں نافرمان لوکاں اُتّے خُدا دا غُصّہ آؤندا اے۔

⁷ سو اوہناں دیاں کمّاں وِچ نا رَلو۔

⁸ کیوں جو تُسی پہلاں ہنیرا سو۔ ہُن خُداوند وِچ چانن ہو۔ سو چانن دے بچّیاں وانگر چلّو۔

⁹ (ایس لئی پئی چانن دا پَھل پُوری نیکی تے راستبازی تے سچیائی اے۔)

¹⁰ تے پَتا لاندے رہو۔ پئی خُداوند نُوں کِیہ چَنگا لگدا اے۔

¹¹ ہنیرے دے بے فائدہ کمّاں وِچ نا رَلو۔ سگوں اوہناں نُوں جِھڑکو۔

¹² کیوں جو اوہناں دے اوہلے دے کمّاں دی گلّ کرنی وی بے لہنگی دی گلّ اے۔

¹³ تے جِنہاں گلّاں نُوں جِھڑکیا جاندا اے اوہ سارِیاں چانن وِچ اُگھڑدیاں نیں ایس لئی پئی جیہڑی شے اُگھیڑی جاندی اے اوہ چانن اے۔

¹⁴ ایس لئی اوہ آکھدا اے۔ پئی اے سُتّیا ہویا جاگ تے مُردیاں وِچوں جِیو اُٹھ۔ تے مسِیح دا چانن تیرے اُتّے چمکے گا۔

¹⁵ سو دھیان کرو۔ پئی کِس طرح ٹُر دے ہو۔ جھلیاں وانگر نئیں سگوں سیانیاں وانگر ٹُرو۔

¹⁶ تے ویلے نُوں چَنگا کر کے ورتو ایس لئی پئی دِن بَھیڑے نیں۔

¹⁷ ایس سبّب بال نا رہو۔ سگوں خُدا دی مرضی نُوں سمجھو۔ پئی کِیہ اے۔

¹⁸ تے شراب پی کے مست نا ہوؤ۔ کیوں جو ایہدے وِچ بدچلنی ہوندی اے۔ سگوں رُوح نال بھر دے جاؤ۔

¹⁹ تے آپو وِچ زبُور تے گِیت تے رُوحانی غزلاں گایا کرو۔ تے دِل وِچ خُداوند لئی گاؤندے وجاؤندے رہیا کرو۔

²⁰ تے سارِیاں گلّاں واسطے ساڈے خُداوند یِسُوع مسِیح دے ناں اُتّے سدا خُدا باپ دا شُکر کر دے رہو۔

زنانِیاں تے گھر والے

²¹ تے مسِیح دے ڈر نال اِک دُوجے دے تابعیاں رہو۔

²² اَے زنانِیو! اپنے گھر والیاں دی اجیہی تابعیاں رہو۔ جیویں خُداوند دی۔

²³ کیوں جو گھر والا زنانی دا سِر اے۔ جیویں مسِیح کلِیسیا دا سِر اے۔ تے اوہ آپی ای بدن دا بچاؤن والا اے۔

²⁴ پر جیویں کلِیسیا مسِیح دے تابعیاں اے۔ اوسے طرح زنانِیاں وی سبھناں گلّاں وِچ اپنے گھر والیاں دے تابعیاں ہون۔

²⁵ گھر والیو! اپنیاں زنانِیاں نُوں پیار کرو جیویں مسِیح وی کلِیسیا نُوں پیار کر کے اپنے آپ نُوں اوہدی خاطر مَوت دے حوالے کر دِتّا۔

²⁶ تاں جو اوہنوں کلام دی راہِیں پانی نال نوھا کے تے صاف کر کے پاک بنائے۔

²⁷ تے اِک اجیہی جلالی کلِیسیا بنا کے اپنے اگّے حاضر کرے۔ جِہدے بدن وِچ داغ یا جُھری یا کوئی ہور اجیہی شے نا ہوئے۔ سگوں پاک تے بے نُقص ہوئے۔

²⁸ ایسے طرح گھر والیاں نُوں چاہیدا اے پئی اپنیاں زنانِیاں نُوں اپنے بدن وانگر پیار کرن جیہڑا زنانی نُوں پیار کر دا اے اوہ اپنے آپ نُوں پیار کر دا اے۔

²⁹ کیوں جو کدی کِسے اپنے جِسم نال وَیر نئیں رکھیا سگوں اوہدی پالنا کر دا اے۔ جیویں مسِیح کلِیسیا دی۔

³⁰ ایس لئی پئی اسی اوہدے جِسم دے انگ آں۔

³¹ ایسے سبّب بندے اپنے ماں پئیو توں وَکھریاں ہو کے اپنی زنانی نال جُڑیا رہے گا۔ تے اوہ دو نَوِیں اِک تَن ہون گے۔

³² ایہہ بھیت تے وَڈا اے۔ پر مَیں مسِیح تے کلِیسیا دی بابت آکھنا آں۔

³³ ہر صُورت تُہاڈے وِچوں وی ہر اِک اپنی زنانی نُوں اپنے وانگر پیار کرے۔ تے زنانی ایس گلّ دا خیال رکھّے پئی اپنے گھر والے کولوں ڈر دی رہے۔