اِفسِیوں 2 - پنجابی نواں عہد نامہ نظرثانی شدہ چھپائی

مَوت توں نِکل کے زِندگی وِچ داخل ہونا

¹ تے اوس تُہانوں وی جوالیا جیہڑے اپنے قصوراں تے گُناہاں دے سببّوں موئے ہوئے سو۔

² جِنہاں وِچ تُسی پہلاں ایس دُنیا دی چال اُتّے ٹُر دے سو۔ وَا دے پتّے دے حاکم یعنی اوس رُوح دے مگر مگر ٹُردے سو۔ جیہڑی ہُن نافرمان لوکاں وِچ اثر کر دی اے۔

³ اوہناں وِچ اسی وی ساریاں دے سارے پہلاں اپنے جِسم دِیاں خواہشاں وِچ رہندے ساں۔ تے جِسم تے عقل دے اِرادے پُورے کر دے ساں۔ تے ہورناں وانگر قُدرتی طَور اُتّے غضب دے بال ساں۔

⁴ پر خُدا اپنے رَحم دی دَولت نال اوس وڈّی مُحبّت دے سببّوں جیہڑی اوس ساڈے نال کِیتی۔

⁵ جدوں قصوراں دے سببّوں موئے ہوئے ساں تدوں سانُوں مسِیح دے نال زِندہ کِیتا (تُہانوں فضل نال ای نجات مِلی اے۔)

⁶ تے مسِیح یِسُوع وِچ رَلا کے اوہدے نال جوالیا تے اسمانی تھانواں اُتّے اوہدے نال بٹھایا۔

⁷ ایس کر کے پئی اوہ آؤن والیاں زمانیاں وِچ اپنے فضل دی باہلی دَولت وکھائے جیہڑا مسِیح یِسُوع وِچ ساڈے اُتّے مِہربانی نال ہویا سی۔

⁸ کیوں جو تُہانوں اِیمان دی راہِیں فضل نال ای نجات مِلی اے۔ تے ایہہ ساڈے ولّوں نئیں پر خُدا دی بخشِش اے۔

⁹ تے نا کمّاں دے سببّوں مِلی اے تاں جو کوئی فخر نا کرے۔

¹⁰ کیوں جو اسی اوسے دی کاریگری آں تے مسِیح یِسُوع وِچ اوہناں نیک کمّاں دے واسطے پَیدا کِیتے گئے ساں جیہڑے خُدا مُڈھوں ای ساڈے کرن لئی تیار کِیتے سن۔

مسِیح دے نال یگانگی

¹¹ سو ایس کر کے یاد کرو پئی کَدے تُسی جیہڑے جِسم ولّوں اوہناں کولوں بے سُنتے اکھواؤندے ہو جیہڑے جِسم ولّوں ہتّھاں نال سُنتی بَیٹھے ہوئے اکھواؤندے نیں۔

¹² اگلے زمانے وِچ مسِیح توں وکھرے تے اِسرائیل دی بادشاہی وِچوں خارج تے ایہناں دے وعدے والے عَہداں توں ناواقِف سو تے نااُمید تے دُنیا وِچ بے خُدا سو۔

¹³ پر تُسی جیہڑے پہلاں دُراڈے سو ہُن مسِیح یِسُوع وِچ مسِیح دے خُون دے سببّوں نیڑے ہوگئے ہو۔

¹⁴ کیوں جو اوہ ای ساڈی صُلح اے۔ جِس دوہاں نُوں اِک کر لیا۔ تے جُدائی دی کندھ نُوں جیہڑی وِچکار سی ڈھا دِتّا۔

¹⁵ تے اوس اپنے جِسم دی راہِیں وَیر نُوں یعنی اوس شریعت نُوں جِہدے حُکم ضابطے نال سن۔ مَوقُوف کر دِتّا۔ تاں جو اپنے وِچ دوہاں توں اِک نواں اِنسان پَیدا کر کے صُلح کرا وے۔

¹⁶ تے صلِیب اُتّے وَیر نُوں ہٹا کے اوہدے سببّوں دوہاں نُوں اِک تَن بنا کے خُدا نال مِلائے۔

¹⁷ تے اوس آ کے خُوشخبری دِتّی۔ تُہاڈے لئی جیہڑے دُراڈے سو صُلح تے اوہناں لئی وی جیہڑے نیڑے سن صُلح دی خُوشخبری دِتّی۔

¹⁸ کیوں جو اوسے دی راہِیں ساڈی دوہاں دی اِکّو جِہی رُوح وِچ باپ کول ڈھوئی اے۔

¹⁹ سو ہُن تُسی پردیسی تے راہی نئیں۔ سگوں پاک لوکاں دے وطنی تے خُدا دے ٹبّر دے اوہ۔

²⁰ تے رسُولاں تے نبیاں دی نِینّھ اُتّے جِہدی گُٹّھ دا پتّھر آپی مسِیح یِسُوع اے اُسارے گئے اوہ۔

²¹ اوسے وِچ ہر اِک مکان جُڑ کے خُداوند وِچ اِک پاک ہیکل بن دا جاندا اے۔

²² تے تُسی وی اوہدے وِچ رَل کے اُسارے جاندے ہو۔ تاں جو رُوح وِچ خُدا دا گھر بنو۔