کُلُسِّیوں 4 - پنجابی نواں عہد نامہ نظرثانی شدہ چھپائی

¹ مالِکو! اپنے نَوکراں نال ایہہ جان کے عدل تے انصاف کرو پئی اسمان اُتّے ساڈا وی اِک مالک اے۔

ہدایات

² دُعا منگن وِچ لگے رہو۔ تے شُکر نال اوہدے واسطے جاگدے رہو۔

³ تے نال نال ساڈے لئی وی دُعا منگیا کرو پئی خُدا ساڈے اُتّے کلام دا بُوہا کھولے۔ تاں جو مَیں مسِیح دا اوہ بھیت بیان کراں جِہدے سببّوں بَدّھا ہویا آں۔

⁴ تے اوہنوں اجیہا بیان کراں۔ جِہیا مَینُوں چاہیدا اے۔

⁵ وقت نُوں قِیمتی جان کے باہر والیاں نال ہوش نال ورتو۔

⁶ تُہاڈیاں گلّاں سدا اجیہاں فضل والِیاں تے سوادلِیاں ہون۔ پئی تُسی ساریاں نُوں ٹھیک جواب دے سکو۔

اخِیری سلام

⁷ پیارا بھرا تے دیانتدار خادم تُخِکس جیہڑا خُداوند دی سیوا وِچ سنگی اے۔ میرا سارا حال تُہانوں دسے گا۔

⁸ اوہنوں مَیں ایسے لئی تُہاڈے کول گھلّیا اے۔ پئی تُہانوں ساڈے حال دا پتا لگ جائے۔ تے اوہ تُہاڈے دِلاں نُوں تسلّی دے۔

⁹ تے اوہدے نال اُنیسِمُس نُوں وی گھلّیا اے۔ جیہڑا دیانتدار تے پیارا بھرا تے تُہاڈے وِچوں اے۔ ایہہ تُہانوں ایتھوں دِیاں سارِیاں گلّاں دسن گے۔

¹⁰ ارِسترخُس جیہڑا میرے نال قید اے تے برنباس دا بھرا مرقس (جِہدی بابت تُہانوں حُکم مِلے سن جے اوہ تُہاڈے کول آوے تے اوہنوں چنگی طرح مِلنا۔)

¹¹ تے یِسُوع جیہڑا یُوستُس اکھواؤندا اے اوہ سارے جیہڑے سُنت والیاں وِچوں نیں تُہانوں سلام آکھدے نیں۔ نِرے ایہو ای خُدا دی بادشاہی واسطے میرے ساتھی رہے نیں۔ اوہناں توں میری تسلّی ہوئی اے۔

¹² اِپَفراس جیہڑا تُہاڈے وِچوں اے تے مسِیح یِسُوع دا خادم اے تُہانوں سلام آکھدا اے۔ اوہ تُہاڈے لئی دُعا وِچ سدا دَوڑ بھج کر دا رہندا اے۔ تاں جو تُسی خُدا دی پُوری مرضی وِچ کامِل تے پکّے یقِین والے رہو۔

¹³ مَیں اوہدا گواہ آں پئی اوہ تُہاڈے تے لَودِیکیہ تے ہِیراپُلس دے لوکاں لئی بڑی محنت کر دا اے۔

¹⁴ پیارا حکِیم لُوقا تے دِیماس تُہانوں سلام آکھدے نیں۔

¹⁵ لَودِیکیہ دے بھرا نُوں تے نُمفاس تے اوہناں دے گھراں دی کلِیسیاواں نُوں سلام آکھنا۔

¹⁶ تے جدوں ایہہ خط تُسی پڑھ لو تے فیر لَودِیکیہ دی کلِیسیا وِچ گھل دیو۔ تاں جو اوہ وی پڑھ لین۔

¹⁷ تے خط جیہڑا لَودِیکیہ وِچوں آوے پڑھ لوؤ۔ تے ارخِپُّس نُوں آکھنا پئی جیہڑی خِدمت تینُوں خُداوند ولّوں مِلی اے۔ اوہنوں ہوش نال سمبھالِیں۔

¹⁸ میرا پَولُس دا اپنی ہتّھِیں سلام۔ میرِیاں بیڑیاں نُوں چیتے رکھو۔ تُہاڈے اُتّے فضل ہوندا رہے۔