اعمال 8 - پنجابی نواں عہد نامہ نظرثانی شدہ چھپائی

ساؤُل کلِیسیاواں ستاؤندا اے

¹ تے ساؤُل اوہدے مار دین اُتّے راضی سی۔ تے اوس دِن توں یرُوشلِیم دی کلِیسیا اُتّے بڑا ظُلم ہون لگّا۔ تے رسُولاں نُوں چھڈ کے اوہ سارے یہُودیہ تے سامریہ دے مُلک وِچ کھِلّر گئے۔

² تے دِیندار بندیاں ستِفنُس دا کفن دفن کِیتا تے اوہدے لئی بُہت روئے پِٹّے۔

³ تے ساؤُل گھر گھر وڑ کے کلِیسیا دا ناس کر دا سی تے بندیاں تے زنانِیاں نُوں گھسِیٹ کے قید وِچ پواندا سی۔

سامریہ وِچ اِنجِیل دی منادی

⁴ سو اوہ جیہڑے کھِلّر گئے سن کلام دی خُوشخبری سُناندے پِھرے۔

⁵ تے فِلپُّس سامریہ شہر وِچ جا کے لوکاں وِچ مسِیح دی منادی کرن لگّا۔

⁶ تے جد اوہناں سُنیا تے اوہدیاں کراماتاں جیہڑیاں اوہ کر دا سی ویکھیاں تَد بُہت لوکاں اِک دِل ہو کے فِلپُّس دِیاں گلّاں ولّ دھیان کِیتا۔

⁷ ایس لئی پئی بتھیرے لوکاں وِچوں پلِیت رُوحاں بڑی ڈنڈ پا کے نِکل آئِیاں۔ تے بتھیرے مفلُوج تے لُوہلے لنگے چنگے بھلے کِیتے گئے۔

⁸ تے اوس شہر وِچ بڑی خُوشی ہوئی۔

⁹ تے اوہدے توں پہلاں اِک جَنا شمعُون کر کے اوس شہر وِچ رہندا سی جِس اپنے جادُو نال سامریہ دے سارے لوکاں نُوں حَیران کر چھڈیا سی تے اپنے آپ نُوں دسدا سی پئی مَیں بڑا کُجھ ہاں۔

¹⁰ اوہنوں سارے نِکّے توں لے کے وڈّے تِیکر مَن دے تے آکھدے سن پئی ایہہ بندہ خُدا دی اوہ قُدرت اے جیہڑی وڈّی اکھواؤندی اے۔

¹¹ تے اوس بتھیرے چِر دا جادُو نال اوہناں نُوں حَیران کِیتا ہویا سی ایس لئی اوہ اوہنوں مَن دے سن۔

¹² پر جد اوہناں فِلپُّس نُوں سَچّا مَنّیا۔ جیہڑا خُدا دی بادشاہی تے یِسُوع مسِیح دے ناں دی بابت خُوشخبری دیندا سی تاں بندے تے زنانِیاں سارے بپتِسمہ لین لگّے۔

¹³ تے شمعُون آپ وی مَن گیا تے بپتِسمہ لے کے فِلپُّس دے نال ای رہیا۔ تے مُعجزے تے بڑیاں کراماتاں جیہڑیاں ہوندیاں سن ویکھ کے حَیران ہویا۔

¹⁴ تے جد رسُولاں نیں۔ جیہڑے یرُوشلِیم وِچ سن سُنیا پئی سامریاں نیں خُدا دا کلام قبولیا اے۔ تَد پطرس تے یُوحنّا نُوں اوہناں دے کول گھلّیا۔

¹⁵ اوہناں اوتھے جا کے اوہناں دے واسطے دُعا منگی۔ پئی اوہناں نُوں پاک رُوح مِلے۔

¹⁶ کیوں جو اجے توڑی اوہناں وِچوں اوہ کِسے اُتّے اُتریا نئیں سی۔ اوہناں نِرا خُداوند یِسُوع دے ناں دا بپتِسمہ لیا سی۔

¹⁷ تَد اوہناں نیں اوہناں اُتّے ہتّھ رکھّے۔ تے اوہناں نُوں پاک رُوح مِلیا۔

¹⁸ سو شمعُون ایہہ ویکھ کے پئی رسُولاں دے ہتّھ رکھن نال پاک رُوح دِتّا جاندا اے اوہناں اگّے رُپئے کِیتے۔

¹⁹ تے آکھیا ایہہ اختیار مَینُوں وی دیو پئی جِہدے اُتّے مَیں ہتّھ رکھاں پاک رُوح اوہنوں مِلے۔

²⁰ پر پطرس اوہنوں آکھیا جا تیرے رُپئے تیرے نال ای برباد ہون کیوں جو تُوں خیال کِیتا پئی خُدا دی بخشِش رُپئیاں نال مِل جائے۔

²¹ تیرا ایس گلّ وِچ نا حِصّہ اے نا ونڈ کیوں جو تیرا دِل خُدا دے اگّے سِدّھا نئیں اے۔

²² سو تُوں اپنی ایس بُریائی توں تَوبہ کر۔ تے خُداوند دی مِنّت کر۔ متاں تیرے دِل دی دلیل تینُوں مُعاف کِیتی جاوے۔

²³ کیوں جو مَیں تینُوں لاگا لگّی کَڑتّن تے بدی دے قابُو وِچ ویکھنا آں۔

²⁴ شمعُون جواب دِتّا۔ پئی تُسی ای میرے لئی خُدا دے اگّے مِنّت کرو۔ پئی جِہدا تُساں ذِکر کِیتا میرے اُتّے کُجھ نا آوے۔

²⁵ تے جد اوہناں خُوب گواہی دِتّی تے خُدا دا کلام سُنایا تَد یرُوشلِیم نُوں مُڑے تے سامریاں دے بتھیریاں پِنڈاں وِچ خُوشخبری سُناندے گئے۔

فِلپُّس تے حبشی خوجہ

²⁶ پر خُداوند دے فرِشتے فِلپُّس نال کلام کر کے آکھیا۔ پئی اُٹھ۔ تے دَکھّن ولّ اوس راہ اُتّے جا جیہڑا یرُوشلِیم توں غَزّہ نُوں جاندا اے۔ اوہ بیابان اے۔

²⁷ تے اوہ اُٹھ کے ٹُرپیا تے ویکھو اِک حبشی کُھسرا سی۔ تے حبشِیاں دی رانی کندا دا وزِیر تے اوہدے سارے خزانیاں اُتّے سی یرُوشلِیم وِچ عبادت کرن نُوں آ گیا سی۔

²⁸ اوہ پرتدیاں ہویاں اپنے رَتھ اُتّے بَیٹھا ہویا۔ یسعیاہ نبی دی کتاب پیا پڑھدا سی۔

²⁹ تے رُوح فِلپُّس نُوں آکھیا۔ اگّے ہو تے اوس رَتھ نُوں جا رَل۔

³⁰ تے فِلپُّس اوہدے ولّ بھجیا تے اوہنوں یسعیاہ نبی دی کتاب پڑھدیاں سُنیا۔ تے آکھیا جو کُجھ تُوں پڑھنا ایں اوہدی کُجھ سمجھ وی آؤندی اے؟

³¹ اوس آکھیا۔ مَیں کِیویں سمجھاں۔ جِنّاں چِر کوئی مَینُوں راہ نا پائے؟ تے اوس فِلپُّس دی مِنّت کِیتی پئی چڑھ کے میرے نال بَہو۔

³² تے پاک کتاب دا تھاں جیہڑا اوہ پیا پڑھدا سی سو ایہہ سی۔ پئی اوہ بھیڈ وانگُوں ذِبح ہون لئی کھڑیا گیا۔ تے جیویں لیلا اپنے مُنّن والیاں اگّے بے زبان رہندا اے۔ اوس طرح اپنا مُنھ نا کھولیا۔

³³ اوہدی غرِیبی وِچ اوہدا انصاف نا ہویا۔ تے اوہدی نسل دا بیان کون کرے گا؟ کیوں جو اوہدی زِندگی دھرتی اُتّوں مٹائی جاندی اے۔

³⁴ تے کُھسرے نے فِلپُّس نُوں آکھیا۔ مِہربانی کر کے مَینُوں دس ایہہ گلّ نبی کِہدے بارے آکھدا اے؟ اپنی یا کِسے ہور دی۔

³⁵ تَد فِلپُّس اپنا مُنھ کھولیا تے اوس نوِشتے نُوں مُڈھوں لے کے یِسُوع دی خُوشخبری اوہنوں سُنائی۔

³⁶ تے جاندِیاں جاندِیاں راہ وِچ اوہ اِک پانی اُتّے اَپڑے۔ تاں کُھسرے آکھیا۔ ویکھ ایہہ پانی اے بپتِسمہ لین توں مَینُوں کِیہ روکدا اے؟

³⁷ [تَد فِلپُّس آکھیا پئی جے توں دِل لا کے اِیمان لِیاویں تے بپتِسمہ لے سکدا ایں۔ اوس جواب دِتّا پئی مَیں اِیمان لیاؤنا پئی یِسُوع مسِیح خُدا دا پُتر ایہہ۔]

³⁸ تَد اوس حُکم کِیتا۔ پئی رَتھ کھلارو۔ تے اوہ دوویں پانی وِچ اُترے فِلپُّس تے کُھسرا وی تے اوس اوہنوں بپتِسمہ دِتّا۔

³⁹ تے جد اوہ پانیوں نِکل کے باہر آئے۔ تاں خُداوند دا رُوح فِلپُّس نُوں لے گیا۔ تے کُھسرے اوہنوں فیر نا ویکھیا۔ کیوں جو اوہ خُوش ہو کے اپنے راہ ٹُر گیا۔

⁴⁰ پر فِلپُّس اشدُود وِچ آ نِکلیا تے اوس لنگھدیاں ہویاں سبھناں شہراں وِچ اِنجِیل سُنائی جدوں تِیکر قَیصریہ وِچ نا آیا۔