اعمال 6 - پنجابی نواں عہد نامہ نظرثانی شدہ چھپائی

سَتّ مددگار

¹ تے اوہناں دِناں وِچ جد شاگِرد بُہت ہوندے جاندے سن۔ یُونان دے یہُودی عِبرانیاں دے نال کُڑکُڑان لگّے۔ کیوں جو روز دی خبر گِیری وِچ اوہناں دِیاں بیوہ عَورتاں دی پرواہ نئیں سی کِیتی جاندی۔

² تَد باراں رسُولاں نیں شاگِرداں دی جماعت نُوں کول سَدّ کے آکھیا۔ ایہہ تے چَنگا نئیں پئی اسی خُدا دا کلام چھڈ کے کھان پِین دا بندوبست کرئیے۔

³ سو بھراؤ۔ اپنے وِچوں سَتّ نیک ناں بندیاں نُوں لَبّھو۔ جیہڑے رُوح تے دانائی نال بھرے ہوئے ہون۔ پئی اسی اوہناں نُوں ایس کمّ اُتّے مُقرّر کریئے۔

⁴ تے اسی آپ دُعا تے کلام دی خِدمت وِچ رُدھے رہاں گے۔

⁵ تَد ایہہ گلّ ساری جماعت نُوں چنگی لگّی۔ تے اوہناں ستِفنُس کر کے اِک جَنے نُوں جیہڑا اِیمان تے پاک رُوح نال بھریا ہویا سی۔ تے فِلپُّس تے پرُخُرس تے نیکانور۔ تے تِیمون تے پرمناس۔ تے نیکُلاؤس انطاکی نُوں جیہڑا نواں یہُودی مُرید سی چُنیا۔

⁶ تے اوہناں نُوں رسُولاں دے اگّے کھلار دِتّا۔ تے اوہناں دُعا منگ کے اوہناں اُتّے ہتّھ رکھّے۔

⁷ تے خُدا دا کلام وَدھدا گیا۔ تے یرُوشلِیم وِچ شاگِرداں دی گنتری بُہت وَدّھ گئی۔ تے بتھیرے کاہِن ایس دِین وِچ آگئے۔

ستِفنُس دی گِرفتاری

⁸ تے ستِفنُس فضل تے طاقت نال بھریا ہویا وڈّے وڈّے مُعجزے لوکاں وِچ کر دا سی۔

⁹ تَد اوس جماعت وِچوں جیہڑی لِبرتیِنیاں دی اکھواؤندی اے۔ تے کُرینی تے اِسکندریہ دے لوکاں وِچوں۔ تے اوہنوں وِچوں وی جیہڑے کِلِکیہ تے آسِیہ توں آئے ہوئے سن۔ کئی بندے اُٹھ کے ستِفنُس نال بحث کرن لگّے۔

¹⁰ تے اوہ اوس دانائی تے رُوح اگّے جِہدے نال اوہ بولدا سی کھلو نا سکے۔

¹¹ تَد اوہناں بندیاں نُوں چُکیا۔ پئی آکھن۔ پئی اساں اوہنوں مُوسیٰ تے خُدا دی بابت کُفر دِیاں گلّاں آکھدیاں سُنیا اے۔

¹² تے اوہناں لوکاں تے بزُرگاں تے فقِیہاں نُوں اُبھاریا۔ تے اوہدے اُتّے چڑھ آئے۔ تے اوہنوں پھڑ کے پنچایت وِچ لے گئے۔

¹³ تے گواہاں نُوں ایہہ آکھن لئی کھلاریا پئی ایہہ جَنا ایس پاک تھاں تے شریعت دے برخلاف بولن توں باز نئیں آؤندا۔

¹⁴ اساں اوہنوں ایہہ آکھدیاں سُنیا اے پئی ایہہ ای یِسُوع ناصری ایس تھاں نُوں ڈھاوے گا۔ تے جیہڑیاں رِیتاں مُوسیٰ دے راہِیں سانُوں مِلیاں نیں بدل دیوے گا۔

¹⁵ تے صدرِ مجلس دے سارے بہن والیاں اوہدے ولّ دھیان کر کے ویکھیا پئی اوہدا مُکھڑا فرِشتے دے مُکھڑے وانگر اے۔