اعمال 3 - پنجابی نواں عہد نامہ نظرثانی شدہ چھپائی

اِک جماندرُو لنگے نُوں شفا مِلدی اے

¹ پطرس تے یُوحنّا ترِیجے پَہر دی عبادت دے ویلے ہیکل نُوں پئے جاندے سن۔

² تے لوک اِک جماندرُو لنگے نُوں چُک کے لئی جاندے سن تے روز اوس بُوہے اُتّے جیہڑا سوہناں اکھواؤندا اے ایس لئی بہا دیندے سن پئی ہیکل وِچ وڑن والیاں توں خَیرات منگے۔

³ جدوں اوس بندے پطرس تے یُوحنّا نُوں ویکھیا پئی اوہ ہیکل وِچ جانا چاہندے نیں تے سوال کِیتا پئی مَینُوں خَیرات مِلے۔

⁴ تَد پطرس یُوحنّا سَنے اوہدے ولّ نظر کر کے آکھیا۔ تُوں ساڈے ولّ ویکھ۔

⁵ تے ایس آس اُتّے پئی اوہناں کولوں کُجھ مِلے اوس اوہناں ولّ دھیان کِیتا۔

⁶ پطرس آکھیا۔ چاندی سونا تاں میرے کول نئیں اے پر جو کُجھ میرے کول اے اوہ تینُوں دینا آں۔ پئی یِسُوع مسِیح ناصری دے ناں وِچ ٹُر پَو۔

⁷ تے اوس اوہدا سَجّا ہتّھ پَھڑکے اوہنوں چُکیا۔ اوسے ویلے اوہدے پَیر تے گِٹے تگڑے ہوگئے۔

⁸ تے اوہ چھال مار کے اُٹھ کھلوتا تے ٹُرن پِھرن لگ پیا۔ تے اوہ خُدا دی وڈیائی کر دا تے چھالاں مار دا اوہناں دے نال ہیکل وِچ گیا۔

⁹ تے ساریاں لوکاں اوہنوں ٹُردیاں پِھردیاں تے خُدا دی وڈیائی کر دیاں ویکھیا۔

¹⁰ تے اوہنوں پچھان لیا۔ پئی ایہہ اوہ اے جیہڑا ہیکل دے سوہنے بُوہے اُتّے خَیرات منگن نُوں بہایا جاندا سی تے اوہ اوس حال توں جیہڑا اوہدے اُتّے گُذریا سی بُہت حَیران ہو کے ہکّے بکّے ہوگئے۔

ہیکل وِچ پطرس دی منادی

¹¹ تے جد اوہ پطرس تے یُوحنّا دا پِچھّا نئیں سی چھڈ دا تَد سارے لوک بڑے حَیران ہو کے اوس برانڈے ولّ جیہڑا سُلیمان دا اکھواؤندا اے۔ اوہناں کول نسّے آئے۔

¹² تَد پطرس ایہہ حال ویکھ کے لوکاں نُوں آکھیا۔ اَے اِسرائیلیو! ایس گلّ اُتّے تُسی کیوں حَیران ہوندے ہو۔ تے سانُوں کیوں اینج ویکھدے ہو پئی اساں اپنی قُدرت یا دِینداری نال اوہنوں ٹُرن دی طاقت بخشی اے؟

¹³ ابرہام تے اِضحاق تے یعقُوب دے خُدا۔ ساڈے پئیو دادیاں دے خُدا اپنے خادم یِسُوع نُوں جلال دِتّا۔ اوہنوں تُساں حوالے کِیتا۔ تے پِیلاطُس دے سامھنے اِنکاری ہوئے جِس ویلے اوس اوہنوں چھڈ دین دا اِرادہ کِیتا۔

¹⁴ سگوں تُسی اوہدا جیہڑا قُدُّوس تے سَچّا سی اِنکار کِیتا۔ تے اِک خُونی بندے نُوں منگ لیا۔ پئی اوہ تُہاڈے لئی چھڈیا جاوے۔

¹⁵ پر تُساں زِندگی دے مالک نُوں قتل کِیتا۔ جِہنُوں خُدا مُردیاں وِچوں جوالیا۔ تے اسی اوہدے گواہ آں۔

¹⁶ تے اوہدے ناں اُتّے اِیمان رکھن دے سبّب اوہدے ناں تے ایس بندے نُوں تگڑیاں کِیتا۔ جِہنُوں تُسی ویکھدے تے پچھاندے ہو۔ اوس اِیمان نے جیہڑا اوہدی راہِیں اے تُہاڈے ساریاں دے سامھنے ایہنوں ایہہ پُوری تندرستی دِتّی۔

¹⁷ ہُن بھراؤ! مَیں جاننا آں پئی تُساں ایہہ کمّ نادانی نال کِیتا۔ جیویں تُہاڈے سرداراں نیں وی۔

¹⁸ پر جیہڑیاں گلّاں دی خبر خُدا ساریاں نبیاں دی زبانی پہلوں ای دِتّی سی پئی اوہدا مسِیح دُکھ چُکے گا۔ اوس ایویں پُوریاں کِیتیاں۔

¹⁹ سو تَوبہ کرو تے پِھرو تاں جو تُہاڈے گُناہ مٹائے جان۔ تے جد خُداوند دی درگاہوں خُوشحالی دے دِن آؤن۔

²⁰ تے اوہ مسِیح یِسُوع نُوں گھلّے۔ جیہڑا تُہاڈے لئی مُقرّر کِیتا گیا

²¹ ایہہ ضرُوری اے پئی اوہ اسمان وِچ اودُوں تِیکر رہے جد تِیکر سارِیاں شیواں بحال نا کِیتیاں جان جِنہاں دا ذِکر خُدا نے مُڈھوں اپنے پاک نبیاں دی زبانی کِیتا۔

²² مُوسیٰ نے آکھیا سی پئی خُداوند خُدا تُہاڈے بھراواں وِچوں اِک نبی میرے جِہیا کھڑا کرے گا۔ جو کُجھ اوہ تُہانوں آکھے سارے سُنو۔

²³ تے اینج ہوئے گا۔ پئی ہر اِک جان جیہڑی اوس نبی دی نا سُنے اوہدا قوم وِچوں ناس ہو جاوے گا۔

²⁴ تے سموئیل توں لے کے تے اوہدے مگروں آؤن والیاں سارے نبیاں نیں جِنہاں کلام کِیتا اے ایہناں دِناں دی خبر دِتّی۔

²⁵ تُسی نبیاں دی اولاد ہو۔ تے اوس عہد دے سانجھی جیہڑا خُدا تُہاڈے پئیو دادیاں نال کِیتا۔ جد ابرہام نُوں ایہہ آکھیا۔ پئی تیری نسل توں دُنیا دے سارے گھرانیاں نُوں برکت مِلے گی۔

²⁶ تُہاڈے ای کول سبھ توں پہلاں خُدا اپنے خادم نُوں اُٹھال کے ایس لئی گھلّیا پئی تُہاڈے وِچوں ہر اِک نُوں اوہدیاں بُرائیاں توں پھیر کے برکت دیوے۔