اعمال 17 - پنجابی نواں عہد نامہ نظرثانی شدہ چھپائی

تھِسّلُنِیکے وِچ

¹ تے اوہ امفِپُلِس تے اَپُلّونیہ توں لنگھ کے تھِسّلُنِیکے وِچ اَپڑے۔ اوتھے یہُودِیاں دا اِک عبادت خانہ سی۔

² تے پَولُس اپنے دستُور دے سببّوں اوہناں کول گیا۔ تے تِنّاں سبتاں تِیکر پاک کتاب وِچوں اوہناں نُوں سِکھالدا رہیا۔

³ تے اَنترے کڈھ کے اوہ ثابت کر دا رہیا پئی مسِیح دا دُکھ اُٹھانا تے مُردیاں وِچوں جی اُٹھنا ضرُور سی۔ تے ایہو یِسُوع جِہدی خبر مَیں تُہانوں دینا آں اوہو مسِیح اے۔

⁴ اوہناں وِچوں کئیاں مَن لیا۔ تے پَولُس تے سِیلاس نال رَل گئے۔ تے ایسے طرح دِیندار یُونانِیاں دی اِک بڑی جماعت۔ تے نالے بتھیریاں اشراف زنانِیاں وی۔

⁵ پر یہُودِیاں نُوں ساڑا پَے گیا۔ تے کئی بازاری شوہدے اوہناں اپنے نال رَلا کے بِھیڑ نُوں اکٹّھا کِیتا تے شہر وِچ رَولا پا دِتّا۔ تے یاسون دا گھر گھیر کے چاہندے سن پئی اوہناں نُوں لوکاں دے اگّے لے آؤن۔

⁶ جدوں اوہناں نُوں نا لَبھّا۔ تاں یاسون نُوں۔ تے کئی بھراواں نُوں شہر دے حاکماں کول کھِچّ لیاندا پئی ایہہ بندہ جِنہاں نیں جہان نُوں اُلٹا دِتّا اے۔ ایتھے وی آئے نیں۔

⁷ تے یاسون نے ایہناں نُوں پَروہناں رکھیا اے۔ تے ایہناں ساریاں دی کارروائی قَیصر دے حُکماں دے خلاف اے۔ کیوں جو اوہ آکھدے نیں پئی بادشاہ تے ہور ای اے۔ یعنی یِسُوع۔

⁸ تے اوہناں لوکاں نُوں تے شہر دیاں حاکماں نُوں ایہہ گلّ سُنا کے گھبرا دِتّا۔

⁹ سو اوہناں یاسون تے دُوجیاں توں ضمانت لے کے اوہناں نُوں چھڈ دِتّا۔

بِیرِیّہ وِچ

¹⁰ پر بھراواں فٹافٹ راتوں رات پَولُس تے سِیلاس نُوں بِیرِیّہ شہر وِچ گھل دِتّا۔ اوہ اوتھے اَپڑ کے یہُودِیاں دے عبادت خانہ وِچ گئے۔

¹¹ ایس شہر دے لوک تھِسّلُنِیکے دے لوکاں نالوں بھلے مانس سن۔ کیوں جو اوہناں نیں بڑے شَوق نال کلام مَن لیا۔ تے روز روز پاک کتاب وِچ لبّھدے رہئے۔ پئی ایہہ گلّاں ٹھیک ایسے طرح نیں کہ نئیں۔

¹² ایس کر کے اوہناں وِچوں بتھیرے اِیمان لیائے تے نالے بُہت سارِیاں اشراف یُونانی زنانِیاں تے بندے وی اِیمان لیائے۔

¹³ جد تھِسّلُنِیکے دے یہُودِیاں نُوں معلُوم ہویا۔ پئی پَولُس خُداوند دا کلام بِیرِیّہ وِچ وی سُناندا اے تاں اوتھے وی لوکاں نُوں چُکیا تے اوہناں وِچ گڑ بڑی پائی۔

¹⁴ تَد بھراواں نیں اوسے ویلے پَولُس نُوں بھیجیا۔ پئی سمُندر ولّ ٹُر جائے۔ پر سِیلاس تے تِیمُتِھیُس اوتھے ای رہے۔

¹⁵ تے پَولُس دے پُہنچان والے اوہنوں اتھینے تِیکر لے گئے تے سِیلاس تے تِیمُتِھیُس دے لئی ایہہ حُکم لے کے ٹُر پئے۔ پئی جیویں ہوئے چھیتی نال اوہدے کول آؤن۔

اتھینے وِچ

¹⁶ تے جدوں پَولُس اتھینے وِچ اوہناں نُوں اُڈِیکدا سی۔ تاں شہر نُوں بُتاں نال بھریا ہویا ویکھ کے اوہنوں دِلوں کَوڑ لگّی۔

¹⁷ ایس لئی یہُودِیاں تے دِیندار لوکاں نال عبادت خانے وِچ۔ تے روز روز اوہناں دے نال جیہڑے مِلدے سن۔ بازار وِچ اوہ بحث کر دا سی۔

¹⁸ تے بعضے اِپِکُوری تے ستوئِیکی سِیانے اوہدے نال مُقابلہ کرن لگّے۔ تے بعضیاں نیں آکھیا۔ پئی ایہہ گپّی کِیہ آکھنا چاہندا اے؟ تے ہورناں نیں آکھیا۔ پئی ایہہ بندہ اوپرے دیوتیاں دی خبر دسن والا معلُوم ہوندا اے۔ ایس لئی پئی اوہ یِسُوع دی تے قیامت دی خُوشخبری دیندا سی۔

¹⁹ تے اوہنوں اپنے نال اریوپگُس وِچ لے گئے۔ تے پُچھیا۔ پئی سانُوں معلُوم ہوسکدا اے پئی ایہہ نَوِیں تعلِیم جیہڑی تُوں دسنا ایں کِیہ اے؟

²⁰ کیوں جو تُوں کُجھ اوپریاں گلّاں ساڈے کنّاں وِچ پانا ایں۔ سو اسی جاننا چاہنے آں۔ پئی ایہناں گلّاں دا کِیہ مطلب اے۔

²¹ (کیوں جو سارے اتھینے دے لوک تے پردیسی جیہڑے اوتھے رہندے سن نَوِیاں نَوِیاں گلّاں آکھن تے سُنن دے بِناں اپنا ویہلا ویلا ہور کِسے کمّ وِچ نئیں سن لاندے۔)

²² تے پَولُس تے اریوپگُس دے وِچکار کھلو کے آکھیا۔ اَے اتھینے والیو! مَیں ویکھنا آں پئی سارِیاں گلّاں وِچ تُسی دیوتیاں دے مَنّن والے ہو۔

²³ کیوں جو مَیں لنگھدیاں لنگھدیاں تُہاڈے دیوتیاں اُتّے نظر کر دیاں اِک قُربان گاہ وی ویکھی جِہدے اُتّے ایہہ لِکھیا ہویا سی پئی انجان خُدا دے لئی۔ سو جِہنُوں تُسی انجاتیاں پُوجدے ہو اوہدی خبر مَیں تُہانوں دینا آں۔

²⁴ خُدا جِہنے جہان تے جو کُجھ اوہدے وِچ اے بنایا۔ اوہ اسمان تے زمین دا مالک ہو کے ہتّھاں دے بنایاں ہویاں بُت خانیاں وِچ نئیں وَسدا۔

²⁵ تے نا بندیاں دے ہتھّوں سیوا کراندا اے۔ پئی اوہنوں کِسے شے دی تُھڑ پئی ہوئی ہوئے۔ کیوں جو اوہ آپے سبھناں نُوں زِندگی تے ساہ تے سبھ کُجھ دیندا اے۔

²⁶ تے اوس اِک ای اصل توں بندیاں دِیاں سبھناں قوماں نُوں ساری دھرتی اُتّے دسن لئی پَیدا کِیتا۔ تے اوہناں دِیاں میعاداں تے رہن دِیاں حداں ٹھہرائیاں۔

²⁷ تاں جو اوہ خُدا نُوں لَبّھن۔ شاید ٹوہ ٹوہ کے اوہنوں لَبّھ وی لین۔ بھانویں اوہ ساڈے وِچوں کِسے توں دُراڈے نئیں اے۔

²⁸ کیوں جو اوہدے وِچ اسی جِیوندے تے ٹُردے پِھرے دے تے موجُود رہنے آں۔ جیویں بعضے تُہاڈے اپنے شاعِراں نیں وی آکھیا اے۔ پئی اسی تاں اوسے دی نسل آں۔

²⁹ سو خُدا دی نسل ہو کے سانُوں نئیں چاہیدا پئی ایہہ سمجھیئے۔ پئی ذاتِ اِلہٰی سونے چاندی یا پتّھر وانگُوں اے۔ جیہڑے بندے دی کاریگری تے عقل نال گھڑے ہوئے نیں۔

³⁰ خُدا تے ناواقفی دے ویلے وِچ خیال نا کر کے ہُن بندیاں نُوں حُکم دیندا اے پئی ساریاں دے سارے ہر تھاں تَوبہ کرن۔

³¹ تے اوس اِک دِن وی رکھیا اے۔ جِہدے وِچ اوہ سچیائی نال دُنیا دی عدالت اوس بندے دی راہِیں کرے گا۔ جِہنُوں اوس مُقرّر کِیتا۔ تے اوسے نُوں مُردیاں وِچوں جوال کے لوکاں نُوں ایس گلّ دا یقِین دوایا اے۔

³² تے جد اوہناں مُردیاں وِچوں جی اُٹھن دی گلّ سُنی تَد کئی مخَول کرن لگّے۔ تے ہورناں آکھیا۔ پئی اسی ایہہ گلّ تَیتھوں فیر سُناں گے۔

³³ سو پَولُس ایویں اوہناں دے وِچوں ٹُر گیا۔

³⁴ پر کئیاں اوہدے نال رَل کے اِیمان لیاندا۔ اوہناں وِچ دِیونُسی یُس۔ اریوپگُس دا اِک حاکم سی۔ تے دَمَرِس کر کے اِک زنانی تے ہور کئی اوہناں دے نال سن۔