اعمال 11 - پنجابی نواں عہد نامہ نظرثانی شدہ چھپائی

پطرس یرُوشلِیم وِچ کلِیسیا نُوں خبر دیندا اے

¹ تَد اوہناں رسُولاں تے بھراواں نُوں جیہڑے یہُودیہ وِچ سن خبر ہوئی۔ پئی غیر قوماں نیں وی خُدا دے کلام نُوں قبول کِیتا۔

² تے جدوں پطرس یرُوشلِیم وِچ آیا۔ اوہ جیہڑے سُنتی بَیٹھے ہوئے سن اوہدے نال جھگڑن لگّے۔

³ پئی تُوں اوہناں بندیاں کول گیا جیہڑے سُنتی نئیں بَیٹھے ہوئے۔ تے اوہناں دے نال کھادا۔

⁴ پر پطرس مُڈھ توں اوہناں دے اگّے ترتیب نال بیان کِیتا۔

⁵ پئی مَیں یافا دے شہر وِچ دُعا پیا منگدا ساں۔ تے بے خود ہو کے اِک رویا ویکھی۔ تے اسمانوں چَوہاں پَلیاں توں لمکائی ہوئی کِسے وڈّی چادر جِہی اِک شے اُتر دی میرے تِیکر آئی۔

⁶ مَیں اوہنوں دھیان کر کے سوچیا تے زمین دے ڈنگر تے بیابانی جنَور تے کِیڑے کاڑے تے وَا دے پنچھیاں نُوں ویکھیا۔

⁷ تے مَیں اِک اواز وی سُنی جیہڑی مَینُوں آکھدی سی اَے پطرس اُٹھ ہلال کر کے کھا۔

⁸ مَیں آکھیا اَے خُداوند کدی نئیں کیوں جو کوئی ناپاک یا پلِیت شے کدی میرے مُنھ وِچ نئیں گئی۔

⁹ تے جواب وِچ دُوجی وار اسمانوں اواز آئی۔ پئی جِہنُوں خُدا پاک کِیتا اے اوہنوں تُوں ناپاک نا بنا۔

¹⁰ ایہہ تِنّ واری ہویا۔ فیر سبھ کُجھ اسمان ولّ کھِچّیا گیا۔

¹¹ تے ویکھو اوسے ویلے تِنّ بندے جیہڑے قَیصریہ توں میرے کول گھلّے گئے سن۔ اوس گھر اگّے جِتّھے اسی ساں پہنچ گئے۔

¹² تے رُوح مَینُوں آکھیا۔ تُوں جھجھگیا نا کر۔ اوہناں دے نال ٹُر جا۔ تے ایہہ چھ بھرا میرے نال ٹُر پئے۔ تے اسی اوس بندے دے گھر وِچ گئے۔

¹³ تے اوس سانُوں دسیا پئی کِیویں اوس اِک فرِشتے نُوں اپنے گھر وِچ کھلوتا ویکھیا۔ جِس اوہنوں آکھیا۔ پئی یافا وِچ گھل تے شمعُون نُوں جیہڑا پطرس اکھواؤندا اے سَدّ۔

¹⁴ اوہ تینُوں اجیہاں گلّاں سُنائے گا جِنہاں توں تینُوں تے تیرے سارے گھرانے نُوں وی نجات مِلے گی۔

¹⁵ تے جیویں مَیں بیان کرن لگّا۔ تَد پاک رُوح اوہناں دے اُتّے اُتریا۔ جیویں پہلاں ساڈے اُتّے وی اُتریا سی۔

¹⁶ تَد مَینُوں خُداوند دی گلّ جیہڑی اوس آکھی یاد آئی۔ پئی یُوحنّا تاں پانی نال بپتِسمہ دِتّا۔ پر تُہانوں پاک رُوح نال بپتِسمہ مِلے گا۔

¹⁷ سو جدوں خُدا اوہناں نُوں اوہی نِعمت دِتّی جیہڑی سانُوں دِتّی گئی۔ جِس ویلے اسی خُداوند یِسُوع مسِیح اُتّے اِیمان لیائے تاں مَیں کون ساں جیہڑا خُدا نُوں روک سکدا؟

¹⁸ اوہ ایہہ سُن کے چُپ کر گئے۔ تے خُدا دی وڈیائی کر کے آکھن لگّے۔ تَد تے غیر قوماں نُوں وی خُدا زِندگی لئی تَوبہ بخشی اے۔

انطاکیہ دی کلِیسیا

¹⁹ تے جیہڑے بندے اوس دُکھ مُصِیبت دے سببّوں جیہڑی ستِفنُس دے سبّب نال پئی سی کھِلّر گئے سن۔ سو فینِیکے کُپرُس تے انطاکیہ تِیکر اَپڑے۔ تے یہُودِیاں باہجوں کِسے نُوں کلام نئیں سن سُناندے۔

²⁰ تے اوہناں وِچوں کئی کُپرُسی تے کئی کُرینی سن جِنہاں انطاکیہ وِچ آن کے یُونانِیاں نال وی کلام کِیتا۔ تے خُداوند یِسُوع دی خُوشخبری سُنائی۔

²¹ تے خُداوند دا ہتّھ اوہناں دے اُتّے سی۔ تے بتھیرے لوک جیہڑے اِیمان لیائے خُداوند ولّ پِھرے۔

²² تے اوہناں دی بابت یرُوشلِیم دی کلِیسیا دے کنّ وِچ خبر آئی۔ تَد اوہناں برنباس نُوں انطاکیہ تِیکر گھلّیا۔

²³ جد اوہ اَپڑیا تے خُدا دا فضل ویکھیا۔ تَد خُوش ہویا۔ تے اوس اوہناں سبھناں نُوں نصِیحت کِیتی پئی دِل لا کے خُداوند نال مِلے رہن۔

²⁴ کیوں جو اوہ چَنگا بندہ سی تے پاک رُوح تے اِیمان نال بھریا ہویا سی۔ تے بتھیرے لوک خُداوند دی کلِیسیا نال آ رَلے۔

²⁵ تے ساؤُل نُوں لَبّھن لئی اوہ تَرسُس نُوں ٹُر گیا۔ تے اوہنوں لَبّھ کے انطاکیہ وِچ لے آیا۔

²⁶ تے ایویں ہویا پئی اِک سال تِیکر اوہ کلِیسیا دے نال اکٹّھے رہے۔ تے بُہت لوکاں نُوں تعلِیم دیندے سن۔ تے شاگِرد پہلاں انطاکیہ وِچ ای مسِیحی اکھوائے۔

²⁷ اونہی دِنیں کئی نبی یرُوشلِیم توں انطاکیہ وِچ آئے۔

²⁸ اوہناں وِچوں اِک اَگَبُس کر کے اُٹھیا۔ تے رُوح دی راہِیں خبر دِتّی۔ پئی ساری دُنیا وِچ بڑا کال پَین والا اے۔ تے کلَودِیُس دے سَمے وِچ ایہہ کال پَے گیا۔

²⁹ تَد شاگِرداں وِچوں ہر اِک نے اپنی اپنی توفِیق دے سببّوں ایہہ ٹھہرایا۔ پئی اوہناں بھراواں کول جیہڑے یہُودیہ وِچ رہندے نیں کُجھ مدد واسطے گھلِئے۔

³⁰ تے اوہناں ایویں کِیتا تے برنباس تے ساؤُل دی ہتّھِیں بزُرگاں کول گھل دِتّا۔