اعمال 1 - پنجابی نواں عہد نامہ نظرثانی شدہ چھپائی

¹ اَے تھِیُفِلُس مَیں اوہناں سارِیاں گلّاں دی پہلی کتاب بنائی اے۔ جیہڑیاں یِسُوع شُروع وِچ کر دا تے سِکھاؤندا رہیا۔

² اوس دِن تِیکر پئی جد پاک رُوح دی راہِیں اپنے چُنیاں ہویاں رسُولاں نُوں حُکم دین دے پِچّھوں اوہ اُتانہہ چُکیا گیا۔

³ اوہناں نُوں اوس اپنے دُکھ سہن دے پِچّھوں بتھیریاں ثبُوتاں نال اپنے آپ نُوں جِیوندا وکھایا۔ چاھلیاں دِناں تِیکر اوہ اوہناں نُوں وکھالی دیندا تے خُدا دی بادشاہی دِیاں گلّاں دسدا رہیا۔

⁴ تے اوہناں دے نال رَل کے اوہناں نُوں حُکم دِتّا پئی یرُوشلِیم توں باہر نا جاؤ۔ سگوں باپ دے اوس وعدہ دی اُڈِیک رکھو۔ جیہڑا تُساں سُنیا اے۔

⁵ کیوں جو یُوحنّا تے پانی نال بپتِسمہ دِتّا۔ پر تُہانوں تھوڑے دِناں دے پِچّھوں پاک رُوح دا بپتِسمہ مِلے گا۔

یِسُوع دا اسمان تے جانا

⁶ سو اوہناں اکٹّھے ہو کے اوہدے کولوں ایہہ پُچھیا۔ پئی اَے خُداوند تُوں ایسے ویلے اِسرائیل نُوں بادشاہی فیر دیویں گا؟

⁷ پر اوس اوہناں نُوں آکھیا تُہاڈا کمّ نئیں پئی اوہناں ویلیاں یا وقتاں نُوں جانو جِنہاں نُوں باپ اپنے ای وَس وِچ رکھیا اے۔

⁸ پر جدوں پاک رُوح تُہاڈے اُتّے آوے گا۔ تے تُہانوں طاقت مِلے گی۔ تے یرُوشلِیم تے سارے یہُودیہ تے سامریہ وِچ نالے دھرتی دے اخِیر تِیکر۔ تُسی میرے گواہ ہوؤ گے۔

⁹ تے ایہہ آکھ کے اوہناں دیاں ویکھدیاں اوہ اُتانہہ چُکیا گیا۔ تے بدّل اوہنوں اوہناں دِیاں نظراں توں لُکا لیا۔

¹⁰ تے اوہدے جاندِیاں ہویاں۔ جد اوہ اسمان ولّ پئے ویکھدے سن ویکھو دو بندے چِٹّے کپڑے پائے ہوئے اوہناں دے کول آ کھلوتے۔

¹¹ تے اوہ آکھن لگّے۔ اَے گلِیلیو تُسی کاہِنُوں اسمان ولّ ویکھدے ہو؟ ایہو یِسُوع جیہڑا تُہاڈے کولوں اسمان نُوں چُکیا گیا۔ اوسے طرح فیر آوے گا۔ جیویں تُساں اوہنوں اسمان نُوں جاندِیاں ویکھیا۔

یہُوداہ دا جانشین

¹² تَد اوہ پہاڑ توں جیہڑا زَیتُون دا اکھواؤندا اے جیہڑا یرُوشلِیم دے نیڑے سبت دے دِن دا پَینڈا اے یرُوشلِیم نُوں مُڑ پئے۔

¹³ تے جدوں اَپڑے تے اِک چوبارے اُتّے جا چڑھے۔ جِتّھے پطرس تے یُوحنّا تے یعقُوب تے اندریاس تے فِلپُّس تے تُوما۔ تے برتُلمائی تے متّی۔ حلفئی دا پُتر یعقُوب۔ تے زیلوتیس والا شمعُون۔ تے یعقُوب دا پُتر یہُوداہ رہندے سن۔

¹⁴ ایہہ ساریاں دے سارے کئیاں زنانِیاں دے نال تے نالے یِسُوع دی ماں مریم تے اوہدے بھراواں دے نال اِک دِل ہو کے دُعا منگن وِچ لگے رہندے سن۔

¹⁵ تے اوہناں دِناں وِچ پطرس بھراواں دے وِچ جیہڑے اِکّو تھانویں اِک سو وِیہہ کُو بندے سن کھلو کے آکھن لگّا۔

¹⁶ بھراؤ۔ ضرُور سی پئی اوہ نوِشتہ پُورا ہوئے۔ جیہڑا پاک رُوح پہلاں توں داؤد دی زبانی یہُوداہ دی بابت جیہڑا یِسُوع دے پھڑن والیاں دا آگُو بن گیا سی آکھیا۔

¹⁷ کیوں جو اوہ ساڈے وِچ گِنیا گیا۔ تے اوہنوں ایس خِدمت دا حِصّہ مِلیا سی۔

¹⁸ (اوہنے بُریائی دی مزدُوری نال اِک پَیلی مُل لئی۔ تے مُنھ پرنے ڈِگّیا۔ تے اوہدا ڈِھڈ پاٹ گیا تے اوہدیاں سارِیاں آندراں نِکل گِئیاں۔

¹⁹ تے ایہہ حال یرُوشلِیم دے سارے رہن والیاں نُوں معلُوم ہویا ایتھوں تِیکر پئی اوہناں دی بولی وِچ اوس پَیلی دا ناں ہَقَل دما یعنی خُون دی پَیلی پَے گیا۔)

²⁰ کیوں جو زبُوراں دی کتاب وِچ لِکھیا اے پئی اوہدا گھر اُجّڑ جائے۔ تے اوہدے وِچ کوئی وَسّن والا نا ہوئے۔ تے ایہہ وی پئی اوہدا درجہ دُوجا لے لَوے۔

²¹ سو ضرُور چاہیدا اے۔ پئی ایہناں بندیاں وِچوں جیہڑے ہر ویلے ساڈے نال رہے۔ جِنّاں چِر خُداوند یِسُوع ساڈے وِچ آؤندا جاندا سی۔

²² یُوحنّا دے بپتِسمے توں لے کے اوس دِن تِیکر جدوں اوہ ساڈے کولوں چُک لیا گیا سی۔ اِک بندہ اوہدے جی اُٹھن دا گواہ ساڈے نال بنے۔

²³ تَد اوہناں دو جِنّیاں نُوں سامھنے کِیتا۔ اِک یُوسف نُوں جیہڑا برسبّا اکھواؤندا اے جِہدا لقب یُوستُس سی۔ دُوجا متّیاہ نُوں۔

²⁴ تَد اوہناں دُعا منگ کے آکھیا اَے خُداوند تُوں جیہڑا ساریاں دے دِلاں دا حال جاننا ایں۔ ایہہ دس پئی ایہناں دوہاں وِچوں تُوں کِنوں چُنیا اے۔

²⁵ پئی اوہنوں تھاں مِلے اوس خِدمت تے رسالت دے کمّ وِچ جِہنُوں یہُوداہ چھڈ کے اپنے تھاں گیا۔

²⁶ تے اوہناں نیں اوہناں لئی گُنا پایا۔ تے گُنا متّیاہ دے ناں دا نِکلیا۔ تَد اوہ یارھاں رسُولاں نال گِنیا گیا۔