۲-تِیمُتِھیُس 2 - پنجابی نواں عہد نامہ نظرثانی شدہ چھپائی

مسِیح یِسُوع دا جان نثار سپاہی

¹ سو میرے پُتر تُوں اوس فضل نال جیہڑا مسِیح یِسُوع وِچ اے تگڑا ہو۔

² تے جیہڑیاں گلّاں میرے کولوں بتھیرے گواہاں دے سامھنے سُنیاں نیں اوہناں نُوں اجیہے دیانتدار بندیاں نُوں سونپ جیہڑے ہورناں نُوں وی سکھان دے لائق ہون۔

³ مسِیح یِسُوع دے چنگے سپاہی وانگر میرے نال دُکھ سہہ۔

⁴ کوئی سپاہی لڑائی دے ویلے دُنیا دے معاملیاں وِچ نئیں پھسدا۔ سگوں اپنے بھرتی کرن والے نُوں خُوش کر دا اے۔

⁵ دنگل وِچ گُھلن والے نُوں وی جد تِیکر قاعدے نال نا گُھلے تاج نئیں مِلدا۔

⁶ جیہڑا زمیندار محنت کر دا اے۔ اوہنوں فصل دا حِصّہ پہلاں مِلنا چاہیدا اے۔

⁷ جو کُجھ مَیں آکھنا آں۔ اوہدے اُتّے خیال کر۔ خُداوند تینُوں سارِیاں گلّاں دی سمجھ دے گا۔

⁸ یِسُوع مسِیح نُوں یاد رکھ جیہڑا داؤد دی نسل وِچوں اے۔ تے میری اوس خُوشخبری دے سببّوں مُردیاں وِچوں جی اُٹھیا۔

⁹ جِہدے لئی مَیں بدکار وانگر دُکھ سہناں آں۔ ایتھوں تِیکر پئی قید آں۔ پر خُدا دا کلام قید نئیں۔

¹⁰ ایسے سبّب مَیں چُنیاں ہویاں لوکاں دی خاطر سبھ کُجھ سہنا آں پئی اوہناں نُوں وی اوہ نجات جیہڑی مسِیح یِسُوع وِچ اے۔ سدا دے جلال نال مِل جائے۔

¹¹ سَچّی گلّ ایہہ اے پئی جے اسی اوہدے نال مر گئے۔ تے اوہدے نال جی وی اُٹھاں گے۔

¹² جے اسی دُکھ سہاں گے۔ تے اوہدے نال بادشاہی وی کراں گے۔ جے اسی اوہدا اِنکار کراں گے۔ تے اوہ وی ساڈا اِنکار کرے گا۔

¹³ جے اسی بے وفا ہو جاواں گے۔ تَد اوہ وفادار ای رہے گا۔ کیوں جو اوہ اپنا اِنکار نئیں کر سکدا۔

اِک چَنگا خادم

¹⁴ ایہہ گلّاں اوہناں نُوں یاد کرا۔ تے خُداوند دے سامھنے پَکّی کر پئی لفظی تکرار نا کرن جِہدے توں کُجھ وی فائدہ نئیں سگوں سُنن والے وِگڑ جاندے نیں۔

¹⁵ اپنے آپ نُوں خُدا دے سامھنے مقبُول تے اجیہے کمّ کرن والے وانگر پیش کرن دی کوشش کر جِہنُوں شرمندہ ہونا نا پَوے۔ جیہڑا سَچّے کلام نُوں چج نال کمّ وِچ لیاؤندا اے۔

¹⁶ پر واہیات بکواس توں پرہیز کر۔ کیوں جو اجیہے بندے ہور وی بیدینی وِچ وَدھن گے۔

¹⁷ تے اوہناں دا کلام گھنبِیر وانگر کھاندا رہے گا۔ ہُمِنِیُس تے فِلیتُس اوہناں وِچوں ای نیں۔

¹⁸ اوہ ایہہ آکھ کے پئی قیامت ہوگئی اے سچیائی توں پھر گئے نیں۔ تے بعضیاں دا اِیمان وگاڑ دے نیں۔

¹⁹ تَد وی خُدا دی پَکّی نِینّھ قیم رہندی اے۔ تے اوہدے اُتّے ایہہ مُہر اے پئی خُداوند اپنیاں نُوں پچھاندا اے۔ تاں جو کوئی خُداوند دا ناں لَیندا اے۔ ناراستی توں مُڑ جائے۔

²⁰ وڈّے گھر وِچ نا نِرے سونے چاندی دے بھانڈے ہوندے نیں سگوں لکڑ تے مِٹّی دے وی بعضے عِزّت تے بعضے بے عِزّتی دے لئی۔

²¹ سو جیہڑا اوہناں توں وکھرا ہو کے اپنے آپ نُوں پاک کرے گا اوہ عِزّت دا بھانڈا ہوئے گا تے پاک بنے گا۔ تے مالک دے کمّ دے لائق تے ہر اِک نیک کمّ دے لئی تیار ہوئے گا۔

²² جوانی دِیاں خواہشاں توں بچ۔ جیہڑے صاف دِلی نال خُداوند توں دُعا منگدے نیں۔ اوہناں دے نال راستبازی تے اِیمان تے پیار تے صُلح دا لَبّھن والا ہو۔

²³ پر بےکل تے نادانی دے مخولاں توں ایہہ جان کے وکھرا رہ۔ پئی اوہ جھگڑا پَیدا کر دے نیں۔

²⁴ تے چَنگا نئیں پئی خُداوند دا بندہ جھگڑا کرے سگوں ساریاں دے نال نرمی کرے تے تعلِیم دین دے لائق تے صبر کرن والا ہوئے۔

²⁵ تے مخالفت کرن والیاں نُوں حلِیمی نال تعلِیم دے۔ شاید خُدا اوہناں نُوں تَوبہ دی طاقت بخشے پئی اوہ سچیائی نُوں جانن۔

²⁶ تے خُداوند دے بندے دے ہتھّوں خُدا دی مرضی دے قیدی ہون تے ابلیس دی پھاہی تُوں چُھٹن۔