۲-پطرس 1 - پنجابی نواں عہد نامہ نظرثانی شدہ چھپائی

¹ شمعُون پطرس ولّوں جیہڑا یِسُوع مسِیح دا غلام تے رسُول اے۔ اوہناں لوکاں دے ناں جِنہاں ساڈے خُدا تے نجات دین والے یِسُوع مسِیح دی راستبازی دی راہِیں ساڈے وانگر قِیمتی اِیمان پایا اے۔

² خُدا تے ساڈے خُداوند یِسُوع دی پہچان دی راہِیں۔ تُہانوں بُہتا فضل تے تسلّی مِلدی رہے۔

خُدا دی بُلاہٹ تے مرضی

³ کیوں جو اوہدی اِلہٰی قُدرت نے اوہ سارِیاں شیواں جیہڑیاں زِندگی تے دِینداری دِیاں ہوندیاں نیں سانُوں اوہدی پہچان دی راہِیں دِتّیاں۔ جِس سانُوں اپنے خاص جلال تے نیکی دی راہِیں سدّیا۔

⁴ تے اوہناں دی راہِیں اوس ساڈے نال قِیمتی تے بتھیرے وڈّے وعدے کِیتے۔ تاں جو اوہناں دی راہِیں تُسی اوس خرابی توں چُھٹ کے جیہڑی دُنیا وِچ بُری خواہش دے سببّوں اے۔ اوہناں دی راہِیں ذاتِ اِلہٰی وِچ سنگی ہو جاؤ۔

⁵ سو ایس کر کے تُسی اپنے ولّوں بڑی کوشش کر کے اپنے اِیمان اُتّے نیکی وَدھاؤ۔ تے نیکی اُتّے عِلم۔

⁶ تے عِلم اُتّے پرہیزگاری تے پرہیزگاری اُتّے صبر تے صبر اُتّے دِینداری۔

⁷ تے دِینداری اُتّے بھراواں دا پیار۔ تے بھراواں دے پیار اُتّے وی مُحبّت وَدھاؤ۔

⁸ کیوں جو جے ایہہ گلّاں تُہاڈے وِچ ہون تے وَدّھ دِیاں جان تے ساڈے خُداوند یِسُوع مسِیح دے پچھانن وِچ تُہانوں بیکار تے بے پَھل نا ہون دین گِئیاں۔

⁹ تے جِہدے وِچ ایہہ گلّاں نا ہون اوہ اَنھا تے مَٹّھی نظر والا اے تے اپنے پرانے گُناہ توں پاک ہونا بُھل گیا۔

¹⁰ سو بھراؤ! اپنے بُلاوے تے برگزیدگی نُوں ثابت کرن دی وَدّھ کے کوشش کرو۔ کیوں جو جے تُسی ایس طرح کرو۔ تے کدی وی ٹھیڈا نا کھاؤ گے۔

¹¹ سگوں ایس توں تُسی ساڈے خُداوند تے نجات دین والے یِسُوع مسِیح دی سدا دی بادشاہی وِچ بڑی عِزّت نال داخل کِیتے جاؤ گے۔

¹² ایس لئی مَیں تُہانوں ایہہ گلّاں یاد دوان نُوں سدا تیار رہاں گا۔ بھانویں تُسی اوہناں نُوں جان دے ہو۔ تے اوس سَچّی گلّ اُتّے قیم ہو جیہڑی تُہانوں مِلی ہوئی اے۔

¹³ تے جد تِیکر مَیں ایس تنبُو وِچ آں تُہانوں یاد دوا دوا کے اُبھارنا واجب سمجھنا آں۔

¹⁴ کیوں جو ساڈے خُداوند یِسُوع مسِیح دے دسن نال مَینُوں پتا اے پئی میرے تنبُو دے ڈَھے جان دا ویلا چھیتی آؤن والا اے۔

¹⁵ سو مَیں اجیہی کوشش کراں گا پئی میرے مرن پِچّھوں تُسی ایہناں گلّاں نُوں سدا یاد رکھ سکو۔

مسِیح دے جلال دے اَکھّیں ویکھے گواہ

¹⁶ کیوں جو جد اساں تُہانوں اپنے خُداوند یِسُوع مسِیح دی قُدرت تے آؤن توں واقف کِیتا سی۔ تاں دھوکھے بازی دِیاں بنائِیاں ہویاں کہانِیاں دی پَیروی نئیں سی کِیتی سگوں آپ ای اوہدی مَہما نُوں ویکھیاں سی۔

¹⁷ پئی اوس خُدا باپ اوس ویلے عِزّت تے جلال پایا جد اوس بڑے جلال وِچوں اوہنوں ایہہ اواز آئی پئی ایہہ میرا پیارا پُتر اے جِہدے توں مَیں خُوش آں۔

¹⁸ تے جدوں اسی اوہدے نال پاک پہاڑ اُتّے ساں۔ تے اسمانوں ایہہ اواز آؤندی سُنی۔

¹⁹ تے ساڈے کول نبیاں دا اوہ کلام اے جیہڑا وَدّھ اعتبار والا اے۔ تے تُسی چَنگا کر دے ہو جو ایہہ سمجھ کے اوہدے اُتّے دھیان کر دے ہو پئی اوہ اِک دِیوا اے۔ جیہڑا ہنیرے تھاں وِچ چانن کر دا اے۔ جد تِیکر دِن نا چڑھے تے صُبح دا ستارہ تُہاڈے دِلاں وِچ نا چمکے۔

²⁰ تے پہلاں ایہہ جان لو پئی پاک کتاب دی کِسے نبُوّت دا بیان کِسے دے ذاتی اختیار وِچ نئیں۔

²¹ کیوں جو کوئی نبُوّت بندیاں دی مرضی نال نئیں ہوئی سگوں بندے پاک رُوح دی جُنبش نال خُدا ولّوں بولدے سن۔