۲یُوحنّا 1 - پنجابی نواں عہد نامہ نظرثانی شدہ چھپائی

¹ میرے ولّوں جیہڑا بزُرگ آں اوس چُنی ہوئی بی بی تے اوہدے پُتراں دے نال جِنہاں نال مَیں اوس سچیائی دے سببّوں سَچّی مُحبّت رکھنا آں جیہڑی ساڈے وِچ قیم رہندی اے۔ تے سدا تِیکر ساڈے نال رہے گی۔

² تے اِکّو مَیں ای نئیں سگوں اوہ سارے لوک وی مُحبّت کر دے نیں جیہڑے سچیائی نُوں جان دے نیں۔

³ خُدا باپ تے باپ دے پُتر یِسُوع مسِیح ولّوں سچیائی تے مُحبّت وِچ فضل تے رَحم تے تسلّی ساڈے نال رہوے گی۔

سچیائی تے مُحبّت

⁴ مَیں بُہت خُوش ہویا۔ جدوں مَیں تیرے کئی مُنڈیاں نُوں اوس حُکم اُتّے جیہڑا سانُوں باپ ولّوں مِلیا سی۔ ٹھیک ٹھیک ٹُردیاں دیکھیا۔

⁵ ہُن بی بی مَیں تینُوں کوئی نواں حُکم نئیں سگوں اوہ ای جیہڑا مُڈھوں ساڈے کول اے لِکھنا آں تے تیری مِنّت کرنا آں۔ پئی اسی اِک دُوجے دے نال مُحبّت کریئے۔

⁶ تے مُحبّت ایہہ اے پئی اسی اوہدے حُکماں اُتّے چلّئے۔ ایہہ اوہی حُکم اے جیہڑا مُڈھوں تُساں سُنیا۔ پئی تُہانوں اوہدے اُتّے چلنا چاہیدا اے۔

⁷ کیوں جو کئی بدراہ کرن والے دُنیا وِچ آگئے نیں جیہڑے یِسُوع مسِیح دے اوتاری ہو کے آؤناں نئیں مَن دے۔ دھوکھا دین والا تے مسِیح دا وَیری ایہو ای اے۔

⁸ اپنا دھیان رکھو۔ پئی جیہڑی محنت اساں کِیتی اے۔ اوہ تُہاڈی راہِیں اوگت نا جائے سگوں تُہانوں پُورا بدلہ مِلے۔

⁹ جیہڑا اگّے وَدّھ جاندا اے تے مسِیح دی تعلِیم اُتّے قیم نئیں رہندا اوہدے کول خُدا نئیں۔ جیہڑا اوس تعلِیم اُتّے پَکّا رہندا اے اوہدے کول باپ وی اے تے پُتر وی۔

¹⁰ جے کوئی تُہاڈے کول آوے تے ایہہ تعلِیم نا دیوے۔ اوہنوں گھر وِچ نا وڑن دیو تے نا سلام کرو۔

¹¹ کیوں جو جیہڑا اجیہے بندے نُوں سلام کر دا اے۔ اوہ اوہدیاں بُریاں کمّاں وِچ سنگی ہوندا اے۔

اخِیری گلّاں

¹² مَیں بتھیریاں گلّاں تُہانوں لِکھنِیاں نیں پر کاغذ تے سیاہی نال لِکھنا نئیں چاہندا سگوں تُہاڈے کول آ کے آمھنے سامھنے گلّ بات کرن دی آس رکھنا آں۔ تاں جو تُہاڈی خُوشی پُوری ہوئے۔

¹³ تیری چُنی ہوئی بھین دے پُتر تینُوں سلام آکھدے نیں۔