۲-کُرِنتھِیوں 9 - پنجابی نواں عہد نامہ نظرثانی شدہ چھپائی

حاجتمند اِیمانداراں دے لئی امداد

¹ جیہڑی خِدمت پاک لوکاں دے واسطے کِیتی جاندی اے اوہدی بابت میرا تُہانوں لِکھنا بے فائدہ اے۔

² کیوں جو مَیں تُہاڈا شَوق جاننا آں۔ جِہدے سبّب مَکِدُنیہ دیاں لوکاں اگّے تُہاڈے اُتّے فخر کرنا آں۔ پئی اَخیہ دے لوک پِچّھلے ورھے توں تیار نیں۔ تے تُہاڈی سرگرمی نے کئیاں لوکاں نُوں جوش دوایا۔

³ پر مَیں بھراواں نُوں ایس لئی گھلّیا۔ پئی اسی جیہڑا فخر ایس گلّے تُہاڈے اُتّے کرنے آں۔ اوہ بے اصل نا ٹھہرے سگوں تُسی میرے آکھے دے سببّوں تیار رہو۔

⁴ اجیہا نا ہوئے۔ پئی جے مَکِدُنیہ دے لوک میرے نال آؤن۔ تاں تُہانوں تیار نا ویکھن۔ تے اسی (ایہہ نئیں آکھدے پئی تُسی) اوس بھروسے دے سبّب شرمندے ہوئیے۔

⁵ ایس لئی مَیں بھراواں اگّے ایہہ درخواست کرنی ضرُور سمجھی۔ پئی اوہ جا کے تُہاڈی وعدہ کِیتی ہوئی بخشِش نُوں اگیترے ای تیار کر چھڈن۔ تے جو اوہ بخشِش وانگر تیار رہے نا بدوبدی دے طریقے نال۔

⁶ پر گلّ ایہہ اے پئی جیہڑا تھوڑا بِیجدا اے۔ اوہ تھوڑا وَڈّھے گا تے جیہڑا بُہتا بِیجدا اے اوہ بُہتا وَڈّھے گا۔

⁷ جِنّاں کِسے اپنے دِل وِچ ٹھہرایا اے۔ اوناں ای دیوے رنج ہو کے نئیں تے نا لاچاری نال۔ کیوں جو خُدا خُوشی نال دین والے نُوں پیار کر دا اے۔

⁸ تے خُدا تُہاڈے اُتّے ہر طرح دا فضل بُہتا کر سکدا اے۔ تاں جو تُہانوں سدا ہر شے وادُھو مِلیا کرے۔ تے ہر نیک کمّ لئی تُہاڈے کول بُہت کُجھ موجُود رہیا کرے۔

⁹ جیویں لِکھیا اے پئی اوس کھنڈایا اے۔ اوس کنگالاں نُوں دِتّا اے۔ اوہدی راستبازی سدا تِیکر باقی رہے گی۔

¹⁰ سو جیہڑا بِیجن والے نُوں وی تے کھان لئی روٹی دیندا اے۔ اوہ ای تُہاڈے لئی وی دے گا۔ تے اوہدے وِچ وادھا کر دے گا۔ تے تُہاڈی راستبازی دیاں پَھلاں نُوں وَدھائے گا۔

¹¹ تُسی ہر شے نُوں وادھے نال لے کے سبھ طرح دی سخاوت کرو گے۔ جیہڑی ساڈی راہِیں خُدا دی شُکر گُزاری دا سبّب ہوندی اے۔

¹² کیوں جو ایس سیوا نُوں پُوریاں کرن نال نا نِریاں پاک لوکاں دِیاں لوڑاں پُوریاں ہوندیاں نیں سگوں بتھیریاں لوکاں ولّوں خُدا دی بڑی شُکر گُزاری ہوندی اے۔

¹³ ایس لئی پئی جیہڑی نِیّت ایس خِدمت توں ثابت ہوئی اوہدے سببّوں اوہ خُدا دی وڈیائی کر دے نیں پئی تُسی مسِیح دی خُوشخبری دا اِقرار کر کے اوہدے اُتّے تابعداری نال عمل کر دے ہو۔ تے اوہناں دی تے ساریاں لوکاں دی مدد کرن وِچ سخی ہو۔

¹⁴ تے اوہ تُہاڈے لئی دُعا منگدے نیں تے تُہانوں پیار کر دے نیں۔ ایس لئی پئی تُہاڈے اُتّے خُدا دا بڑا ای فضل اے۔

¹⁵ شُکر خُدا دا اوہدی اوس بخشِش لئی جیہڑی بیانوں باہر اے۔