۲-کُرِنتھِیوں 6 - پنجابی نواں عہد نامہ نظرثانی شدہ چھپائی

¹ تے اسی جیہڑے اوہدے نال کمّ وِچ سِیری آں ایہہ عرض وی کرنے آں۔ پئی خُدا دا فضل جیہڑا تُہاڈے اُتّے ہویا بے فائدہ نا رہن دیو۔

² کیوں جو اوہ آکھدا اے پئی مَیں قبولِیّت دے ویلے تیری سُن لئی تے نجات دے دِن تیری مدد کِیتی۔ ویکھو ہُن قبولِیّت دا ویلا اے ویکھو ایہہ نجات دا دِن اے۔

³ اسی کِسے گلّ وِچ ٹھوکر کھان دا کوئی موقع نئیں دیندے تاں جو ساڈی خِدمت اُتّے حرف نا آوے۔

⁴ سگوں خُدا دے کامیاں وانگ اپنی خُوبی ظاہر کرنے آں۔ بڑے صبر نال۔ مُصِیبتاں نال۔ لوڑاں نال ۔تنگِیاں نال۔

⁵ کولڑے کھان نال۔ قید ہون نال۔ ہنگامیاں نال۔ محِنتاں نال۔ جاگدیاں رہن نال۔ بُھکھیاں رہن نال۔

⁶ پاکیزگی نال۔ عِلم نال ۔تحمّل نال۔ مِہربانی نال۔ پاک رُوح نال۔ سَچّی مُحبّت نال۔

⁷ سچیائی دے کلام نال۔ خُدا دی قُدرت نال۔ راست بازی دے ہتّھیاراں دی راہِیں جیہڑے سَجّے کھبّے نیں۔

⁸ عِزّت تے بے عِزّتی دی راہِیں۔ بدنامی تے نیک نامی دی راہِیں۔ بھانویں بد راہ کرن والے معلُوم ہُنے آں فیر وی سَچّے آں۔

⁹ گُمناماں وانگر آں تَد وی مشہُور آں۔ مویاں ہویاں وانگر آں۔ پر ویکھو جیونے آں۔ مار کھان والیاں وانگر آں پر جانوں مارے نئیں جاندے۔

¹⁰ اُداساں وانگر آں پر سدا خُوش رہنے آں۔ کنگالاں جیہے آں پر بتھیریاں نُوں دَولت مند کر دینے آں۔ ناداراں وانگر آں۔ تَد وی سبھ کُجھ رکھنے آں۔

¹¹ پئی کُرِنتھیو! اساں تُہاڈے نال کُھل کے گلّاں کِیتیاں نیں۔ ساڈا دِل تُہاڈے ولّوں کُھلا ہوگیا اے۔

¹² ساڈے دِلاں وِچ تُہاڈے لئی تنگی نئیں پر تُہاڈے دِلاں وِچ تنگی اے۔

¹³ سو مَیں پُتر جان کے تُہانوں آکھنا آں پئی تُسی ایہدے بدلے وِچ کُھلے دِل والے ہو جاؤ۔

بے دِینی دے خلاف خبرداری

¹⁴ بے اِیماناں دے نال ڈِنگی پنجالی وِچ نا جُپو۔ کیوں جو راستبازی تے بے دِینی وِچ کِیہ میل جول اے؟ یا چانن تے ہنیرے وِچ کِیہ میل اے؟

¹⁵ مسِیح دا بلِیعال دے نال کِیہ واسطہ؟ یا اِیماندار دابے اِیمان نال کِیہ واسطہ؟

¹⁶ تے خُدا دے مَقدِس نُوں بُتاں نال کِیہ تعلق اے؟ کیوں جو اسی زِندہ خُدا دا مَقدِس آں۔ جیویں خُدا آکھیا اے پئی مَیں اوہناں وِچ وَسّاں گا تے اوہناں وِچ ٹُراں پھراں گا۔ تے مَیں اوہناں دا خُدا ہوواں گا۔ تے اوہ میری اُمّت ہون گے۔

¹⁷ ایس واسطے خُداوند آکھدا اے پئی ایہناں وِچوں نِکل کے وکھرے رہو تے ناپاک شے نُوں ہتّھ نا لاؤ۔ تے مَیں تُہانوں قبول کر لاں گا۔

¹⁸ تے تُہاڈا باپ ہوواں گا۔ تے تُسی میرے دِھیاں پُتر ہوؤ گے۔ ایہہ خُداوند قادرِ مُطلق دا قَول اے۔